ភ្នំពេញ ៖ យោងតាមប្រភពពីលោកអនុសេនីយ៍ឯកម៉ៅ សាវឿន នាយនគរបាលប៉ុស្តិ៍ស្ទឹងមានជ័យទី១ បានឲ្យដឹងថា កាលពីវេលាម៉ោង២១និង៤០នាទីយប់ ថ្ងៃទី២៥ ខែធ្នូនេះនៅលើស្ពានអាកាសស្ទឹងមានជ័យក្នុងទឹកដីខណ្ឌមានជ័យមានករណីគ្រោះថ្នាក់ចរាចរណ៍មួយបានកើតឡើងបណ្តាលឲ្យបុរសម្នាក់ស្លាប់និងម្នាក់ទៀតរងរបួសធ្ងន់។
លោកនាយប៉ុស្តិ៍បន្តថា បុរសដែលស្លាប់ឈ្មោះជិន រតនា អាយុ៣២ឆ្នាំរស់នៅសង្កាត់មិត្តភាពខណ្ឌ៧មករារាជធានីភ្នំពេញ និង ម្នាក់ទៀតដែលរួមដំណើរបានរងរបួសធ្ងន់កំពុងសង្គ្រោះបន្ទាន់នៅមន្ទីរពេទ្យ។
តាមសាក្សីបានប្រាប់នគរបាលឲ្យដឹងថា នៅម៉ោងកើតហេតុជនរងគ្រោះបានជិះម៉ូតូម៉ាកស្កុបពីពណ៌ស ពាក់ស្លាកលេខ ភ្នំពេញ1GN-9405 បានឌុបបុរសម្នាក់ទៀត ដោយធ្វើដំណើរឡើងស្ពានអាកាសស្ទឹងមានជ័យក្នុងទិសដៅពីជើងទៅត្បូង។ ហើយពេលឡើងទៅដល់លើស្ពានទំនងជាស្រវឹងក៏ទៅបុកបង្កាន់ដៃស្ពានបណ្តាលឲ្យដួលត្រឡប់ត្រឡិនអូសចំងាយជា២០ម៉ែត្រហើយក្នុងនោះជនរងគ្រោះបានស្លាប់នៅនឹងកន្លែងចំណែកអ្នកអង្គុយក្រោយរងរបួសធ្ងន់។
សាក្សីបានបញ្ជាក់ថា ករណីគ្រោះថ្នាក់ចរាចរណ៍នេះ គឺជនរងគ្រោះបើកបរលឿនខ្វះការប្រុងប្រយ័ត្នក៏ជ្រុលទៅបុកបង្កាន់ដៃស្ពានបណ្តាលឲ្យជួបគ្រោះថ្នាក់រហូតដល់ស្លាប់និងរបួសធ្ងន់បែបនេះ។ នគរបាលប៉ុស្តិ៍បានប្រគល់សពទៅឲ្យបងប្អូនទាំងយប់ហើយម៉ូតូជនរងគ្រោះគឺនៅរក្សាទុកនៅស្នាក់ការនគរបាលប៉ុស្តិ៍រង់ចាំប្រគល់ទៅឲ្យក្រុមគ្រួសារសព៕
Source: Kampuchea Thmey Daily
0 Comments