រតនគិរី ៖ អាជ្ញាធរស្រុកកូនមុំកាលពីយប់ថ្ងៃទី៨ ខែធ្នូ ឆ្នាំ២០១៨ បាននាំកម្លាំងទៅស្ទាក់ចាប់រថយន្ដធុនធំចំនួនប្រាំគ្រឿង ដែលដឹកម៉ាស៊ីនរ៉ៃចេញពីទឹកដីខេត្ដស្ទឹងត្រែង បើកចូលមកស្រុកកូនមុំ រួចក៏ដោះលែងវិញសង្ស័យត្រូវរ៉ូវគ្នាដោយស្ងាត់ៗ។
ប្រភពពីមន្ដ្រីប៉ូលិសស្រុកកូនមុំបានឲ្យដឹងថា កាលពីយប់ថ្ងៃទី៨ ខែធ្នូ ឆ្នាំ២០១៨ មានក្បួនរថយន្ដធំម៉ាករ៉េវ(ប៉ាកុង)ចំនួនប្រាំគ្រឿងមានដឹកសម្ភារ:កែច្នៃឈើ បានបើកចេញពីភូមិសាស្ដ្រខេត្ដស្ទឹងត្រែង ឆ្ពោះមកស្រុកកូនមុំតាមផ្លូវជាតិលេខ៧៨ឆ្លងកាត់ស្រុកលំផាត់ខេត្តរតនគិរីឆ្ពោះទៅស្រុកកោះញែក ខេត្តមណ្ឌលគិរី។
ប្រភពដដែលបានឲ្យដឹងទៀតថា នៅម៉ោងប្រមាណជិតប្រាំបីយប់ថ្ងៃដដែលនោះក្បួនរថយន្ដប៉ាកុងបានបើកទៅដល់ចំណុចភូមិតាអងកាតែ ឃុំតាអងស្រុកកូនមុំ ចំណែកកម្លាំងស្រុកដែលដឹកនាំដោយលោកសាយ ចំរើន អភិបាលរងស្រុកកូនមុំ ក៏បានទៅដល់ រួចបើកការត្រួតពិនិត្យបានរកឃើញដែករ៉ៃចំនួនបួនខ្សែក្បាលម៉ាស៊ីនចំនួនពីរគ្រឿងនិងម៉ាស៊ីនត្រង់សឺន័រចំនួនពីរគ្រឿងផងដែរ។
នៅព្រឹកថ្ងៃទី៩ ខែធ្នូ ឆ្នាំ២០១៨លោកសាយ ចំរើន អភិបាលរងស្រុកកូនមុំដែលដឹកនាំកម្លាំងចុះទៅឃាត់ក្បូនរថយន្ដដូចខាងលើនោះបានបញ្ជាក់ប្រាប់សារព័ត៌មានឲ្យដឹងថា រថយន្ដទាំងប្រាំនោះគឺត្រូវតែរឹបអូសយកទៅសាលាស្រុកកូនមុំដើម្បីបង្កសំណុំរឿងបញ្ជូនទៅខណ្ឌរដ្ឋបាលព្រៃឈើខេត្តនៅថ្ងៃដដែលនេះ ព្រោះរថយន្ដនោះមានផ្ទុកឧបករណ៍កែច្នៃឈើ។
លោកកែប កត់ នាយខណ្ឌរដ្ឋបាលព្រៃឈើខេត្ដបានប្រាប់សារព័ត៌មានឲ្យដឹងតាមទូរស័ព្ទកាលពីរសៀលថ្ងៃទី១០ខែធ្នូ ឆ្នាំ២០១៨ថា ពាក់ព័ន្ធករណីឃាត់រថយន្ដចំនួនប្រាំគ្រឿងដូចខាងលើមកដល់ពេលនេះមិនទាន់ឃើញខាងស្រុកកូនមុំបញ្ជូនសំណុំរឿងនិងវត្ថុតាងនោះមកនៅឡើយទេ។
នៅថ្ងៃនេះដែរសារព័ត៌មានបានព្យាយាមសុំការបញ្ជាក់ពីលោក សេក ហៃ អភិបាលស្រុកកូនមុំជុំវិញរឿងឃាត់រថយន្ដប៉ាកុងចំនួននប្រាំគ្រឿងដែលដឹកឧបករណ៍កែច្នៃឈើនោះ ប៉ុន្ដែលោកឆ្លើយយ៉ាងខ្លីថា "ជាប់រវល់"។
នៅគ្រាបន្ទាប់នោះលោក សាយ ចំរើន អភិបាលរងស្រុកកូនមុំដែលចុះទៅឃាត់រថយន្ដនោះផ្ទាល់បានបញ្ជាក់ថា ក្រោយពីត្រួតពិនិត្យរួចលោកបានបំពេញបែបបទបញ្ជូនឲ្យមេព្រៃខេត្ដរួចហើយឥឡូវបែរជាថាមិនឃើញរថយន្ដនោះទៅវិញ។
មន្ត្រីប៉ូលិសបានបញ្ជាក់ថា រថយន្ដចំនួនប្រាំគ្រឿងដែលខាងស្រុកកូនមុំបានឃាត់កាលពីយប់ថ្ងៃទី៨ខែធ្នូនោះគឺស្រុកបានសម្របសម្រួលដោះលែងវិញហើយ ក្រោយពីឃាត់បានមួយយប់។ ការដោះលែងនោះគេសង្ស័យថាអាជ្ញាធរស្រុកបានត្រូវរ៉ូវជាមួយម្ចាស់រថយន្ដនោះហើយមើលទៅ? ៕
Source: Kampuchea Thmey Daily
0 Comments