ព្រះសីហនុ ៖ សំណង់ថ្មបេតុង ដែលកំពុងចាក់គ្រឹះដ៏រឹងមាំលើដីចំណីផ្លូវសាធារណៈជាប់របងព្រលានយន្ត ហោះកងកេង ស្ថិតក្នុងដែនដី រដ្ឋបាលឃុំរាម ស្រុកព្រៃនប់ ខេត្តព្រះសីហនុ ចំនួន៥ទីតាំង នារសៀលថ្ងៃទី១១ ខែធ្នូ ឆ្នាំ២០១៨ ត្រូវបាន អាជ្ញាធរស្រុក ចុះធ្វើការ ហាមឃាត់ ក្រោយមានពាក្យបណ្តឹង ពីសំណាក់ ព្រលានយន្តហោះអន្តរជាតិកងកេង។
ពាក់ព័ន្ធ សំណង់ខាងលើនេះ មន្ត្រី ក្រុមប្រឹក្សា ឃុំរាម បាន ធ្វើការបញ្ជាក់ ថាចំពោះ សំណង់ចំនួនប្រមាណ៥ទីតាំង ដែលកំពុងសាងសង់ខាងលើនេះ កន្លងមកខាងក្រុមការងារ ឃុំរាម បានចុះឃាត់ជាញឹកញាប់រួចមកហើយតាំងពីចាប់ផ្តើម ចាក់គ្រឹះមក ម្ល៉េះ ប៉ុន្តែក្រុម ម្ចាស់ សំណង់ទាំងនោះ ពុំបានស្តាប់អាជ្ញាធរដែនដីឡើយ ដោយនៅតែបន្ត សកម្មភាពសាងសង់ ដដែល ដោយសារមានមន្ត្រី មានអំណាចម្នាក់ ជាកងទ័ពជើងទឹកនៅមូលដ្ឋាន សមុទ្រ រាមម្នាក់ជាអ្នកនៅពីក្រោយ ធ្វើជាខ្នងបង្អែក ទើបក្រុមម្ចាស់សំណង់ល្មើសច្បាប់ទាំងនោះ មិនខ្លាច ច្បាប់ មិនខ្លាចអាជ្ញាធរដែនដី។
ជុំវិញបញ្ហាខាងលើនេះ លោក ព្រំ មុន្នី នាយរងរដ្ឋបាលស្រុកព្រៃនប់បានឲ្យដឹងថា ក្រុមការងារ ចម្រុះរបស់រដ្ឋបាលស្រុកព្រៃនប់ ក្រោយពីចុះធ្វើការពិនិត្យជាក់ស្តែង បានធ្វើការ ហាមឃាត់ ម្ចាស់សំណង់ចំនួន០៥ទីតាំង និងធ្វើកិច្ចសន្យា បញ្ឈប់ការសាងសង់បន្ត។ ចំពោះកិច្ចការបន្តលោកនឹងធ្វើរបាយការបញ្ជូនទៅថ្នាក់អភិបាលស្រុកដើម្បីមានវិធានការតាមផ្លូវច្បាប់ ហើយចំណាត់ការយ៉ាងណានោះ នៅមិនទាន់ដឹងទេ។
លោកស កក្កដា អភិបាលស្រុកព្រៃនប់ បានថ្លែងបញ្ជាក់ថា ដោយផ្អែកលើ បណ្តឹង ពីព្រលានយន្តហោះអន្តរជាតិកងកេង ដាក់ទៅរដ្ឋបាលខេត្ត ជុំវិញបញ្ហាមានប្រជាពលរដ្ឋមួយចំនួនតូចបានសាងសង់សំណង់រឹងមាំនៅជាប់របងព្រលានយន្តហោះដែលបានធ្វើអោយប៉ះពាល់យ៉ាងធ្ងន់ធ្ងរនូវបម្រាមក៏ដូចជាសោភណភាពរបស់ព្រលានជាពិសេសប៉ះពាល់ដល់ការចុះចត និងហោះហើរឡើងរបស់យន្តហោះ (តាមលក្ខណៈបច្ចេកទេស)។
លោកបន្តថា ការចុះរបស់ក្រុមការងារនាពេលនេះ គ្រាន់តែធ្វើការណែនាំ ផ្អាកសកម្មភាពសាងសង់ ដោយ រង់ចាំមន្ត្រីជំនាញចុះសិក្សាអោយបានច្បាស់លាស់ជាមុនសិនព្រោះថា ទីតាំងនេះបើយើង ពិនិត្យជាបឋម ទី០១ – វាស្ថិតក្នុងដីចំណីផ្លូវសាធារណៈរបស់រដ្ឋ ទី០២ . វាស្ថិតនៅកៀក ផ្លូវ ហោះហើរ និង ទី០៣ – ពុំមានច្បាប់សាងសង់ពីអាជ្ញាធរមូលដ្ឋាននិងមន្ត្រីជំនាញពាក់ព័ន្ធ។
ដោយឡែកសម្រាប់ មន្ត្រីភូមិបាលស្រុកព្រៃនប់ បានបញ្ជាក់ថា សំណង់ខាងលើនេះ ទីតាំងមួយណាក៏សាងសង់លើដីចំណីផ្លូវ ដែរ ពីព្រោះថា ផ្លូវ មួយខ្សែនេះ មានទំហំទ្រូងផ្លូវ ២០ម៉ែត្រ និង ទំហំដីចំណីផ្លូវ គិតពីអ័ក្សផ្លូវ ម្ខាងៗ ប្រវែង ៣០ ម៉ែត្រ និងមានប្លង់ប្រព័ន្ធ បាន កំណត់ អស់ហើយ ដូចនេះ ម្ចាស់សំណង់ទាំង ៥ទីតាំងខាងលើ មិនមានសិទ្ធិ ក្នុងការតវ៉ា ជាមួយ ថ្នាក់ដឹកនាំស្រុក ឬខេត្តនោះឡើយ ប៉ុន្តែក្នុងករណី ប្រឆាំងតវ៉ា មិនព្រម រុះរើចេញវិញ ដោយ ខ្លួនឯង ម្ចាស់សំណង់ទាំងនោះ នឹងប្រឈមទៅផ្លូវច្បាប់ ត្រង់មាត្រា លេខ ២៥៩ នៃច្បាប់ ភូមិបាល ជនណាដែល ប៉ះពាល់រំលោភលើដីកម្មសិទ្ធិ សាធារណៈរបស់រដ្ឋ ត្រូវផ្ដន្ទាទោសពី ១ឆ្នាំទៅ ៥ឆ្នាំ និងផាកពិន័យ ពី៥លានរៀល ទៅដល់ ៥០លាន់ រៀលជាកំណត់ ដូចនេះ ម្ចាស់សំណង់ដែលពាក់ព័ន្ធ គួរ មានការយល់ដឹង ខ្លះហើយ ចៀសវាង ដល់ពេល អាជ្ញាធរខេត្ត ចាប់ផ្តើម អនុវត្តច្បាប់ ប្រហែលជាមិនអាចគេចផុត ទោលទណ្ឌឡើយ។
គួរបញ្ជាក់ផងដែរថា ប្រជាពលរដ្ឋ រស់នៅតាមដីចំណីផ្លូវ ជាប់របង ព្រលានយន្តហោះ ខាងលើនេះ បើតាម ការបញ្ជាក់របស់ លោក យន្ត មីន អភិបាលនៃគណៈអភិបាលខេត្ត ព្រះសីហនុ កន្លងមក បានឲ្យដឹងថា បងប្អូនប្រជាពលរដ្ឋ ខាងលើនេះ រដ្ឋបាលខេត្ត មាន គោលការណ៍រួចហើយ ក្នុងការ ផ្លាស់ប្តូរ ពួកគាត់ ទៅរស់នៅ តំបន់ផ្សេង ដែលនៅមិនឆ្ងាយ ប៉ុន្មានពីទីនេះទេ ដើម្បីឲ្យពួកគាត់ មានដីជាកម្មសិទ្ធិស្របច្បាប់។ សម្រាប់តំបន់នេះ មិនអនុញាត ឲ្យមាការសាងសង់សំណង់ផ្សេង ៗ នោះឡើយ ពីព្រោះ វាជាតំបន់ ទេសចរណ៍ព្រលានយន្តហោះ អន្តរជាតិ៕
Source: Kampuchea Thmey Daily
0 Comments