មន្ត្រីកាំកុងត្រូលខេត្តព្រះសីហនុរកឃើញ បបែលងៀត ប្រមាណ២០គីឡូក្រាម មានសារធាតុគីមី ហាមឃាត់ ដាក់លក់ក្នុងផ្សារលើក្រុងព្រះសីហនុ

ព្រះសីហនុ ៖ មន្ត្រីជំនាញសាខាកាំកុងត្រូលខេត្តព្រះសីហនុ សហការជាមួយមន្ត្រីមន្ទីរ ពាណិជ្ជកម្ម ខេត្ត និងមន្ត្រីតំណាងសាលាខេត្ត បានចុះធ្វើការត្រួតពិនិត្យកន្លែងលក់ដូរម្ហូបអាហារសមុទ្រនៅផ្សារលើក្រុងព្រះសីហនុ ក្នុងគោលដៅផ្ដោតជាសំខាន់ទៅលើសារជាតិគីមីហាមឃាត់ដាក់ក្នុងម្ហូបអាហារសមុទ្រក្លាស្សេ បន្លែ ផ្លែឈើ និងផលិតផលផ្សេងៗ ដែលបងប្អូនអាជីវករ កំពុងដាក់តាំងលក់ ជាលទ្ធផល មន្ត្រីសាខាកាំកុង ត្រូល បានរកឃើញ ត្រីបបែល ងៀត ចំនួនប្រមាណ ជិត២០គីឡូក្រាម មានសារធាតុគីមី(បូរ៉ាក់) ហាមឃាត់។

លោកជា ប៉ិច អនុប្រធានសាខាកាំកុងត្រូលខេត្តព្រះសីហនុ បានឲ្យដឹងថា ត្រីបបែល ងៀតចំនួន ប្រមាណ ១៨គីឡូកន្លះខាងលើនេះ មន្ត្រីកាំកុងត្រូល បានធ្វើការដកហូត ពីតូបលក់ដូរចំនួន០៤ក្នុងផ្សារលើ ក្រោយពីមន្ត្រីជំនាញ បានធ្វើតេស្ត រកឃើញមានលាយសារធាតុគីមី ( ប៉ូរ៉ាក់)ដែលជាសារធាតុគីមីហាមឃាត់ បង្កផលប៉ះពាល់ ដល់ សុខភាព អ្នក បរិភោគ។

នៅចំពោះមុខ បន្ទាប់ពីធ្វើការដកហូត ត្រីបបែល ងៀត ខាងលើនេះដើម្បី យកទៅ កម្ទេចចោលរួចមក មន្ត្រីកាំកុងត្រូល ខេត្តព្រះសីហនុ ក៏បានធ្វើការអប់រំទៅដល់ អាជីវករ ដែលពាក់ព័ន្ធនឹងធ្វើកិច្ចសន្យាឱ្យប្រុងប្រយ័ត្ន និងបញ្ឈប់ការលក់ដូរម្ហូបអាហារសមុទ្រ លួច ដាក់លាយសារធាតុគីមី បែបនេះជាបន្តទៀតនៅថ្ងៃខាងមុខ។

ជាមួយគ្នានេះ មន្ត្រីសាខា កាំកុងត្រូលក៏បានធ្វើការណែនាំផងដែរទៅដល់បងប្អូនជាអាជីវករទាំងអស់ឲ្យមានការយល់ដឹងបន្ថែមទៀតនិងរួមគ្នាលុបបំបាត់ឲ្យបានទាំងស្រុង នូវការដាក់សារធាតុគីមីអ្វីនៅក្នុងផលិតផលម្ហូបអាហារ ខូចគុណភាពប្រើប្រាស់។

លោក ម៉ាង ស៊ី ណេត ប្រធាន សាខាកាំកុងត្រូល ខេត្តព្រះសីហនុ បញ្ជាក់ថា សុខភាពប្រជាជនទាំងកម្លាំងកាយ និងប្រាជ្ញាគឺជាកត្តាអាទិភាពសម្រាប់អភិវឌ្ឍប្រទេសជាតិ ហើយ ការជ្រើសរើសអាហារដែលមានសុវត្ថិភាពមកបរិភោគគឺជាបញ្ហាសំខាន់ ដូចនេះ ដើម្បីចូលរួម ចំណែកក្នុងចលនា បង្កើនសុវត្ថិភាពចំណីអាហារក្នុងខេត្តផង និងដើម្បី ទាក់ទាញភ្ញៀវទេសចរជាតិ និងអន្តរជាតិផង សូមបងប្អូន អាជីវករទាំងអស់ រួមនឹង ម្ចាស់ អាហារដ្ឋាននានា សូមរួមគ្នា លុបបំបាត់ និងលក់ដូរ តែផលិតផលម្ហូបអាហារ បន្លែ ផ្លែឈើ គ្មានសារធាតុគីមី ធានាបានសុវត្ថិភាព សុខុមាលភាព របស់ប្រជាពលរដ្ឋ ក៏ដូចជាភ្ញៀវ ទេសចរជាតិ និងអន្តរជាតិ។ ហើយសម្រាប់ ផ្សារលើនេះ មានមន្ត្រី កាំកុងត្រូល នៅជាប្រចាំ ដើម្បី ធ្វើការត្រួតពិនិត្យ គ្រប់ពេលវេលា៕