ក្រចេះ ៖ ស្ត្រីម្នាក់ ដែលល្បីល្បាញថាជាអ្នករកស៊ីមិនចេះខាត ត្រូវបានអយ្យការអមសាលាដំបូងខេត្តក្រចេះ បង្គាប់ឲ្យឃាត់ខ្លួន កាលពីព្រឹកថ្ងៃទី០៧ ខែធ្នូ ឆ្នាំ២០១៨នេះ ពាក់ព័ន្ធទៅនឹងរឿងរំលោភលើទំនុកចិត្តមានទឹកប្រាក់ជាច្រើនម៉ឺនដុល្លារ។
ជនជាប់ចោទដែលតុលាការបង្គាប់ឲ្យសមត្ថកិច្ចចាប់ខ្លួន ឈ្មោះ ភី មុំ អាយុ៤៣ឆ្នាំ មានទីលំនៅក្រុងក្រចេះ ខេត្តក្រចេះ ត្រូវបានព្រះរាជអាជ្ញារងអមសាលាដំបូងខេត្ត លោក ជា សុភក្ត្រ បានចេញដីកាកោះហៅឲ្យចូលខ្លួន នៅថ្ងៃទី៧ ខែធ្នូ ក្នុងសំណុំរំលោភលើសេចក្តីទុកចិត្ត លើទំហំប្រាក់ចំនួនជាង១សែនដុល្លារ ពីដើមបណ្ដឹង ដែលជាភាគហ៊ុនរបស់ក្រុមហ៊ុនភេសជ្ជៈមួយ។
នេះគ្រាន់តែជាការអនុវត្តបណ្ដឹងថ្មីមួយពីដើមបណ្ដឹង ទាក់ទងនឹងលុយជាង១សែនដុល្លារ ពីភាគីម្ចាស់ភាគហ៊ុនដែលស្ត្រី ឈ្មោះ ភី មុំ បានកិបកេងប្រាក់បំបាត់យក ខណៈដែលស្ត្រី ជាអាជីវកររូបនេះនៅមានបណ្ដឹងជាច្រើនដទៃទៀត ពីដើមបណ្ដឹងផ្សេងគ្នានៅក្នុងខេត្ត ក៏ដូចជានៅក្រៅខេត្តលើសំណុំរឿងទាក់ទងនឹងប្រាក់នេះតែម្ដង។
កាលពីពាក់កណ្ដាលខែឧសភា ឆ្នាំ២០១៤ ស្ត្រីរូបនេះ ធ្លាប់ត្រូវបានតុលាការខេត្តក្រចេះ ចុះអនុវត្តដីការឹបអូសលំនៅឋាន និងរឹបអូសរថយន្ត ផ្អើលទីប្រជុំជនក្រុង ក្រចេះម្តងជាពីរដងរួចមកហើយ ក្នុងសំណុំរឿងជំពាក់ប្រាក់មួយ។
ចំពោះសំណុំរឿងរំលោភលើទំនុកចិត្តថ្មីនេះ តំណាងអយ្យការអមសាលាដំបូងខេត្ត បានសម្រេចចោទប្រកាន់ ឈ្មោះ មុំ ភី ហើយបញ្ជូនសំណុំរឿង និងជនជាប់ចោទឲ្យចៅក្រមស៊ើបសួរសម្រេចតាមនីតិវិធី៕
Source: Kampuchea Thmey Daily
0 Comments