សៀមរាប ៖ សិក្ខាសាលាតាមបណ្ដាខេត្តចំនួន៥ ប្រចាំឆ្នាំ២០១៨ របស់គណៈកម្មការមូលបត្រកម្ពុជា ស្ដីពី "អាជីវកម្មឧបករណ៍និស្សន្ទនៅកម្ពុជា" បានបន្តធ្វើ កាលពីថ្ងៃទី៥ ខែធ្នូ ឆ្នាំ២០១៨ នៅខេត្តសៀមរាប ដែលជាគោលដៅទីបី ក្នុងចំណោមខេត្តទាំងប្រាំ បន្ទាប់ពីគោលដៅទី១ និងទី២ ត្រូវបានបញ្ចប់។
សិក្ខាសាលានេះ មានគោលបំណងផ្សព្វផ្សាយ និងពង្រីកការយល់ដឹងអំពីការវិនិយោគលើឧបករណ៍និស្សន្ទនៅទូទាំងប្រទេសកម្ពុជា កសាងទំនុកចិត្តរបស់វិនិយោគិន និងផ្ដល់ឲ្យវិនិយោគិននូវជំនាញ និងយុទ្ធសាស្ត្រចាំបាច់សម្រាប់ការវិនិយោគមួយនេះ។
ខេត្តបន្ទាយមានជ័យ និងខេត្តបាត់ដំបង គឺជាគោលដៅបន្ទាប់ ត្រូវបានចាត់ទុកជាខេត្តសក្ដានុពលខ្ពស់ ដោយសារតែចំនួនប្រជាជន ប្រវត្តិវិនិយោគ និងកម្រិតជីវភាពរបស់ប្រជាជន។
លោក សុខ ដារ៉ា អគ្គនាយករង នៃគណៈកម្មការមូលបត្រកម្ពុជា បានមានមតិស្វាគមន៍ ណែនាំអំពីឧបករណ៍និស្សន្ទ ក៏ដូចជាបញ្ជាក់ពីភារកិច្ចរបស់គណៈកម្មការមូលបត្រកម្ពុជា ក្នុងការលើកកម្ពស់ការជួញដូរឧបករណ៍និស្សន្ទ និងការសម្រួលដល់ការរីកលូតលាស់ នៃទីផ្សារឧបករណ៍និស្សន្ទស្របច្បាប់នៅគ្រប់ទីកន្លែងទាំងអស់ក្នុងប្រទេសកម្ពុជា។
លោក យន់ សុវណ្ណារ៉ា អនុប្រធានការិយាល័យគ្រប់គ្រងអាជីវកម្មគម្រោងវិនិយោគរួម និងអាជីវកម្មឧបករណ៍និស្សន្ទ នៃគណៈកម្មការមូលបត្រកម្ពុជា បានបង្ហាញពីទិដ្ឋភាពទូទៅនៃទីផ្សារឧបករណ៍និស្សន្ទ ការរីកចម្រើន នៃការជួញដូរឧបករណ៍និស្សន្ទនៅកម្ពុជា ក្របខ័ណ្ឌបទប្បញ្ញត្តិ បញ្ហាប្រឈម និងផែនការរបស់គណៈកម្មាធិការមូលបត្រកម្ពុជា ក្នុងការអភិវឌ្ឍវិស័យឧបករណ៍និស្សន្ទបន្ថែមទៀត។
លោក Hosea Poon នាយកផ្នែកប្រឹក្សាយោបល់ហិរញ្ញវត្ថុ នៃ ហ្គោលដេន អេហ្វអិកស៍ លីង ឃែភីថល ត្រូវបានអញ្ជើញចូលរួមជាវាគ្មិនកិត្តិយសសម្រាប់សិក្ខាសាលានៅខេត្តសៀមរាបនេះ។
ជាមួយនឹងក្ដីសោមនស្សរីករាយ លោក Poon បានបញ្ជាក់ថា ការលើកកម្ពស់ការយល់ដឹងលើការជួញដូរឧបករណ៍ហិរញ្ញវត្ថុជាសាធារណៈ គឺជាស្ថិតនៅតំបន់កំពូល នៃបញ្ជីការងារអាទិភាពរបស់ ហ្គោលដេន អេហ្វអិកស៍ លីង ឃែភីថល។
លោក Poon បានបន្ថែមថា ទីផ្សារឧបករណ៍និស្សន្ទនៅកម្ពុជា កំពុងបន្តរីកលូតលាស់ និងឆ្ពោះទៅរកសក្ដានុពលពេញលេញរបស់វា។ ក្រុមហ៊ុនឈ្មួញជើងសាជាច្រើន បានទទួលអាជ្ញាប័ណ្ណ ដូច្នេះ ការវិវឌ្ឍន៍ នៃទីផ្សារឧបករណ៍និស្សន្ទនៅកម្ពុជា នឹងកាន់តែឆាប់រហ័ស៕
Source: Kampuchea Thmey Daily
0 Comments