ភ្នំពេញ ៖ រាជរដ្ឋាភិបាល បានចំណាយថវិកាជាង២៥ពាន់លានរៀល ដល់កម្មករនិយោជិត ជាស្ត្រីសម្រាលកូនជាង៦ម៉ឺននាក់ ដើម្បីជួយគាំពារដល់សុខភាពស្ត្រី និងទារកឲ្យកាន់តែប្រសើរឡើងថែមទៀត។
លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយកបេឡាជាតិ របបសន្តិសុខសង្គមមានប្រសាសន៍ថា ចាប់ពីថ្ងៃទី១ ខែមករា ឆ្នាំ២០១៨ មកដល់ថ្ងៃទី២៥ធ្នូនេះ រាជរដ្ឋាភិបាលតាមរយៈ បេឡាជាតិរបបសន្តិសុខសង្គមបានផ្តល់ប្រាក់ឧបត្ថម្ភបន្ថែមជាង២៥ពាន់លានរៀលដល់កម្មករនិយោជិតជាស្ត្រីសម្រាលកូនជាង៦ម៉ឺន៣ពាន់នាក់ ដែលមានកូនចំនួន ជាង៦ម៉ឺន៤ពាន់នាក់។
ថ្លែងនៅក្នុងពិធីប្រគល់-ទទួលប័ណ្ណសមាជិក ប.ស.ស ជាងពាន់ប័ណ្ណ ជូនដល់មន្ត្រីរាជការ និងមន្ត្រីជាប់កិច្ចសន្យា នៃក្រសួងប្រៃសណីយ៍ និងទូរគមនាគមន៍កាលពីរសៀលថ្ងៃទី២៥ធ្នូ កន្លងទៅនេះលោក អ៊ុក សមវិទ្យា បានបន្តថា ការផ្តល់ថវិកាដល់កម្មករនិយោជិតជាស្ត្រីសម្រាលកូននេះ គឺដើម្បីចូលរួមលើកកម្ពស់សេវាគាំពារសង្គម កំណើនប្រជាជនកម្ពុជានិងជួយដោះស្រាយនូវទុក្ខលំបាករបស់បងប្អូនកម្មករនិយោជិតផងដែរ។
ជាមួយគ្នានេះដែរ លោកបានបន្ថែមទៀតថា រាជរដ្ឋាភិបាលកម្ពុជា ក៏បានសម្រេចផ្តល់ប្រាក់ឧបត្ថម្ភ ដល់កម្មការិនីក្រៅប្រព័ន្ធ ដែលទើបសម្រាលកូន ឲ្យទទួលបានរបបប្រាក់ឧបត្ថម្ភបន្ថែមផងដែរក្នុង នោះរួមមាន សម្រាលបានកូនម្នាក់ ទទួលបានថវិកា៤០ម៉ឺនរៀល សម្រាលបានកូនភ្លោះពីរបាន ៨០ម៉ឺនរៀល និងសម្រាលបានកូនភ្លោះបី ទទួលបានថវិកាចំនួន១លាន២០ម៉ឺនរៀលដូចកម្មករក្នុងប្រព័ន្ធដែរ។
លោកបានឲ្យដឹងទៀតថា មកដល់បច្ចុប្បន្ននេះ បេឡាជាតិរបបសន្តិសុខសង្គមឬប.ស.ស បានអនុវត្តការងារចុះបញ្ជីកម្មករនិយោជិតក្រៅប្រព័ន្ធដើម្បីទទួលបានសេវាមូលនិធិសមធម៌សុខាភិបាលបានចំនួន២៣ ១៨៣ សហគ្រាស និងកម្មករនិយោជិតសរុបចំនួន១៣៧.៨៤៥នាក់។
អ្នកស្រី គាត ច័ន្ទថា រស់នៅខេត្តស្វាយរៀងជាកម្មកររោងចក្រដែលទើបសម្រាលកូនថ្មីៗនេះបានថ្លែងអំណរគុណចំ ពោះរាជរដ្ឋាភិបាលដែលបានផ្តល់ប្រាក់ឧបត្ថម្ភបន្ថែមដល់អ្នកស្រី ក៏ដូចជាកម្មករជាស្ត្រីសម្រាលកូនជាច្រើនទៀត។
អ្នកស្រីបានមានប្រសាសន៍ថា ការជួយឧបត្ថម្ភថវិកាទាំងនេះ ពិតជាមានសារៈសំខាន់ខ្លាំងណាស់ក្នុងការជួយសម្រាលនូវការលំបាកបានមួយចំណែកក្នុងការដោះស្រាយជីវភាពប្រចាំថ្ងៃ ពិសេសនៅក្នុងអំឡុងពេលសម្រាលកូនតែម្ដង។
គួរបញ្ជាក់ថា ការផ្តល់ប្រាក់ឧបត្ថម្ភបន្ថែមដល់កម្មករនេះ បានអនុវត្តចាប់ពីថ្ងៃទី១ ខែមករា ឆ្នាំ២០១៨កន្លងទៅនេះ ហើយនៅពាក់កណ្ដាលឆ្នាំ២០១៩ ខាងមុខ រដ្ឋាភិបាល នឹងអនុវត្តគោលនយោបាយថ្មីមួយទៀតសម្រាប់ស្ត្រីក្រីក្រមានផ្ទៃពោះ ដែលមានប័ណ្ណក្រីក្រដោយទទួលបានការពិនិត្យផ្ទៃពោះ និងការសម្រាលកូនដោយឥតគិតថ្លៃ ព្រមទាំងទទួលបានការឧបត្ថម្ភថវិកាពីរាជរដ្ឋាភិបាលជិត២០០ដុល្លារផងដែរ៕
Source: Kampuchea Thmey Daily
0 Comments