ភ្នំពេញ ៖ បុរសជនជាតិវៀតណាម ឈ្មោះ ង្វៀង យាំងយី ហៅអាដំឡូង អាយុ៣៣ឆ្នាំ ត្រូវបានចៅក្រមសាលាដំបូងរាជធានីភ្នំពេញ លោក សេង រិទ្ធី ប្រធានក្រុមប្រឹក្សាបានសម្រេចប្រកាសសាលក្រម ផ្ដន្ទាទោសដាក់ពន្ធនាគារអស់មួយជីវិត ក្រោមការចោទប្រកាន់ពីបទ ឃាតកម្មដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈ ”តាមមាត្រា២០៥ នៃក្រមព្រហ្មទណ្ឌ ទៅលើ ក្មេងស្រីអាយុ៤ឆ្នាំ។
ជនព្រហើនកោងកាចនេះ ត្រូវបាននាំខ្លួនមកស្ដាប់ការសម្រេចរបស់តុលាការនៅចំពោះមុខ និងបើកផ្លូវឲ្យប្ដឹងឧទ្ធរណ៍តាមកំណត់ច្បាប់។
កាលពីវេលាម៉ោង៧និង២៥នាទីយប់ ថ្ងៃទី២៩ ខែឧសភា ឆ្នាំ២០១៨ ក្មេងស្រីរងគ្រោះ បានរត់ងូតទឹកភ្លៀងលេង ហើយត្រូវបានជនសង្ស័យ លួងលោមនាំយកទៅចំណុចផ្ទះចាស់ទុកចោលមួយកន្លែង តាមផ្លូវជាតិលេខ០៥ ក្នុងក្រុម៥ សង្កាត់ច្រាំងចំរេះ០២ ខណ្ឌឫស្សីកែវ ហើយអង្អែលស្ទាបប្រដាប់ភេទ និងចាប់រំលោភសេពសន្ថវៈ យកដៃខ្ទប់មាត់ជាប់ធ្វើឲ្យជនរងគ្រោះថប់ដង្ហើម រហូតដល់ស្លាប់។
បន្ទាប់មកជនដៃដល់បានយកក្មេងស្រីរងគ្រោះញាត់ចូលពាងក្នុងបន្ទប់ទឹក រួចហើយលូនតាមបង្អួចចេញទៅសម្ងំនៅមាត់ទន្លេ។
សមត្ថកិច្ចបានឲ្យដឹងថា ឪពុកម្តាយក្មេងស្រី ដោយបានបាត់កូនយូរមិនឃើញមកផ្ទះ នៅវេលាម៉ោង៨និង៣០នាទីយប់ ថ្ងៃដដែល ក្រុមគ្រួសារ បានចែកគ្នាដើរស្វែងរក ហើយបានប្រទះឃើញ កូនស្រីស្លាប់ក្នុងពាងទឹក ក្នុងសភាពអាក្រាតកាយ មានហូរឈាមផង មិនអស់ចិត្តអាណិតកូនស្រី ព្យាយាមដឹកយកទៅមន្ទីរពេទ្យបង្អែកសម្ដេចឪ តែត្រូវបានគ្រូពេទ្យប្រាប់ថា ក្មេងស្រីរងគ្រោះបានស្លាប់ហើយ។ ទាំងក្រុមគ្រួសារស្លុតចិត្ត ទើបរាយការណ៍ប្រាប់សមត្ថកិច្ចចុះពិនិត្យជាក់ស្ដែង ហើយធ្វើការស្រាវជ្រាវភ្លាមៗ រហូតដល់វេលាម៉ោង១០យប់ ថ្ងៃដដែល កម្លាំងសមត្ថកិច្ចស្វែងរកប្រទះឃើញ ជនសង្ស័យនៅមាត់ទន្លេ ទើបចាប់ខ្លួនទៅធ្វើការសាកសួរ កសាងសំណុំរឿងបញ្ជូនឡើងតុលាការឃុំខ្លួនរហូតដល់ថ្ងៃកាត់ទោស និងផ្ដន្ទាទោសនាថ្ងៃនេះ។
នៅក្នុងសវនាការ ជនដៃដល់បានសារភាពពីទង្វើលាមករបស់គេទៅលើក្មេងស្រីរងគ្រោះ ទើបតុលាការសម្រេចផ្ដន្ទាទោសដាក់ពន្ធនាគារអស់មួយជីវិត៕
Source: Kampuchea Thmey Daily
0 Comments