បាត់ដំបង ៖ រថយន្តប្រភេទដឹកទំនិញ១គ្រឿង ដែលជាកម្មសិទ្ធិរបស់ក្រុមហ៊ុនទឹកកក រតនៈ ហើយក៏ជារថយន្តដែលបង្កឲ្យមានមនុស្សស្លាប់កាលពីអំឡុងដើមខែធ្នូ ឆ្នាំ២០១៨នេះ ត្រូវបានម្ចាស់ក្រុមហ៊ុនប្រើប្រាស់ដឹកជញ្ជូនទឹកកកជាធម្មតា ហាក់ដូចជាគ្មានរឿងអ្វីកើតឡើងទាល់តែសោះ បន្ទាប់ពីរថយន្តនេះបានបើកកៀរទៅលើម៉ូតូ ព្រមទាំងបានបង្កឲ្យភាគីម៉ូតូស្លាប់រួចមក។
គួរបញ្ជាក់ដែរថា ករណីគ្រោះថ្នាក់ចរាចរណ៍នេះបានកើតឡើងកាលពីថ្ងៃទី៧ ខែធ្នូ ឆ្នាំ២០១៨ វេលាម៉ោង១១និង៤៥នាទីថ្ងៃត្រង់ លើកំណាត់ផ្លូវក្រាលកៅស៊ូមួយកន្លែង ស្ថិតក្នុងភូមិស្តី ឃុំព្រែកនរិន្ទ ស្រុកឯកភ្នំ ខេត្តបាត់ដំបង រវាងរថយន្តម៉ាក ហ៊ីយ៉ាន់ដាយ ពាក់ស្លាកលេខ បាត់ដំបង 3A-2943 ជាមួយនឹងម៉ូតូម៉ាកឌ្រីម ពណ៌ខ្មៅ ពាក់ស្លាកលេខ បាត់ដំបង 1E-6178 ដែលបើកបរដោយឈ្មោះ ឡុង បូ ភេទប្រុស អាយុ៦៧ឆ្នាំ រស់នៅក្បែរចំណុចកើតហេតុខាងលើ ទិសដៅស្របគ្នា ដោយរថយន្តបានបើកកៀរពីក្រោយបណ្តាលឲ្យភាគីម៉ូតូជ្រុលទៅមុខប្រមាណជិត១០ម៉ែត្រ ហើយក៏បានស្លាប់ក្រោយពេលបញ្ជូនដល់មន្ទីរពេទ្យ។
លោក ស៊ុយ សាវៀង អធិការស្តីទី នៃអធិការដ្ឋាន នគរបាលស្រុកឯកភ្នំ បានបញ្ជាក់ប្រាប់កម្ពុជាថ្មី ថា ភ្លាមៗក្រោយពេលកើតហេតុ កម្លាំងរបស់លោកដែលមានតែឯកសណ្ឋានស៊ីវិល បានបើកម៉ូតូតាមពីក្រោយរថយន្ត ព្រមទាំងបានថតយករូបភាព និងស្លាកលេខរថយន្តនោះផងដែរ ខណៈដែលរថយន្តនេះកំពុងប្រើប្រាស់ល្បឿនយ៉ាងលឿនដើម្បីគេចខ្លួនចេញពីកន្លែងកើតហេតុ ប៉ុន្តែទោះជាយ៉ាងនេះក្តី ក៏កម្លាំងបានតាមរហូតដល់គោលដៅ គឺរថយន្តនេះបានបើកចូលទៅក្នុងក្រុមហ៊ុនទឹកកក រតនៈ ដើម្បីលាក់ខ្លួននៅក្នុងក្រុមហ៊ុន ដោយភ្លាមៗនោះលោកក៏បានរាយការណ៍ទៅការិយាល័យចរាចរណ៍ផ្លូវគោកខេត្ត ដើម្បីឲ្យចាត់វិធានការទៅលើរថយន្តបង្កនេះ។
តាមការអះអាងពីប្រភពជាច្រើន ពិសេសគឺម៉ូយទឹកកកបានឲ្យដឹងថា រថយន្តនេះគឺជារបស់ក្រុមហ៊ុនទឹកកកដែលមានថៅកែឈ្មោះ ចិន ម៉ៅ ហើយអ្នកដែលបើកបរនៅពេលនោះ គឺជាកូនប្រុសបង្កើតរបស់ថៅកែ ដែលគេនោះមានឈ្មោះ ចឹក ម៉ឺន ហៅប៉ាវ ភេទប្រុស អាយុ៣៤ឆ្នាំ រស់នៅក្នុងក្រុមហ៊ុន ស្ថិតក្នុងភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង។
រហូតមកទល់នឹងពេលនេះ គឺប្រភពមួយចំនួនបាននិយាយថា រថយន្តបង្កគឺម្ចាស់នៅរក្សាទុកសម្រាប់ប្រើប្រាស់ជាធម្មតា ដោយគ្មានសមត្ថកិច្ចជំនាញណាមួយធ្វើការដកហូតយកមករក្សាទុកនៅការិយាល័យជាបណ្ដោះអាសន្នសោះឡើយ ខណៈដែលដំណោះស្រាយមិនទាន់ត្រូវរ៉ូវគ្នា ហើយម្ចាស់ក្រុមហ៊ុនបានបង្វែរថាអ្នកបើកបរឈ្មោះ ឌី បច្ចុប្បន្នរត់ទៅខេត្តតាកែវបាត់ទៅហើយ ដោយគេមិនដឹងជាទៅរកនៅទីណានោះទេ ព្រោះមិនស្គាល់អត្តសញ្ញាណច្បាស់។
រាល់ពាក្យសម្ដីទាំងនេះ សមត្ថកិច្ចបានរិះគន់ថា រថយន្តមានតម្លៃរាប់ម៉ឺន កោតម្ចាស់រថយន្តហ៊ានឲ្យមនុស្សដែលមិនស្គាល់អត្តសញ្ញាណទៅបើកបរ សមទេ? ឬមួយក៏គ្រាន់តែជាលេសដើម្បីបញ្ចៀសឲ្យកូនប្រុសរបស់ខ្លួនរួចផុតពីសំណាញ់ច្បាប់?
លោក គឹម គា នាយផ្នែកដោះស្រាយ គ្រោះថ្នាក់ចរាចរណ៍ នៃការិយាល័យនគរបាលចរាចរណ៍ផ្លូវគោកខេត្តបានលើកឡើងថា បញ្ហានេះ ភាគីទាំងសងខាង បានចូលខ្លួនមកចរចាគ្នាមួយលើករួចទៅហើយ ប៉ុន្តែមិនទាន់ត្រូវគ្នានៅឡើយ ដោយសារតែភាគីបង្កព្រមសងក្នុងតម្លៃថោក ហើយលោក នឹងព្យាយាមកោះហៅឲ្យជួបគ្នាជាលើកទី២ម្តងទៀត ដើម្បីបញ្ចប់រឿង ហើយឲ្យភាគីរថយន្តចូលខ្លួនទៅរំលត់បណ្ដឹងអាជ្ញាដោយខ្លួនឯងនៅតុលាការចុះ។
ប្រភពជាច្រើន បានរង់ចាំមើលថា តើភាគីរថយន្តព្រមសម្របសម្រួលនៅត្រឹមការិយាល័យ ឬក៏បន្តទៅសម្របសម្រួលនៅឯតុលាការ ដោយសារតែគេអាងខ្សែនេះ ខ្សែនោះ ចំណែករថយន្តក៏គួរតែតំណាងអយ្យការ ធ្វើការរឹបអូសយកមករក្សាទុកជាបណ្ដោះអាសន្ន ប្រសិនបើភាគីបង្កអូសបន្លាយពេលកាន់តែយូរដោយមិនព្រមរកដំណោះស្រាយទេនោះ៕
Source: Kampuchea Thmey Daily
0 Comments