យុទ្ធនាការប្រកួតបាល់ទាត់ពានរង្វាន់«យុវជនអន្តរក្រសួង-ស្ថាប័ន រដូវកាលទី៦ ឆ្នាំ២០១៨-២០១៩»ដែលរៀបចំឡើងដោយសហភាពសហព័ន្ធយុវជនយុវជនកម្ពុជា (ស.ស.យ.ក) នឹងចាប់ផ្ដើមពីថ្ងៃសៅរ៍ ទី១៥ ខែធ្នូ ឆ្នាំ២០១៨ ដល់ថ្ងៃពុធ ទី២៣ ខែកុម្ភៈ ឆ្នាំ២០១៩ ដោយមានក្រុមចូលរួមចំនួន៣១ក្រុម។
លោកសុខ សប្បាយណា ប្រធានគណៈកម្មការរៀបចំការប្រកួតបានលើកឡើងកាលពីពេលថ្មីៗក្នុងពេលចាប់ពូលជ្រើសរើសក្រុមប្រកួតថា «ពានរង្វាន់នេះ គឺកើតចេញពីទី១ការគាំទ្រពីក្រសួងស្ថាប័នទាំងអស់ទើបការប្រកួតនេះបានកើតឡើង ទី២ដោយសារតែមានការគាំទ្របច្ចេកទេសពីសហព័ន្ធកីឡាបាល់ទាត់កម្ពុជា។ រាល់អាជ្ញាកណ្ដាលដែលចូលរួមដឹកនាំការប្រកួត គឺចេញពីសហព័ន្ធដោយផ្ទាល់។ ទី៣ គឺការឧបត្ថម្ភគាំទ្រពីបណ្ដាក្រមហ៊ុននានា។ ទី៤ គឺក្រុមការងារ និងកីឡាករទាំងអស់ដែលជាមន្ត្រីរាជការ ដែលបានឆ្លៀតពេលពីការងារចូលរួមការប្រកួតនេះ។ ចំណែកទី៥ គឺការគាំទ្រពីទស្សនិកជនទាំងឡាយ ហើយការប្រកួតនៅឆ្នាំនេះ គឺផ្សាយផ្ទាល់លើ Facebook គ្រប់ប្រកួតតែម្ដង»។
លទ្ធផលការចាប់ពូលមានដូចជាពូល A មានក្រុមក្រសួងសុខាភិបាល, ក្រសួងព័ត៌មាន, អគ្គលេខាធិការដ្ឋានព្រឹទ្ធសភា និង ក្រសួងការងារ និងបណ្ដុះបណ្ដាលវិជ្ជាជីវៈ។ ពូល B មានក្រសួងសាធារណការ និងដឹកជញ្ជូន, រដ្ឋលេខាធិការដ្ឋានអាកាសចរស៊ីវិល, ក្រសួងមុខងារសាធារណៈ និងក្រសួងវប្បធម៌ និងវិចិត្រសិល្បៈ។ ពូល C អាជ្ញាធរសវនកម្មជាតិ, ក្រសួងសេដ្ឋកិច្ច និងហិរញ្ញវត្ថុ, ក្រសួងពាណិជ្ជកម្ម និងក្រសួងឧស្សាហកម្ម និងសិប្បកម្ម។ ពូល D មានក្រសួងប្រៃសណីយ៍និងទូរគមនាគមន៍, ក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច, ក្រសួងអប់រំ យុវជន និងកីឡា និងក្រសួងធម្មការ និងសាសនា។ ពូល E មានទីស្ដីការគណៈរដ្ឋមន្ត្រី, សាលារាជធានីភ្នំពេញ, ក្រសួងរ៉ែ និងថាមពល និងក្រសួងបរិស្ថាន។ ពូល F មានក្រសួងផែនការ,ក្រសួងអភិវឌ្ឍន៍ជនបទ, ក្រសួងទេសចរណ៍ និងក្រសួងសង្គមកិច្ច អតីតយុទ្ធជន និងយុវនីតិសម្បទា។
ពូល G មានធនាគារជាតិកម្ពុជា, ក្រសួងរៀបចំដែនដី នគររូបនីយកម្ម និងសំណង់ និងសាលារាជធានីភ្នំពេញ។ ពូល H មានអង្គភាពប្រឆាំងអំពើពុករលួយ (៩ធ្នូ), ក្រសួងកសិកម្ម រុក្ខាប្រមាញ់ និងនេសាទ និងក្រសួងការបរទេស និងសហប្រតិបត្តិការអន្តរជាតិ។
ពានរង្វាន់បង្កើតឡើងក្នុងគោលដៅលើកកម្ពស់ស្មារតី សាមគ្គីភាព មិត្តភាព ពង្រឹង និងពង្រីកកិច្ចសហប្រតិបត្តិការរវាងយុវជនតាមក្រសួងស្ថាប័នរដ្ឋ។ ចំណែកលទ្ធផលកាលពីឆ្នាំចាស់ឃើញថាក្រុមជើងឯកបានទៅលើក្រុមបាល់ទាត់ក្រសួងសុខាភិបាល ហើយជើងឯករងបានទៅលើក្រុមបាល់ទាត់ក្រសួងសាធារណការ និងដឹកជញ្ជូន ចំណាត់ថ្នាក់លេខ៣បានទៅលើក្រុមក្រសួងធនធានទឹក និងឧតុនិយមនិងចំណាត់លេខ៤បានទៅលើក្រុមបាល់ទាត់ក្រសួងរ៉ែនិងឧស្សាហកម្ម៕
Source: Kampuchea Thmey Daily
0 Comments