ព្រះសីហនុ ៖ គណៈកម្មាធិការគណបក្សប្រជាជនកម្ពុជាខេត្តព្រះសីហនុ បានអះអាងថា រយៈពេលថ្មីៗនេះ មានជនខិលខូចមួយចំនួន បានធ្វើសកម្មភាពចូលទៅទន្ទ្រានកាន់កាប់ដីព្រៃរបស់រដ្ឋ និងដីកម្មសិទ្ធិស្របច្បាប់របស់ឯកជន នៅតំបន់មួយចំនួនក្នុងភូមិសាស្ត្រខេត្តព្រះសីហនុ នេះបើតាមសេចក្តីប្រកាសព័ត៌មានចុះថ្ងៃទី២៤ ខែធ្នូ ឆ្នាំ២០១៨។
តាមសេចក្តីប្រកាសព័ត៌មាននោះ គណៈកម្មាធិការគណបក្សប្រជាជនកម្ពុជាខេត្តព្រះសីហនុបានបញ្ជាក់យ៉ាងនេះថា “ក្នុងរយៈពេលថ្មីៗនេះ មានជនខិលខូចមួយចំនួន បានធ្វើសកម្មភាពចូលទៅទន្ទ្រានកាន់កាប់ដីព្រៃរបស់រដ្ឋ និងដីកម្មសិទ្ធិស្របច្បាប់របស់ឯកជន នៅតំបន់មួយចំនួន ក្នុងភូមិសាស្ត្រ ក្រុង ស្រុកទាំង៤ ហើយសកម្មភាពរំលោភបំពាន ល្មើសច្បាប់ខាងលើនេះ ជនខិលខូចតែងភ្ជាប់សកម្មភាពល្មើសច្បាប់របស់ខ្លួន ទៅនឹងគណបក្សប្រជាជនកម្ពុជា ដោយបានប្រើប្រាស់ទង់របស់គណបក្សទៅដោតនៅលើដី ដែលខ្លួនបានរំលោភបំពាន ព្រមទាំងនៅលើរថយន្តធំៗមួយចំនួន”។
តាមគណៈកម្មាធិការគណបក្សប្រជាជនកម្ពុជាខេត្តព្រះសីហនុ “នេះជាការរំលោភលក្ខន្តិកៈ និងបទបញ្ជាផ្ទៃក្នុងរបស់គណបក្សប្រជាជនកម្ពុជាយ៉ាងធ្ងន់ធ្ងរ ដែលគណបក្សមិនអាចទទួលយកបានឡើយ និងសូមអំពាវនាវដល់អាជ្ញាធរគ្រប់លំដាប់ថ្នាក់ មេត្តាជួយចាត់វិធានការតាមផ្លូវច្បាប់ ឱ្យបានម៉ឺងម៉ាត់បំផុតចំពោះសកម្មភាពជនខិលខូច។ ក្នុងនាមគណបក្ស សូមប្រកាសយ៉ាងឱឡារិកថា រាល់សកម្មភាពនេះ មិនជាប់ពាក់ព័ន្ធជាមួយគណបក្សប្រជាជនកម្ពុជាឡើយ និងសូមធ្វើការថ្កោលទោសយ៉ាងម៉ឺងម៉ាត់ ចំពោះជនទាំងឡាយណា ដែលបានប្រើប្រាស់ទង់របស់គណបក្ស ដើម្បីបិទបាំងសកម្មភាពល្មើសច្បាប់របស់ខ្លួន”។
ទាក់ទងបញ្ហានេះ ការិយាល័យកម្ពុជាថ្មីមិនអាចស្វែងរកការបញ្ជាក់បន្ថែមពីអាជ្ញាធរខេត្តព្រះសីហនុបានទេ ប៉ុន្តែថ្មីៗនេះ រដ្ឋបាលខេត្តព្រះសីហនុ បានអះអាងថា ថ្មីៗនេះមានជនល្មើសមួយក្រុមបានធ្វើសកម្មភាព លួចចូលទៅកាន់កាប់ទន្ទ្រានដីព្រៃរបស់រដ្ឋអស់ជាង២០ហិកតា នៅចំណុចចន្លោះព្រំប្រទល់តំបន់ក្បាលឆាយ តំបន់ព្រែកទឹកសាប និងតំបន់សេដ្ឋកិច្ចពិសេសក្រុងព្រះសីហនុ ហើយបានសាងសង់ខ្ទមអនាធិបតេយ្យជាច្រើនខ្នង ធ្វើរបងដាំដំណាំ ដោយខ្ទមខ្លះមានមនុស្សរស់នៅ ខ្លះទៀតគ្មានមនុស្សរស់នៅ ព្រមទាំងមានសកម្មភាពទិញលក់ ដោយលួចលាក់ពីម្នាក់ទៅម្នាក់ទៀត ទាំងគ្មានលិខិតស្នាមត្រឹមត្រូវ គ្មានការទទួលស្គាល់ពីអាជ្ញាធរមូលដ្ឋាន។ ដើម្បីការពារ និងទប់ស្កាត់អំពើអនាធិបតេយ្យនេះ រដ្ឋបាលខេត្តព្រះសីហនុ បានសម្រេចចាត់ក្រុមការងារចម្រុះចុះទៅរុះរើខ្ទមទាំងនេះចេញ ព្រោះថា តំបន់នេះ មានសារៈសំខាន់ ជាប្រភពទឹកស្អាតសម្រាប់ផ្គត់ផ្គង់ក្រុងព្រះសីហនុទាំងមូល និងចាំបាច់ត្រូវដាំដើមឈើឡើងវិញ។
តាមរដ្ឋបាលខេត្តព្រះសីហនុ ដាច់ខាតត្រូវការពារតំបន់ប្រើប្រាស់ច្រើនយ៉ាង ព្រែកទឹកសាបក្បាលឆាយ និងតំបន់ទ្រនាប់ ឲ្យបានគង់វង្ស ដើម្បីទុកជាប្រយោជន៍រួម ហើយចាត់វិធានការរដ្ឋបាលយ៉ាងម៉ឺងម៉ាត់ ដើម្បីទប់ស្កាត់ក្រុមអនាធិបតេយ្យ និងវែកមុខរកមេខ្លោង ដែលញុះញង់ឲ្យមានការរំលោភបំពានទន្ទ្រានកាន់កាប់ដីរដ្ឋ និងកាប់បំផ្លាញព្រៃឈើ ដែលជាសម្បត្តិរបស់រដ្ឋ កសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់ជាធរមាន៕
Source: Kampuchea Thmey Daily
0 Comments