កីឡាករ ទៀត គឹម​ហេង ត្រូវការ​ពេល​សម្រាក​២​ខែ​ទៀត​ក្រោយ​ដក​ដែក​អប​ឆ្អឹង​ដៃ​ឆ្វេង​

ខ្សែបម្រើ​ចំណូល​ថ្មី ទៀត គឹម​ហេង សមាជិក​ក្លិប​កីឡាបាល់ទាត់​វិសាខា បាន​វះកាត់​ដក​ដែក​អប​ឆ្អឹង​ដៃ​ខាងឆ្វេង​ចេញ​ដោយ​ជោគជ័យ​ហើយ បន្ទាប់ពី​រូបគេ បាន​រង​របួស​បាក់ដៃ អំឡុងពេល​ជួយ​ក្រុម​សាលា​បាល់ទាត់​ជាតិ​បាទី យកឈ្នះ​ខេត្តកោះកុង ២-១ ក្នុង​ពានរង្វាន់​សម្ដេច​អគ្គមហាសេនាបតី​តេ​ជោ ហ៊ុន សែន លើក​ទី​១២ កាលពី​ថ្ងៃទី​១២ ខែឧសភា ឆ្នាំ​២០១៨​កន្លងទៅ​។

​យោង​តាម​សេចក្តីបញ្ជាក់​របស់​ក្លិប​មួយ​នេះ​លើក​ឡើង​ថា ​បន្ទាប់ពី​ធ្វើការ​វះកាត់​ដក​ដែក​រួច លោក​វេជ្ជបណ្ឌិត បាន​បញ្ជាក់​ថា ទៀត គឹម​ហេង មិនអាច​ត្រឡប់​ទៅ​ហ្វឹកហាត់​បាន​វិញ​ភ្លាម​ទេ គឺ​ត្រូវការ​ពេល​យ៉ាង​ហោច ២​ខែ ដើម្បី​សម្រាក និង​ធ្វើ​ឲ្យ​ឆ្អឹង ដែល​ទើប​ដក​ដែក​ចេញ ហើយ​មាន​ស្នាម​ប្រហោង​វ៉ី​ស​នោះ ដុះ​លាត់​លាស់ និង​រឹងមាំ​ឡើងវិញ​។ បច្ចុប្បន្ន​កីឡាករ​មាន​ដើមកំណើត​ពី​ខេត្ត​ព្រះសីហនុ រូប​នេះ កំពុង​សម្រាក​នៅ​គ្លីនិក​ឯកជន​មួយកន្លែង​នៅ​រាជធានី​ភ្នំពេញ​នៅឡើយ​។



​ថ្នាក់ដឹកនាំ​ក្លិប គ្រូបង្វឹក បុគ្គលិក និង​កីឡាករ ក្លិប​កីឡាបាល់ទាត់​វិសាខា​ជូនពរ​ដល់​កីឡាករ​វ័យក្មេង ទៀត គឹម​ហេង ឆាប់​ជាសះស្បើយ​ពីរ​បួស ដើម្បី​បន្ដ​ការសិក្សា និង​ការ​ហ្វឹកហាត់ សម្រាប់​ត្រៀម​ស្វាគមន៍​រដូវ​កាល​ថ្មី ឆ្នាំ​២០១៩​ខាងមុខ​។ កីឡាករ ទៀត គឹម​ហេង ស្ថិត​ក្នុង​ចំណោម​អតីត​យុវជន​បាទី​៦​រូប​ដែល​រំសាយ​កាលពី ពេល​ថ្មីៗ បាន​ចូលរួម​ជាមួយ​វិសាខា គឺ គង់ ពី​លត់​, ទូច គឹម​ឆាយ​, ឡុង ម៉េង​ហាវ​, ផុន តៃនិញ និង អាត អូន​តូច​។

មុន​ចូលរួម​ជាមួយ​ក្រុម​វិសាខា កីឡាករ ទៀត គឹម​ហេង ធ្លាប់​បង្ហាញខ្លួន​នៅក្នុង​ប្រកួត​លើ​ឆាក​អន្តរជាតិ​ជាច្រើន​ជាមួយ​ក្រុម​ជម្រើសជាតិ​យុវជន​កម្ពុជា ព្រមទាំង​ក្នុង​ពានរង្វាន់​ជើងឯក​អាស៊ី ជើង​តំបន់​អាស៊ាន និង​ពានរង្វាន់​ក្រៅផ្លូវការ​មួយចំនួន​ផង​ដែរ ជាក់ស្តែង​ដូចជា​ក្នុង​ពានរង្វាន់ AFF U16 Championship, AFC U16 Championship, AFF U17, AFF U18, និង AFF U19 Championship ឆ្នាំ​២០១៨​នៅ​ប្រទេស​ឥណ្ឌូណេស៊ី ក្នុង​ខែកក្កដា​កន្លងទៅនេះ​៕

Source: Kampuchea Thmey Daily