កណ្តាល ៖ មុខសញ្ញាចេញពីគុកពាក់ព័ន្ធបទល្មើសជួញដូរគ្រឿងញៀននិងប្រព្រឹត្តអំពើហិង្សារួមនឹងបក្ខពួកម្នាក់ទៀតបានត្រូវសមត្តកិច្ចនគរបាលស្រុកស្អាងចាប់ឃាត់ខ្លួន ខណៈធ្វើសកម្មភាពចែកចាយថ្នាំញៀននៅក្នុងមូលដ្ឋាន។
ករណីជួញដូរដោយខុសច្បាប់នូវសារធាតុញៀន(ម៉ាទឹកកក) ត្រូវបានបង្ក្រាបនេះធ្វើឡើង នៅថ្ងៃ ច័ន្ទ ១១រោច ខែកត្តិក ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី០៣ ខែធ្នូ ឆ្នាំ២០១៨ វេលាម៉ោង ១៤និង៣០នាទី នៅចំណុច ភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល។
លោកវរសេនីយ៍ឯក សេង សុជាតិ អធិការនគរបាលស្រុកស្អាង បានឲ្យដឹងថា ជនសង្ស័យ ចំនួន០២នាក់ (ឃាត់ខ្លួន) ១ / ឈ្មោះ សុខ ដា ភេទប្រុស អាយុ២៨ឆ្នាំ ជនជាតិខ្មែរ មុខរបរកសិករ ទីលំនៅបច្ចុប្បន្នភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល។ (ធ្លាប់ជាប់ពន្ធនាគារខេត្តកណ្តាល ចំនួន ០២លើក ពីបទហិង្សាដោយចេតនា ចំនួន ០១លើក រយៈពេល ០៧ខែ កាលពីឆ្នាំ២០១៣ និង បទ ជួញដូរគ្រឿងញៀន ចំនួន ០១លើក រយៈពេល ០២ឆ្នាំ កាលពីឆ្នាំ២០១៦ )។
២ / ឈ្មោះ ឌុល ម៉ារឌី ភេទ ប្រុស អាយុ ១៨ឆ្នាំ ជនជាតិ ខ្មែរ មុខរបរ សិស្ស ទីលំនៅបច្ចុប្បន្នភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល។
វត្ថុតាងចាប់យករួមមានម្សៅក្រាមពណ៌សថ្លាសង្ស័យថា ជាសារធាតុញៀន(ម៉ាទឹកកក) ចំនួន ០២កញ្ចប់តូច។ លោកអធិការបញ្ជាក់ថា នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ។
ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយ កម្លាំងប៉ុស្តិ៍នគរបាលខ្ពប បានចុះដល់ចំណុចកើតហេតុ ធ្វើការត្រួតពិនិត្យឈ្មោះ ឌុល ម៉ារឌី បានរកឃើញម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ០២កញ្ចប់តូច នៅនឹងខ្លួន រួចឃាត់ខ្លួនជនសង្ស័យ រួមនឹងវត្ថុតាង បញ្ជូនមកប៉ុស្តិ៍នគរបាលរដ្ឋបាលខ្ពប ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ឌុល ម៉ារឌី បានសារភាពថា គ្រឿងញៀន(ម៉ាទឹកកក)ចំនួន ០២កញ្ចប់តូចនេះ ឈ្មោះ សុខ ដា ភេទប្រុស អាយុ ២៨ឆ្នាំ នៅចំណុចភូមិ ខ្ពបក្រោម ឃុំខ្ពប ស្រុកស្អាង បានឲ្យខ្លួន(ម៉ារឌី)យកទៅលក់ឲ្យគេមិនស្គាល់ឈ្មោះ ចំនួន ០១កញ្ចប់តូច តម្លៃ ៥០,០០០៛ ចំណែក គ្រឿងញៀន(ម៉ាទឹកកក)ចំនួន ០១កញ្ចប់ទៀត ឈ្មោះ សុខ ដា ឲ្យខ្លួន។
បន្ទាប់មកសមត្ថកិច្ចនគរបាល បានបន្តទៅឃាត់ខ្លួន ឈ្មោះ សុខ ដា នៅចំណុចភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល។
នៅចំពោះមុខសមត្ថកិច្ចនគរបាល ឈ្មោះ សុខ ដា បានសារភាពថា ខ្លួនពិតជាបានប្រើឈ្មោះ ឌុល ម៉ារឌី យកគ្រឿងញៀន(ម៉ាទឹកកក)ទៅឲ្យគេពិតប្រាកដមែន។ ចំណែកគ្រឿងញៀន(ម៉ាទឹកកក)ចំនួន ០២កញ្ចប់តូច ខ្លួនទិញពីឈ្មោះ លីម ភេទប្រុស ៣៥ឆ្នាំ នៅភូមិ ព្រែកតាប្រាក់ ឃុំតាលន់ ស្រុកស្អាង ខេត្តកណ្តាល តម្លៃ ៤០,០០០៛ ដើម្បីយកទៅលក់បន្ត ក្នុង០១កញ្ចប់តូច ៥០,០០០៛។
បច្ចុប្បន្នជនសង្ស័យទាំងពីរនាក់ បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវិធី៕
Source: Kampuchea Thmey Daily
0 Comments