កណ្តាល ៖ ជនសង្ស័យ០២នាក់ ត្រូវបាននគរបាលស្រុកល្វាឯម ធ្វើការឃាត់ខ្លួន ពាក់ព័ន្ធករណីចែក ចាយដោយខុសច្បាប់នូវសារធាតុញៀន ដែលហេតុការណ៍នេះបានកើតឡើងថ្ងៃចន្ទ ទី៣កើត ខែមិគសិរ ឆ្នាំចសំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែធ្នូ ឆ្នាំ២០១៨ នៅចំណុចកំពង់ចំលងអរិយក្សត្រ ភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល។
ជនសង្ស័យ០២នាក់ (ឃាត់ខ្លួន) ៖
១.ឈ្មោះហែម ពៅ អាយុ៣១ឆ្នាំ ជនជាតិខ្មែរ មុខរបររត់រ៉ឺម៉កកង់បី ទីលំនៅបច្ចុប្បន្ន សង្កាត់វត្តភ្នំ ខណ្ឌដូនពេញ។
២.ឈ្មោះ ណា ទ្រី អាយុ៣៨ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នមិនពិតប្រាកដ។
រីឯវត្ថុតាងចាប់យកមាន ម្សៅក្រាមពណ៌សថ្លា សង្ស័យថាជាសារធាតុញៀន(ម៉ាទឹកកក) ចំនួន១៣កញ្ចប់(ធំមធ្យម០៧កញ្ចប់,តូច០៦កញ្ចប់, ទូរស័ព្ទ០៣គ្រឿង ម៉ាកiphone5 ០១គ្រឿង ,Nokia ០២គ្រឿង, កាំបិតចុច០១, បំពង់សម្រាប់ជក់ថ្នាំញៀន០១ ,និងកាបូបស្ពាយ០១, កញ្ចប់បារី MEVIUS ០២,ម៉ូតូរ៉ឺម៉កកង់បីចំនួន០១គ្រឿង, ប្រាក់ដុល្លារ១០ដុល្លារ និងប្រាក់រៀល២០.០០០រៀល។
នគរបាលបានបន្តថា នៅវេលាកើតហេតុខាងលើ កម្លាំងប៉ុស្តិ៍សារិកាកែវ និងប៉ុស្តិ៍អរិយក្សត្រ បានសហការជាមួយកម្លាំងជំនាញស្រុក តាមដានមុខសញ្ញានេះជាច្រើនថ្ងៃមកហើយ លុះដល់ថ្ងៃកើតហេតុ ក៏ឃើញមុខសញ្ញាឆ្លង ដ មកពីភ្នំពេញ តាមកំពង់ចំលងអរិយក្សត្រ កម្លាំងក៏បានហៅត្រួតពិនិត្យ ហើយក៏ឃើញមានថ្នាំញៀនចំនួន១៣កញ្ចប់តែម្តង។
លោកវរសេនីយ៍ឯក ហេង សុផល អធិការស្រុកល្វាឯមបានបញ្ជាក់ថា នៅចំពោះមុខសមត្ថកិច្ច ជនសង្ស័យបានសារភាពថា ថ្នាំញៀននេះ មេគាត់ជាអ្នកប្រើឲ្យយកមកឲ្យគេនៅត្រើយខាងកើតទន្លេមេគង្គ ហើយមិនស្គាល់មុខមេទេ គឺពេលត្រូវការប្រើមេតេហៅឲ្យទៅយក ឬ យកមកឲ្យដោយពាក់ម៉ាស់មិនឲ្យឃើញមុខឡើយ។
បច្ចុប្បន្ន ជនសង្ស័យ នាំមកអធិការនគរបាលស្រុកល្វាឯម ដើម្បីកសាងសំណុំរឿងបញ្ជូនខ្លួនទៅតុលាការចាត់ការតាមនីតិវិធី៕
Source: Kampuchea Thmey Daily
0 Comments