តាកែវ ៖ មន្ត្រីយោធាម្នាក់ បានរងរបួសធ្ងន់ ខណៈពេលដែលជនសង្ស័យជាមនុស្សញៀនថ្នាំម្នាក់បានយកកាំបិតមកអារ.ក ដើម្បីជម្រះគំនុំចាស់។
ហេតុការណ៍នេះបានកើតឡើងនៅថ្ងៃទី២៤ ខែធ្នូ ឆ្នាំ២០១៨ វេលាម៉ោង១៨និង២០នាទី ដែលបង្កឡើងដោយជនសង្ស័យ ឈ្មោះ សង សារ៉ាត់ ហៅឆិច ភេទប្រុស អាយុ២៤ឆ្នាំ រស់នៅភូមិល្វេថ្មី ឃុំប្រាំបីមុំ ស្រុកទ្រាំង ខេត្តតាកែវ មុខរបរកសិករ។ បើតាមប្រភពពីអ្នកជិតខាងបានបញ្ជាក់ថា ជនសង្ស័យទើបចេញពីជក់សារធាតុញៀននៅព្រៃខាងកើតផ្ទះ ក៏ដើរចូលទៅផ្ទះជនរងគ្រោះដែលមានឈ្មោះ ទូច បញ្ញា ភេទប្រុស អាយុ៥៣ឆ្នាំ រស់នៅផ្ទះជិតគ្នា មានមុខរបរមន្ត្រីយោធាសឹករងតាកែវ។
ប្រភពដដែលបន្តថា ជនរងគ្រោះកំពុងអង្គុយលើកៅអីមើលទូរទស្សន៍នៅក្នុងផ្ទះសុខៗ ស្រាប់តែជនសង្ស័យទៅផ្ទះរបស់គេយកកាំបិតកញ្ឆែតចូលទៅអារ.ក ជនរងគ្រោះឆៅៗដោយពុំដឹងខ្លួន បណ្ដាលឲ្យមានរបួសធ្ងន់ នៅត្រង់ ក ផ្នែកខាងមុខ និងរបួសស្នាមនៅប្រអប់ដៃឆ្វេង។
ឃើញដូចនោះ ឈ្មោះ ម៉ុក សោភា ជាប្រពន្ធ និងឈ្មោះ ប៉ូ ពិសី ជាកូនស្រីបានចូលទៅជួយចាប់ ជនសង្ស័យបានជាមួយនឹងវត្ថុតាងនៅខាងមុខផ្ទះ។
នៅមុខសមត្ថកិច្ចជនសង្ស័យបានបញ្ជាក់ថា ខ្លួនមានគំនុំជាមួយជនរងគ្រោះជាយូរមកហើយ ដោយជនរងគ្រោះធ្វើអំពើដាក់គេ។ ជាលទ្ធផល ជំនាញបានធ្វើតេស្តទឹកនោមឃើញមានសារធាតុញៀនក្នុងទឹកនោមជនសង្ស័យ។
បច្ចុប្បន្ន ជនសង្ស័យ ក្នុងករណីបង្កហិង្សាមានស្ថានទម្ងន់ទោសខាងលើនេះ ត្រូវបានកម្លាំងជំនាញកសាងសំណុំរឿងទៅសាលាដំបូងខេត្តតាកែវចាត់ការតាមនីតិវិធី៕
Source: Kampuchea Thmey Daily
0 Comments