កណ្តាល ៖ ជនសង្ស័យ៣នាក់ មានម្នាក់ជនជាតិឥស្លាម បានត្រូវនគរបាលស្រុកពញាឮខេត្តកណ្តាលធ្វើការឃាត់ខ្លួនករណីឆបោកពាក់ព័ន្ធយករបស់ក្លែងក្លាយ(ចង្កូមសត្វខ្លា)ថា របស់សុទ្ធលក់ឲ្យព្រះចៅអធិការវត្តក្នុងតម្លៃជិត១០០០០ដុល្លារ។
ការឃាត់ខ្លួនជនសង្ស័យធ្វើឡើងនៅថ្ងៃទី១០ ខែធ្នូ ឆ្នាំ២០១៨ វេលាម៉ោង១៤និង០០នាទី ចំណុចក្នុងវត្តពោធិកំបោ ភូមិពោធិកំបោរ ឃុំវិហារលួង ស្រុកពញាឮ ខេត្តកណ្តាល។
លោកវរសេនីយ៍ ដួង តេង អធិការនគរបាលស្រុកពញាឮបានឲ្យដឹងថា ជនរងគ្រោះ ព្រះតេជគុណព្រះនាម ស៊ុន ហុក ព្រះចៅអធិការវត្តពោធិកំបោរ ភូមិពោធិកំបោរ ឃុំវិហារលួង ស្រុកពញាឮ ខេត្តកណ្តាល។
ចំណែកឯជនសង្ស័យ០៣នាក់ ១-ឈ្មោះរ៉ូន រ៉សេត ភេទប្រុស អាយុ៤១ឆ្នាំ ជនជាតិឥស្លាម មានទីលំនៅភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញមុខរបរ មិនពិតប្រាកដ។ ២-ឈ្មោះជេត សាវឿន ភេទប្រុស អាយុ៤២ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកជីក ឃុំកោះចិន ស្រុកពញាឮ ខេត្តកណ្តាល។ ៣-ឈ្មោះហ៊ឹម ហ៊ី ភេទប្រុស អាយុ៧២ឆ្នាំ ជនជាតិខ្មែរ មុខរបរទិញអេតចាយ មានទីលំនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
វត្ថុតាងចាប់យក រួមមាន កូនកាបូបស្ពាយពណ៌ខ្មៅ០១ ប្រម៉ាត់សត្វជ្រូកស្រុក០៥ស្នែងសត្វគោ០១ ដុំថ្មពណ៌ខ្មៅ ០១ដុំ គ្រាប់អង្កាំ ០១ថង់តូច ម៉ែត្រតូច១ .ឆ្អឹងសត្វពណ៌ខ្មៅ០១.ជញ្ជីងសម្រាប់ថ្លឹងត្បូង០១ ១១.ដុំពណ៌ស មានរូបរាងដូចចង្កូមសត្វខ្លា០៣ តូច០១គូរ មធ្យម០១គូរ និងធំ០១គូរ ទូរស័ព្ទ០៦គ្រឿង -ម៉ាកXTG ០១គ្រឿង -ម៉ាក OPPO A3S ០១គ្រឿង -ម៉ាក Nokia០១គ្រឿង -ម៉ាកcamfone០១គ្រឿង -ម៉ាក samsung០១គ្រឿង -ម៉ាកHAuwai០១គ្រឿង កូនថង់តូចៗ០១ដុំ .អត្តសញ្ញាណប័ណ្ណសញ្ជាតិខ្មែរ០១សន្លឹក។
លោកអធិការបានឲ្យដឹងថា នៅថ្ងៃខែពុំចាំក្នុងឆ្នាំ២០១៧ ឈ្មោះរ៉ូន រ៉សេត បានប្រកបមុខរបរ ទិញលក់វត្ថុក្លែងក្លាយ ភូតភរគេថា ជាវត្ថុសក្ដិសិទ្ធិ មានដូចខាងក្រោម ១-ប្រម៉ាត់ជ្រូក(ជ្រូកស្រុក)០៥ទិញពីមនុស្សស្រី ម្នាក់ នៅស្រែខ្លុងខេត្ត កំពង់ស្ពឺ១តម្លៃ ១០ដុល្លា សម្រាប់ព្យាបាលអាការៈក្តៅក្នុង។
២-ឆ្អឹងក្បាលជង្គង់សត្វគោ (គោស្រុក)កែច្នៃធ្វើខ្លួនឯងដោយនិយាយភរគេថា សម្រាប់ គោរពបូជាដាក់អាសនៈ យកទៅលក់ចេញក្នុងតម្លៃ ៣០ ដុល្លារ។ -ដុំថ្មពណ៌ខ្មៅគ្មានប្រយោជន៍-ស្នែងសត្វគោជារបស់ខ្លួនឯងដើររើសតាមកន្លែងពិឃាតសត្វគោយកមកកែច្នៃសម្រាប់ទុកលក់ដោយនិយាយភរ គេថា សម្រាប់ យកទៅឧបកិច្ចគោរពបូជាលក់ចេញវិញតម្លៃ៣០ដុល្លារ។
-ដុំពណ៌ស មានរូបរាងដូចចង្កូមសត្វខ្លា០៣គូជារបស់ក្លែងក្លាយទិញមកពីឈ្មោះឃៀង ភេទប្រុស អាយុប្រហែល៣០ឆ្នាំ រស់នៅខេត្តក្រចេះទិញនៅក្នុងព្រៃពេលទៅទិញឈើធ្វើតុទិញថ្ងៃទីពុំចាំក្នុងខែវិច្ឆិកាឆ្នាំ២០១៨ តម្លៃ៣.៥០០ដុល្លារ សម្រាប់ទុកលក់ភរ បោកប្រាស់គេថា ជារបស់សុទ្ធល្អមានប្រយោជន៍ទុកការពារខ្លួនបាញ់មិនត្រូវ។
លោកអធិការបន្តថា ក្នុងខែវិច្ឆិកាក្នុងឆ្នាំ២០១៨ ឈ្មោះរ៉ូន រ៉សេតបានស្គាល់ឈ្មោះជេត សាវឿនមុខរបរគ្រូទាយនិងលក់ថ្នាំខ្មែរ នៅពេលផឹកកាហ្វេជាមួយគ្នានៅបឹងត្របែក ក្រុងភ្នំពេញ ហើយបានចាប់ផ្តើមរាប់អានស្គាល់គ្នារហូតមកនិងបានយកចង្កូមខ្លាមកប្រសិទ្ធីនៅផ្ទះឈ្មោះជេត សាវឿន ទៀតផង។
ក្នុងខែធ្នូ ឆ្នាំ២០១៨ឈ្មោះជេត សាវឿន បានទៅផឹកកាហ្វេ នៅម្តុំគល់ស្ពានព្រែកក្តាម ពេលនោះបានជួបនិងឈ្មោះអឿន ភេទប្រុស រស់នៅភូមិ ឃុំជាមួយគ្នា ហើយឈ្មោះអឿន បាននិយាយប្រាប់ខ្លួនថា មានលោក ចៅអធិការវត្តពោធិកំបោរ ចង់បានចង្កូមសត្វខ្លានិងកុយរមាស បើមានយកទៅប្រគេនលោកមើលទៅលោកចង់ជាវ ឮដូច្នេះ នៅថ្ងៃទី២៧ខែវិច្ឆិកា ឆ្នាំ២០១៨ វេលាម៉ោងប្រហែល១១និង៣០នាទីឈ្មោះជេត សាវឿន បានទៅជួបលោកចៅអធិការព្រះនាម ស៊ុន ហុកគង់នៅវត្តពោធិកំបោរ ហើយបានសួរលោកថា តើព្រះអង្គចង់បានចង្កូមសត្វខ្លាឬអី?ហើយលោកបានប្រាប់ថា ចង់បានចង្កូមសត្វខ្លាអាសុទ្ធល្អ។
បន្ទាប់មកនៅថ្ងៃទី០៧ ខែធ្នូ ឆ្នាំ២០១៨ វេលាម៉ោង៨ព្រឹកឈ្មោះជេត សាវឿនបាន ទំនាក់ទំនងទៅជួបឈ្មោះរ៉ូន រ៉សេតដោយណាត់ជួបគ្នា នៅតូបកាហ្វម្តុំក្រោយផ្សារគីឡូលេខ៧ ហើយឈ្មោះជេត សាវឿនបាននិយាយប្រាប់ឈ្មោះរ៉ូន រ៉សេតថា៖មានព្រះសង្ឃគង់នៅវត្តពោធិកំបោរ ចង់បានចង្កូមសត្វខ្លា បន្ទាប់មកឈ្មោះរ៉ូន រ៉សេតក៏បានឲ្យចង្កូមសត្វខ្លាក្លែងក្លាយ០៣គូរឲ្យទៅឈ្មោះជេត សាវឿន ដាក់លក់តម្លៃ៤.២០០ដុល្លារ រួចមកឈ្មោះ ជេត សាវឿនបានយកចង្កូមសត្វខ្លា០៣គូរជារបស់ឈ្មោះរ៉ូន រ៉សេត យកមកលក់ឲ្យ លោកចៅអធិការព្រះនាមស៊ុន ហុក តម្លៃ ប្រាក់៥.០០០ដុល្លារ ហើយឈ្មោះជេត សាវឿន បានយកប្រាក់៤.២០០ ដុល្លារទៅឲ្យឈ្មោះរ៉ូន រ៉សេត ដោយពេលនោះឈ្មោះរ៉ូន រ៉សេត បានដកប្រាក់៣០០ដុល្លារ ឲ្យទៅឈ្មោះជេត សាវឿនថ្លៃឈ្នួលយកទៅលក់។
លុះដល់ថ្ងៃ ខែ ឆ្នាំដដែលពេលល្ងាចលោកចៅអធិការ ស៊ុន ហុក បានតេទូរស័ព្ទប្រាប់ឈ្មោះជេត សាវឿនថា ចង្កូមសត្វខ្លាដែលយកមកលក់ឲ្យមុនគឺជារបស់ក្លែងក្លាយទេហើយឈ្មោះជេត សាវឿន ប្រាប់ថា ចាំយកអាសុទ្ធមកដូរវិញ ហើយឈ្មោះជេត សាវឿន ក៏តេទូរស័ព្ទទៅប្រាប់ឈ្មោះរ៉ូន រ៉សេតថា យករបស់សុទ្ធមកឲ្យលោកវិញមក ប៉ុន្តែ ដោយចាំបាត់យូរពេក មិនឃើញនៅថ្ងៃទី១០ ខែធ្នូឆ្នាំ២០១៨ លោកចៅអធិការ ស៊ុន ហុក បានមកប្តឹងសមត្ថកិច្ចនគរបាលស្រុកពញាឮ ហើយនៅថ្ងៃ ខែឆ្នាំដដែលវេលាម៉ោងកើតហេតុខាងលើឈ្មោះជេត សាវឿនបានតេទូរស័ព្ទមកលេខទូរស័ព្ទលោកចៅអធិការ ស៊ុន ហុក ដើម្បីយកចង្កូមសត្វខ្លាជារបស់ពិតមកប្រគេនលោក រួចមកក៏បានមកជួបជុំគ្នានៅក្នុងវត្តពោធិកំបោរពេលនោះឈ្មោះរ៉ូន រ៉សេត បានយកចង្កូមសត្វខ្លា០១គូរប្រាប់ថា ជារបស់ពិតទៅប្រគេនដោះដូរជាមួយរបស់មិនពិតដែលលក់ឲ្យពីមុន ក្រោយពេលលោក ចៅអធិការពិនិត្យមើលហើយថាជារបស់សុទ្ធក្នុងខណះនោះឈ្មោះរ៉ូន រ៉សេតបានឲ្យលោកចៅអធិការព្រះនាមស៊ុន ហុកថែមលុយ៥.០០០ដុល្លារ មកឲ្យខ្លួនបន្ថែមទៀតពេលនោះលោកចៅអធិការបានយល់ព្រមតាមតម្លៃខាងលើប៉ុន្តែឲ្យបាន៤.០០០ដុល្លារ សិននៅខ្វះ១.០០០ដុល្លារទៀត។ ជនសង្ស័យឈ្មោះរ៉ូន រ៉សេតបានសរសេរកិច្ចសន្យាលក់ដូរធានារបស់សុទ្ធលក់ដូរមិនកែប្រែរវាងអ្នកលក់ចង្កូមខ្លាឈ្មោះរ៉ូន រ៉សេតអ្នកទិញឈ្មោះស៊ុន ហុកគ្មានស្នាមផ្ដិតមេដៃឬចុះហត្ថលេខានៅលើកិច្ចសន្យានេះឡើយ។
លោកអធិការបញ្ជាក់ថា ខណៈធ្វើការដោះដូររបស់ជាមួយលុយកាក់សមត្ថកិច្ចជំនាញបាននាំខ្លួនជនសង្ស័យទាំង០៣នាក់ខាងលើមកកាន់អធិការដ្ឋាននគរបាលស្រុកពញាឮដើម្បីសាកសួរដើម្បីបន្តតាមនីតិវិធី៕
Source: Kampuchea Thmey Daily
0 Comments