ប្រដាល់ ៖ វង្ស ណយ អ្នកប្រដាល់កម្ពុជា នៃក្លិបកុលបុត្រគុនខ្មែរ និង អ៊ូច ធារិទ្ធ អ្នកប្រដាល់ក្លិបអាណា ចក្រគុនខ្មែរ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នា យប់ថ្ងៃអាទិត្យ ទី៣០ ខែធ្នូ ឆ្នាំ២០១៨នេះ។
សម្រាប់ការផ្គូផ្គងនេះ គូប្រកួតរបស់ វង្ស ណយ គឺជាអ្នកប្រដាល់ថៃចំណូលថ្មី ឈ្មោះតាក់ សិលា ប្រាន២៦ (TuksilaPhran26) ប្រកួតគ្នាក្នុងទម្ងន់៧១គីឡូក្រាម។ បើតាមអ្នកដឹកនាំកីឡាករថៃមកប្រកួតឲ្យដឹងថា អ្នកប្រដាល់ថៃដែលជាគូរបស់វង្ស ណយនោះ ជាអ្នកប្រដាល់ល្បីឈ្មោះមួយរូបប្រចាំនៅក្នុងប្រទេសថៃ។
តាក់ សិលា នេះ គេមានកំណត់ត្រាប្រកួតចំនួន៨៥លើក ឈ្នះ៦៨លើក ចាញ់១៥និងស្មើ០២លើក។ តាមកំនត់នេះ គឺសមត្ថភាពគេគួរសមដែរ តែបើប្រៀបធៀបជាមួយវង្ស ណយ គឺបទពិសោធន៍របស់គេ មិនដល់វង្ស ណយ នោះទេ។
វង្ស ណយ គេមានកំនត់ត្រាប្រកួតចំនួន១៩០លើក ឈ្នះ១២៦លើក ចាញ់៥៩លើក និងស្មើ៥លើក ។ ទោះជាយ៉ាងណា វង្ស ណយ មិនអាចធ្វេសប្រហែសឬមើលងាយតាក់ សិលា បានឡើយ ត្បិតថាវង្ស ណយ ឥឡូវនេះគេប្រៀបដូចជាខ្លាដែលមានចង្កូមរិលតែប៉ុណ្ណោះ មិនដូចពីមុននោះឡើយ។
អ្នកប្រដាល់មានប្រជាប្រិយភាព វង្ស ណយ គេប្រកួតជាមួយថៃចុងក្រោយនេះ វាយឈ្នះអ្នកប្រដាល់ថៃ Chhork Namchai ក្នុងទឹកទី៣ កាលពីថ្ងៃទី១៤ ខែធ្នូ ឆ្នាំ២០១៨កន្លងទៅនេះ។ ចាំមើល រវាង វង្ស ណយ និង តាក់ សិលា ប្រាន២៦ តើនរណាជាអ្នកឈ្នះនៅក្នុងការជួបប្រកួតគ្នាលើកដំបូងនេះ?។
ចំណែក អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃឈ្មោះមឿង ផេត ហ្វា គ្រុប(Muengpetch Fa Kroup) ដោយប្រកួតគ្នាក្នុងទម្ងន់៥៧គ.ក្រ។ ពីរនាក់នេះ ពុំធ្លាប់ដែលប៉ះគ្នាម្តងណានៅឡើយទេកន្លងមក។
អ៊ូច ធារិទ្ធ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេបានឆ្លងកាត់ការប្រកួតជាមួយអ្នកប្រដាល់ថៃ១០លើក និងឡាវ១លើកប៉ុណ្ណោះ។ ដូច្នេះ លើកនេះជាលើកទី១១ ដែលគេជួបប្រកួតជាមួយថៃនោះ។ កាលពីជួបប្រកួតជាមួយថៃលើកចុងក្រោយនោះ (១៨វិច្ឆិកា២០១៨) គេបានវាយស្មើជាមួយឃុម ផេត (Khum Petch)។
ធារិទ្ធ មានប្រវត្តិប្រកួតប្រមាណជា៦០លើក ក្នុងនោះវាយឈ្នះ៤២លើក ចាញ់១៣ លើក និងស្មើ ០៥លើក។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា ធារិទ្ធអាចយកឈ្នះមឿង ផេត បានឬក៏អត់នោះទេ?។
មឿង ផេត ជាជើងខ្លាំង ដែលមានស្នៀតទាត់ និងកណ្តាប់ដៃល្អ។ ដូច្នេះ អ៊ូច ធារិទ្ធប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះ មានស្នៀតប្រដាល់ល្អនិងខ្លាំង។ តែបើអាចឈ្នះបាន គឺមានតែការវាយប្តូរកែងមួយមុខគត់ ដែលប្រថុយដូរជាមួយនឹងជ័យជំនះ។ អ្នកប្រដាល់ថៃរូបនេះ មានប្រវត្តិប្រកួតចំនួន៦៩លើក ឈ្នះ៥៨លើក ចាញ់១០លើក និង ស្មើ០១លើក។ ចាំមើល រវាងអ៊ូច ធារិទ្ធ និង មឿង ផេត តើនរណាជាអ្នកឈ្នះនៅក្នុងការជួបគ្នានេះ?។
ដោយឡែក សម្រាប់ការប្រកួតរវាងអ្នកប្រដាល់រួមជាតិវិញ សេក គឹមរួនត្រូវគេផ្គូឲ្យជួបប្រកួតជាមួយ ភុំ សារ៉ាយ អ្នកប្រដាល់ជើងចាស់សមាគមកីឡាប្រដាល់ក្រសួងការពារជាតិ ដោយជួបគ្នាក្នុងទម្ងន់៦៣,៥០០គីឡូក្រាម។
រវាង សេក គឹមរួន និង ភុំ សារ៉ាយ នេះ ពួកគេទាំងពីរមិនធ្លាប់ជួបគ្នាទេកន្លងមក។ ចាំមើល តើ សេក គឹមរួន ឬ ភុំ សារ៉ាយ ដែលជាអ្នកឈ្នះក្នុងការជួបប្រកួតលើកនេះ?៕
Source: Kampuchea Thmey Daily
0 Comments