ប្រដាល់ ៖ នៅសង្វៀនទូរទស្សន៍SEATV នាយប់ថ្ងៃសៅរ៍ ទី២៩ ខែធ្នូ ឆ្នាំ២០១៨នេះ អ្នកប្រដាល់កម្ពុជា ពុទ្ធ ឆាយរិទ្ធី ក្លិបពុទ្ធសេរីវង្សកីឡា នឹងជួបសាកកណ្ដាប់ដៃជាមួយអ្នកប្រដាល់ថៃ Khla KhunSeuk ហើយអ្នកប្រដាល់កម្ពុជា ធា នុរាជ ក្លិបមកុដរាជសីហ៍ នឹងជួបសាកកណ្ដាប់ដៃជាមួយអ្នកប្រដាល់អ៊ីរ៉ង់ Farhad Mandomi។
ពុទ្ធ ឆាយរិទ្ធី និង Khla KhunSeuk ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។ តែយ៉ាងណាឆាយរិទ្ធី និង Khla KhunSeuk នេះ គេមានសមត្ថភាពប្រហាក់ប្រហែលគ្នា ហើយមាឌ និងកម្ពស់ ក៏ប្រហាក់ប្រហែលគ្នាដែរ គឺឆាយរិទ្ធី ១,៧១ម៉ែត្រ ឯ Khla Khun Seuk ១,៧០ម៉ែត្រ តែថៃចាញ់បទពិសោធន៍ និងកំណត់ត្រា ឆាយ រិទ្ធី បន្តិច។
Khla KhunSeuk គេមានកំណត់ត្រាប្រកួតចំនួនតែ១០១លើកប៉ុណ្ណោះ ក្នុងនោះឈ្នះ៩០លើក ចាញ់១០លើក និងស្មើ០១លើក។ ចំណែកពុទ្ធ ឆាយរិទ្ធី គេមានកំណត់ត្រាប្រកួតចំនួន១១៣លើក គេវាយឈ្នះ៨៧លើក ចាញ់២៤លើក ស្មើ០២លើក។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះក៏មិនអាចអ្នកណាមើលស្រាលអ្នកណាបានដែរ។
លោក ណន រិទ្ធ ដែលជាគ្រូបង្វឹករបស់ពុទ្ធ ឆាយរិទ្ធី បាននិយាយថា លោកបារម្ភចំពោះការប្រកួតនេះ ព្រោះថា Khla KhunSeuk គេមានកណ្ដាប់ដៃរហ័ស ឯរឿងទាត់ ជង្គង់ កែង មិនជាបញ្ហាអ្វីឡើយ ។ ប៉ុន្តែយ៉ាងណា លោកណន រិទ្ធ បានបញ្ជាក់ថា ពុទ្ធ ឆាយរិទ្ធី គេកំពុងប្រឹងហាត់ ដើម្បីយកឈ្នះលើ Khla KhunSeuk ឲ្យបាន។
សូមបញ្ជាក់ថា Khla KhunSeukនេះ គេធ្លាប់មកប្រកួតនៅកម្ពុជាច្រើនលើកហើយកន្លងមក។ គេជាជើងខ្លាំងមួយរូប ដែលមិនអាចមើលស្រាលបាននោះឡើយ។
ចំពោះអ្នកប្រដាល់ ធា នុរាជ ក្លិបមកុដរាជសីហ៍ ដែលត្រូវបានគេផ្តល់ឱកាសឲ្យឡើងប្រកួតជាមួយបរទេស ដោយត្រូវជួបប្រកួតជាមួយអ្នកប្រដាល់ជនជាតិអ៊ីរ៉ង់ Farhad Mandomi។ ពួកគេទាំងពីរនាក់នេះ នឹងប្រកួតគ្នាក្នុងទម្ងន់៦៧គីឡូក្រាម។
ធា នុរាជ ជាអ្នកប្រដាល់ដែលមានចាប់អារម្មណ៍ច្រើនណាស់ដែរ តែគេជាអ្នកប្រដាល់ចាស់វស្សាម្នាក់ ដែលមានស្នៀតប្រដាល់ល្អ ពិសេសស្នៀតទាត់ផ្កាប់ចាន ហើយសំខាន់ជាងនេះទៀត គឺមានចិត្តប្រដាល់ធំ និង ស៊ូចំពោះការប្រកួត។
Farhad Mandomi ជាជើងថ្មី ដែលហ្វឹកហាត់នៅប្រទេសថៃ។ គេមានកំណត់ត្រាប្រកួតចំនួន១១ លើក ឈ្នះ០៩លើក និងចាញ់០២លើក។ បើតាមអ្នកផ្គូផ្គងឲ្យដឹង នោះថា Farhad Mandomi គេមានស្នៀតជើងទាត់ល្អ ហើយកណ្តាប់ដៃរបស់គេក៏ល្អដែរ។
ចាំមើល ធា នុរាជ អាចយកឈ្នះ Farhad Mandomi បានឬអត់? សម្រាប់ការប្រកួតជាមួយបរទេសលើកដំបូងនេះ។ យ៉ាងណា ធា នុរាជ ចាញ់ត្រង់កម្ពស់ហើយ ព្រោះ Farhad Mandomi មានកម្ពស់១,៧០ម៉ែត្រ ខណៈខ្លួនគេ១,៦៥ម៉ែត្រនោះ។
ទោះជាយ៉ាងណា ធា នុរាជ បានអះអាងថា គេមិនខ្លាចញញើតឡើយ សម្រាប់អ្នកប្រដាល់អ៊ីរ៉ង់ដែលមានកម្ពស់ខ្ពស់ជាងនេះ។ ធា នុរាជ ជាអ្នកប្រដាល់ដែលមានចិត្តប្រដាល់ធំ ហ៊ានវាយប្ដូរជាមួយគូប្រកួតដោយមិនញញើតនោះឡើយ ដើម្បីប្ដូរយកជ័យជម្នះនៅពេលដែលស្ថានភាពប្រកួតរបស់គេមានសភាពចាញ់ប្រៀបគូប្រកួត គឺគេប្ដូរហើយ៕
Source: Kampuchea Thmey Daily
0 Comments