ប្រដាល់ ៖ ចាន់ សំអាត អ្នកប្រដាល់ជើងខ្លាំងកម្ពុជា នៃក្លិបអប់រំកាយកីឡាស្រុកអន្លង់វែង នឹងត្រូវជួប ប្រកួតជាមួយអ្នកប្រដាល់ថៃឈ្មោះ Supper នៅក្នុងកម្មវិធីប្រដាល់TV5 Knock Out Series by K. Cem ent នៅសង្វៀន TV5 ដែលរៀបចំនៅទីលានពហុកីឡដ្ឋានជាតិមរតកតេជោកន្លែងប្រារព្ធពិធីសម្ពោធវិមានឈ្នះឈ្នះ និងឆ្លងឆ្នាំសាកល នាយប់ថ្ងៃច័ន្ទ ទី៣១ ខែធ្នូ ឆ្នាំ២០១៨នេះ។
អ្នកប្រដាល់ថៃ Supper ដែលមកជួប ចាន់ សំអាត នេះ គេជាអ្នកប្រដាល់ថៃចំណូលថ្មី មិនធ្លាប់មកប្រកួតនៅកម្ពុជានោះទេកន្លងមក។ ពួកគេប្រកួតគ្នាក្នុងប្រភេទទម្ងន់៦០គីឡូក្រាម។
តាម លោក សេង កដិកា អ្នកចាត់ចែងក្នុងកម្មវិធីប្រដាល់ប៉ុស្តិ៍លេខ៥ឲ្យដឹងថា Supper នេះ នៅស្រុកថៃគេជាជើងខ្លាំងមួយដែរ នៅក្នុងប្រភេទទម្ងន់៦០គ.ក្រនេះ។ អ្នកប្រដាល់ថៃនេះ មានកំណត់ត្រាប្រកួតចំនួន៦៤លើក ឈ្នះ៥៣លើក និង ចាញ់១១លើក មិនដែលស្មើ។
ទោះជាយ៉ាងណា អ្នកប្រដាល់ថៃរូបនេះ មិនប្រាកដថាអាចឈ្នះ ចាន់ សំអាត នោះឡើយ។ ចាន់ សំអាត ជើងខ្លាំងរបស់កម្ពុជានេះ ធ្លាប់បំបាក់ថៃអស់ប្រមាណជាង១០នាក់មកហើយ ពិសេសនោះគេធ្លាប់ឈ្នះជើងចាស់ថៃថែមទៀត។ សំអាត គេមានកណ្ដាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ កែង ក៏ល្អថែមទៀត។
ទោះជាបែបនេះក្តី មិនទាន់ហ៊ានសន្និដ្ឋានថា ចាន់ សំអាត ជួបសំណាងល្អនៅក្នុងការប្រកួតជាអ្នកប្រដាល់ថៃ Supper នេះឡើយ?។ សំអាត គេប្រកួតជាមួយថៃលើកចុងក្រោយនៅសង្វៀន SEATV ដោយវាយស្មើជាមួយ Phat Senchhai។
ចាន់ សំអាត មានប្រវត្តិប្រកួតចំនួន៧៣លើក ឈ្នះ៥៥លើក ចាញ់១៥លើក ស្មើ០៣លើក។ ចាំមើល តើចាន់ សំអាត អាចយកឈ្នះអ្នកប្រដាល់ថៃ Supper បានឬអត់ នៅក្នុងការជួបប្រកួតគ្នាលើកទី១ នេះ?៕
Source: Kampuchea Thmey Daily
0 Comments