ការប្រកួតតេក្វាន់ដូសម្រាប់កីឡាករវ័យក្មេង ដែលគេប្រសិទ្ធិនាមថា“Hope 2023”បានបញ្ចប់ហើយ កាលពីល្ងាចថ្ងៃទី២៦ធ្នូ នៅមជ្ឈមណ្ឌលតេក្វាន់ដូប៊ូយ៉ុង ក្នុងពហុកីឡដ្ឋានជាតិអូឡាំពិក។
នេះជាព្រឹត្តិការណ៍ប្រកួតមួយ ដើម្បីស្វែងរកកីឡាករវ័យក្មេង មកធ្វើជាកីឡាករថ្នាល ត្រៀមស៊ីហ្គេមឆ្នាំ២០២៣ ក្នុងខណៈដែលកម្ពុជាធ្វើជាម្ចាស់ផ្ទះនៃការប្រកួតនោះ។
លោកគង់ សក្ខិដា អគ្គលេខាធិការខេមរសហព័ន្ធតេក្វាន់ដូWT (World Taekwondo) ដែលជាតេក្វាន់ដូស្ទីលរបស់ប្រទេសកូរ៉េខាងត្បូង បានប្រាប់ឲ្យដឹងថា ការប្រកួត“Hope 2023” សម្រាប់ឆ្នាំ២០១៨នេះ បានចាប់ផ្តើមការប្រកួតជាផ្លូវការពីថ្ងៃទី២៣ ខែវិច្ឆិកា រហូតដល់ថ្ងៃទី២៦ ខែធ្នូ។
វិញ្ញាសាចំនួន១៩ ដែលក្នុងនោះ វិញ្ញាសាប្រយុទ្ធមានចំនួន១៤ និងមេគុនចំនួន៥ត្រូវបានដាក់ឲ្យប្រកួត ហើយ មានក្លិបចូលរួមចំនួន១៨ ដែលនៅភ្នំពេញមាន១៧ក្លិប និងខេត្តបាត់ដំបងចំនួន១ ក្លិប ព្រមទាំងមានកីឡាករ-កីឡាការិនីចំនួន៨១នាក់ រួមមានកីឡាការិនី២៣នាក់។ អ្នកដែលអាចចូលរួមប្រកួតបានត្រូវមានអាយុក្រោម១៥ឆ្នាំ និង ១៦ឆ្នាំឡើង។
លោក Choi Yong Sok គ្រូបង្វឹកជម្រើសជាតិកម្ពុជា និងជាប្រធានគណៈកម្មការប្រកួតបាននិយាយថា ការប្រកួតនេះ អនុញ្ញាតឲ្យតែកីឡាករ-កីឡាការិនីដែលមានកម្រិតខ្សែក្រវាត់ក្រហមឡើងទៅប៉ុណ្នោះដែលអាចចូលរួមបាន ហើយកីឡាករ-កីឡាការិនីម្នាក់ មានសិទ្ធិប្រកួតបានតែវិញ្ញាសាមួយប៉ុណ្ណោះ ។
លោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានចាត់ទុកថា នេះជាការត្រៀមខ្លួនដ៏សំខាន់មួយ ក្នុងការជ្រើសរើសកីឡាករ-កីឡាការិនី ឆ្នើម ចូលក្រុមជម្រើសជាតិ សម្រាប់ព្រឹត្តិការណ៍ការប្រកួតកីឡា SEA GAMES លើកទី៣២ឆ្នាំ២០២៣ ដែលកម្ពុជាធ្វើម្ចាស់ផ្ទះរៀបចំការប្រកួតនេះ៕
Source: Kampuchea Thmey Daily
0 Comments