ភ្នំពេញ ៖ ជនជាតិចិនម្នាក់ ត្រូវបានកម្លាំងនគរបាលប៉ុស្តិ៍រដ្ឋបាលជ័យជំនះឃាត់ខ្លួន ខណៈដែលបុរសជនជាតិរូបនោះ បានបង្ហោះ(Drone)បំពាក់កាមេរ៉ាថតយកទិដ្ឋភាពនានានៅតំបន់ ហាមឃាត់ខាងមុខព្រះបរមរាជវាំងនៅថ្ងៃអង្គារ០៤កើត ខែមិគសិរ ឆ្នាំ ចរ សំរឹទ្ធិស័ក ព.ស ២៥៦២ ត្រូវនឹងថ្ងៃ១១ ខែធ្នូ ឆ្នាំ២០១៨ វេលាម៉ោង១៦និង៣០នាទីល្ងាច។
មន្ត្រីប៉ុស្តិ៍នគរបាលជ័យជំនះបានឲ្យដឹងថា ជនបរទេស ដែលត្រូវឃាត់ខ្លួននោះឈ្មោះ ភេទប្រុស ZHANG CHUI FENGអាយុ២៩ឆ្នាំ ជនជាតិ ចិនមុខរបរទេសចរណ៍ កាន់លិខិតឆ្លងដែនលេខ E48750427ស្នាក់នៅ សណ្ឋាគារ Viva Boutique Hotel& Pub បន្ទប់លេខ503 ដែល មានទីតាំងផ្ទះលេខ២1Eo ផ្លូវលេខ104 ភូមិ8 សង្កាត់ សង្កាត់វត្តភ្នំខណ្ឌដូនពេញពីបទ បង្ហោះឧបករណ៍ដ្រូន បំពាក់ដោយកាមេរ៉ាថតរូប បញ្ជាដោយតេឡេកុម្ម៉ង់(DRONE) នៅចំណុចមុខព្រះបរមរាជវាំងផ្លូវសុធារស ភូមិ ១សង្កាត់ជ័យជំនះ ខណ្ឌដូនពេញ ដោយគ្មានការអនុញ្ញាត។
សមត្ថកិច្ចបានបន្តទៀតថា វត្ថុតាងចាប់យកមាន(DRONE) ដែលបំពាក់ដោយកាមេរ៉ាថតរូបបញ្ជាដោយតេឡេកុម្មង់ម៉ាកD J I ពណ៌ស លាយខ្មៅចំនួន០១គ្រឿង (ផលិតនៅប្រទេសចិន) ថ្មចំនួន ០១ដុំ តេឡេបញ្ជាចំនួន ០១ ពណ៌ខ្មៅទូរស័ព្ទដៃចំនួន ០១គ្រឿងម៉ាកHUAWEI ពណ៌ខ្មៅ និងកាបូបស្ពាយក្រោយខ្នងពណ៌ខ្មៅចំនួន០១។
បច្ចុប្បន្នជនជាតិចិនរូបនោះ ត្រូវបានកម្លាំងខណ្ឌនិងប៉ុស្តិ៍បានប្រគល់ជូនទៅកម្លាំង នៃនាយកដ្ឋានប្រឆាំងបទល្មើសបច្ចេកវិទ្យា ដើម្បីចាត់ការតាម នីតិវិធីច្បាប់៕
Source: Kampuchea Thmey Daily
0 Comments