កីឡាការិនីSerena Williams នឹងមិនពិភាក្សានោះទេ ចំពោះឧប្បត្តិហេតុដែលបានកើតឡើងអំឡុងការប្រកួតវគ្គផ្តាច់ព្រ័ត្រ US Open ពេលដែលនាងចាញ់កីឡាការិនីជប៉ុនNaomi Osaka កាលពីខែកញ្ញាកន្លងទៅ ហើយនាងនឹងបន្តសម្លឹង មើលការងារខ្ពស់ជាងនេះទៀត។ នេះបើយោងតាមសម្តីរបស់កីឡាការិនីអាមេរិកម្នាកក់នេះ បាននិយាយប្រាប់ក្រុមអ្នកសារព័ត៌មាននៅក្នុងទីក្រុង Abu Dhabi ប្រទេសអារ៉ាប់រួម កាលពីថ្ងៃព្រហស្បតិ៍។
នៅការបង្ហាញខ្លួនលើកទីលានជាលើកដំបូង ចាប់តាំងពីមានវគ្គផ្តាច់ព្រ័ត្រជម្លោះរបស់នាង នៅទីក្រុងញូវយ៉ក កីឡាការិនីWilliamsបានចាញ់ការប្រកួតពិព័រណ៍ ជាមួយបងស្រីVenus ក្នុងលទ្ធផលពិន្ទុ4-6, 6-3, 10-8 នៅរដ្ឋធានីរបស់ប្រទេសអារ៉ាប់រួមមួយនេះ ហើយបច្ចុប្បន្ន នាងនឹងបន្តដំណើរត្រង់ទៅកាន់ទីក្រុង Perth របស់អូស្ត្រាលី ដើម្បីចូលរួមការប្រកួត Hopman Cup ជាមួយនឹងមិត្តរួមជាតិFrances Tiafoe។
នៅពេលសួរថាតើ ការប្រកួតវគ្គផ្តាច់ព្រ័ត្រUS Open គឺជាប្រធានបទមួយដែលនាងចង់ចៀសវាង ខណៈពេលដែលរដូវកាលថ្មីចាប់ផ្តើមឬ កីឡាការិនីSerena បាននិយាយថា នាងមិនចង់ចៀសវាងអ្វីមួយនោះទេ។ នាងគ្រាន់តែមិនចង់និយាយពីរឿងដែលបានកើតឡើងប៉ុណ្ណោះ។ នាងនិយាយពីវា អ្នករាល់គ្នានិយាយពីវាអស់រយៈពេលជាច្រើនខែមកហើយ ហើយវាគឺរឿងល្អបំផុតដែលត្រូវគិតពីការងារធំ ហើយល្អប្រសើរជាងនេះ។
ជាការពិតណាស់ថា ការងារធំ និងល្អប្រសើរជាងនេះ គឺស្ថិតនៅក្នុងចិត្តរបស់កីឡាការិនីSerena ខណៈពេលដែលនាងបាននិយាយទទួលស្គាល់កាលតាំងពីថ្ងៃដែលនាងឈ្នះជើងGrand Slam ២៤លើកមកម្ល៉េះ ហើយវានឹងក្លាយជាគោលដៅបន្ទាប់របស់នាងនៅក្នុងឆ្នាំ២០១៩នេះ៕
Source: Kampuchea Thmey Daily
0 Comments