ក្រុមមិនដែលចាញ់ Juventusរកបានជ័យជំនះ១៤លើកពី១៥ប្រកួតនៅក្របខណ្ឌ Serie Aក្នុងរដូវកាលនេះ ពេលដែលការតែតបាល់បញ្ចូលទីក្នុងតង់ទី២របស់កីឡាករ Mario Mandzukic ធ្វើឲ្យពួកគេរកបានជ័យជំនះ១-០ លើក្រុម Inter Milan នៅការប្រកួត Derby D'Italia កាលពីថ្ងៃសុក្រ ក្រោយក្រុមភ្ញៀវ បានខ្ជះខ្ជាយឱកាសជាច្រើនលើកច្រើនសារួចមកនោះ។
កីឡាករសញ្ជាតិក្រូអាតម្នាក់នេះ បានទម្លុះភាពទាល់ច្រកនៅនាទី៦៦ ជាមួយនឹងគ្រាប់បាល់ទី៧របស់គាត់ក្នុងយុទ្ធនាការនេះ ក្រោយក្រុម Juventus រស់រានពីការដាក់សម្ពាធខ្លាំងពីក្រុមភ្ញៀវ ពេលដែលកីឡាករ Roberto Gagliardini ស៊ុតបាល់ប៉ះចំបង្គោលទី។
ជ័យជំនះនេះដែរ បានធ្វើឲ្យក្រុម Juventus រកបាន៤៣ពិន្ទុក្នុងចំណោម៤៥ពិន្ទុឈរនៅលើកំពូលតារាង ពោលគឺមាន១១ពិន្ទុនាំមុខក្រុមលេខ២ Napoli ដែលនឹងបើកទ្វារស្វាគមន៍ក្រុម Frosinoneនៅថ្ងៃសៅរ៍ ខណៈពេលពួកគេតាមប្រមាញ់ជើងឯកជាលើកទី៨ជាប់ៗគ្នារបស់ពួកគេ។
បច្ចុប្បន្ន ក្រុម Inter Milanឈរនៅលេខរៀងទី៣ ក្រោយទទួលរងបរាជ័យជាលើកទី៤ផ្ទួនៗគ្នារបស់ពួកគេក្នុងរដូវកាលនេះ ហើយនិងមាន១៤ពិន្ទុតាមពីក្រោយក្រុម Juventus។
លោក Massimiliano Allegri គ្រូបង្វឹករបស់ក្រុម Juventusបាននិយាយថា កីឡាករ Mandzukic គឺជាខ្សែប្រយុទ្ធដ៏អស្ចារ្យម្នាក់។ គាត់ស្ថិតនៅក្នុងចំណោមកីឡាករដែលមានសមត្ថភាពបំផុតរបស់ក្រុមលោក ហើយគាត់តែងតែធ្វើឲ្យមានភាពខុសប្លែក រាល់ពេលដែលពួកយើងគ្មានសំណាង៕
Source: Kampuchea Thmey Daily
0 Comments