បាត់ដំបង ៖ ឃាតកសម្លាប់សត្វឆ្កែ និងឆ្មា មិនស្គាល់មុខ បានចូលលួចម៉ូតូ០១គ្រឿង បានសម្រេចក្រោយពីសត្វឆ្កែ៦ក្បាល និងឆ្មា១ក្បាល ត្រូវថ្នាំបំពុលងាប់អស់ ហើយ បានគេចខ្លួនដោយសុវត្ថិភាព។ បច្ចុប្បន្ន សមត្ថកិច្ចកំពុងបើកការស្រាវជ្រាវ។
របាយការណ៍ពីសមត្ថកិច្ចបានឲ្យដឹងថា ករណីដាក់ថ្នាំបំពុលឆ្កែលួចយកម៉ូតូខាងលើ បានកើតឡើងកាលពីវេលាម៉ោងប្រមាណ២និង០០នាទីទៀបភ្លឺ ឈានចូលថ្ងៃទី០៧ ខែធ្នូ ឆ្នាំ២០១៨ ត្រង់ចំណុចខ្វាវ ស្ថិតក្នុងក្រុម១៣ ភូមិមុខរាហ៍២ ឃុំមុខរាហ៍ ស្រុករុក្ខគិរី ខេត្តបាត់ដំបង បង្កដោយជនមិនស្គាល់មុខ បណ្ដាលឲ្យងាប់សត្វឆ្កែ៦ក្បាល ឆ្មា១ក្បាល និងលួចយកម៉ូតូ០១គ្រឿង ម៉ាក(វេវអាល់ហ្វា) ពណ៌ខ្មៅ ស៊េរីឆ្នាំ២០១១ ស្លាកលេខបាត់ដំបង១W.២៨៤៩ ជារបស់ជនរងគ្រោះ ឈ្មោះ អៀម ប៉ិល ភេទប្រុស អាយុ៥៣ឆ្នាំ រស់នៅចំណុចខាងលើ។
តាមសម្ដីម្ចាស់ផ្ទះបានឲ្យដឹងថា មុនកើតហេតុ ពួកគាត់បានឮសំឡេងឆ្កែព្រូសដូចយប់សព្វមួយដងដែរ តែពួកគាត់មិនចាប់អារម្មណ៍ រហូតដល់វេលាកើតហេតុ និងជាពេលដែលពួកគាត់កំពុងតែដេកស្កប់ស្កល់ផងនោះ ក៏បានឮសំឡេងឆ្កែព្រូសតគ្នាម្ដងទៀត តែពួកគាត់ស្មានតែគ្មានរឿងអ្វី ស្របពេលដែលបាត់សំឡេងឆ្កែព្រូសផងនោះ ក៏ពួកគាត់លង់លក់ទៅវិញ លុះដល់ព្រលឹមឡើង ស្រាប់តែបាត់ម៉ូតូ ក៏នាំគ្នាឆោឡោ ហើយរកមើលសត្វឆ្កែ ក៏ស្រាប់តែឃើញដេកងាប់ទាំង៦ក្បាល រួមនឹងសត្វឆ្មា១ក្បាលទៀត ទើបដឹងថាចោរចូលលួច ក៏នាំគ្នាមកប្តឹងសមត្ថកិច្ចទាំងព្រឹកតែម្ដង។
បច្ចុប្បន្ន សមត្ថកិច្ច កំពុងតែបើកការស្រាវជ្រាវ ដើម្បីកំណត់អត្តសញ្ញាណ ឈានដល់ការឃាត់ខ្លួនយកមកទទួលទោសចំពោះមុខច្បាប់៕
Source: Kampuchea Thmey Daily
0 Comments