ក្រុមមាន់ខ្នាយមាស Spursបានតាមពីក្រោយគេនៅការប្រកួត Champions League កាលពីថ្ងៃអង្គារ ខណៈដែលគ្រាប់បាល់ស្មើរបស់កីឡាករ Lucas Moura បានធ្វើឲ្យពួកគេរកបានលទ្ធផលស្មើ១-១ជាមួយក្រុម Barcelona ហើយនិងបានធ្វើឲ្យពួកគេឡើងទៅវគ្គ១៦ចុងក្រោយនៃការប្រកួតក្លិបកំពូលអឺរ៉ុបមួយនេះ។
កីឡាករ Lionel Messi ត្រូវបានលប់ឈ្មោះចេញពីក្រុម Barcelonaសម្រាប់ការប្រកួតនៅក្នុងទឹកដី Camp Nouនេះ ប៉ុន្តែគ្រាប់បាល់នាំមុខដ៏គួរភ្ញាក់ផ្អើលរបស់កីឡាករ Ousmane Dembele ប្រុងធ្វើឲ្យក្រុម Spurs ត្រូវហាលអាវទៅហើយ រហូតដល់មានគ្រាប់បាល់ស្មើរបស់កីឡាករ Moura។
ក្រុមរបស់លោក Mauricio Pochettino ត្រឹមតែអាចផ្គូផ្គងនឹងលទ្ធផលរបស់ក្រុម Inter Milanនៅក្នុងទឹកដីខ្លួនឯងជាមួយក្រុម PSV Eindhoven ក្នុងពូល Bប៉ុណ្ណោះ ពេលដែលក្រុមអ៊ីតាលីមួយនេះ សម្រេចបានលទ្ធផលស្មើ១-១។
វាបានធ្វើឲ្យក្លាយជាការប្រកួតដ៏ព្រលឹងចុងសក់មួយ ពេលដែលក្រុម Spursព្យាយាមអស់ពីកម្លាំងកាយចិត្តរបស់ពួកគេ ដើម្បីតាមស្មើ ឬសម្រេចបានជ័យជំនះនោះ។
នៅពេលដែលអាជ្ញាកណ្តាលផ្លុំកញ្ចែបញ្ចប់ការប្រកួត ក្រុមកីឡាកររបស់ពួកគេ បានបង្ហាញពីអារម្មណ៍រំភើបសប្បាយរីករាយជាទីបំផុត ដែលពួកគេមិននឹកស្មានថា ពួកគេអាចមានឱកាសឡើងដល់វគ្គ១៦ក្រុមចុងក្រោយ Champions Leagueបែបនេះទាល់តែសោះ។
លោក Pochettino បាននិយាយថា គ្មាននរណាម្នាក់ជឿជាក់លើពួកយើងថា នឹងអាចធ្វើបាននោះទេ។ អ្នករាល់គ្នា បាននិយាយរួចទៅហើយថា វាគឺជាបេសកកម្មមួយ ដែលមិនអាចទៅរួច ប៉ុន្តែយើងនៅទីនេះ ហើយទីបញ្ចប់ក៏អាចសម្រេចវាបានពិនមែន៕
Source: Kampuchea Thmey Daily
0 Comments