ភ្នំពេញ ៖ មន្ត្រីសមាគមរោងចក្រកាត់ដេរនៅកម្ពុជាបានអះអាងថា ការទាមទារបើកប្រាក់បំណាច់អតីតភាពការងារជាកញ្ចប់របស់កម្មករនិយោជិត គឺមិនអាចទៅរួចទេ ដោយសារតែថៅកែរោងចក្រសហគ្រាសនានា មិនមានលទ្ធភាពទូទាត់ប្រាក់ដ៏ច្រើនសន្ធឹកសន្ធាប់ទាំងនោះបានឡើយ។
លោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរនៅកម្ពុជាបានមានប្រសាសន៍កាលពីព្រឹកថ្ងៃទី៣១ ខែធ្នូ ឆ្នាំ២០១៨ ឲ្យដឹងថា «ការតវ៉ារបស់កម្មករនិយោជិត ស្នើសុំបើកប្រាក់បំណាច់អតីតភាពការងារជាកញ្ចប់នេះ គឺផ្ទុយនឹងច្បាប់ដែលបានកំណត់ឲ្យថៅកែរោងចក្រសហគ្រាសត្រូវបើកជាដំណាក់កាលៗដោយសារថៅកែមិនមានលទ្ធភាពទូទាត់ប្រាក់ដ៏ច្រើនសន្ធឹកសន្ធាប់ទាំងនោះជួនកម្មករនិយោជិតជាកញ្ចប់បានទេ»។
លោកបានលើកឧទាហរណ៍មកបញ្ជាក់ថា តាមច្បាប់កំណត់កន្លងមក កម្មករត្រូវទទួលបានប្រាក់បំណាច់អតីតភាពការងារតាមដំណាក់កាលដូចជា បើកម្មករធ្វើការបាន៥ទៅ១០ឆ្នាំ ត្រូវបើកក្នុងរយៈពេល២ឆ្នាំម្តង ព្រោះបើឲ្យថៅកែបើកទាំងអស់នោះ គឺជាបន្ទុកដ៏ធ្ងន់ធ្ងររបស់រោងចក្រនីមួយៗហើយប្រហែលជាថៅកែនឹងមិនអាចរកប្រាក់មកបើកឲ្យកម្មករនិយោជិតបានឡើយ។
ការលើកឡងរបស់តំណាងសមាគមរោងចក្រកាត់ដេរនេះបានធ្វើឡើងបន្ទាប់ពីមានកម្មករនិយោជិតនៅតាមរោងចក្រមួយចំនួនបានធ្វើការតវ៉ាទាមទារឲ្យថៅកែរោងចក្របើកប្រាក់បំណាច់អតីតភាពការងារជាកញ្ចប់តែម្តងដោយមិនចាំបាច់បើកជាដំណាក់កាលៗនោះទេ។
ការដែលកម្មករនិយោជិតទាមទារបើកប្រាក់បំណាច់អតីតភាពការងារនេះដោយសារតែមានកម្មករខ្លះត្រូវការថវិកាដើម្បីយកទៅដោះស្រាយជីវភាពប្រចាំថ្ងៃ ឬយកទៅសងបំណុលគេ ព្រោះថាបើថ្ងៃក្រោយពួកគាត់សុំឈប់ដោយខ្លួនឯងដោយប្រការណាមួយនោះ គឺមិនទទួលបានប្រាក់អតីតភាពការងារនេះឡើយ។
ចំណែកក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្តីជួនដំណឹងមួយកាលពីថ្ងៃទី២៨ខែធ្នូ ឆ្នាំ២០១៨ កន្លងទៅនេះ ដោយបានស្នើដល់សមាគម សហជីព និងកម្មករនិយោជិតត្រូវរក្សាភាពនឹងនក្នុងចិត្តចៀសវាងការចាញ់បោកបញ្ឆោតពីសំណាក់ជនខិលខូចមួយចំនួនដែលមានបំណងញុះញង់បង្កអស្ថិរភាពនកក្នុងសហគ្រាសគ្រឹះស្ថានដែលអាចបំផ្លាញការងារអចិន្ត្រៃយ៍របស់បងប្អូនកម្មករនិយោជិត។
សេចក្ដីជូនដំណឹងដដែលបានបន្តថា រាជរដ្ឋាភិបាល នឹងតម្រូវឲ្យសហគ្រាស គ្រឹះស្ថាននានាធ្វើការទូទាត់ប្រាក់បំណាច់អតីតភាពការងារជូនកម្មករនិយោជិតដែលបាននិងកំពុងប្រើប្រាស់កិច្ចសន្យាការងារមានថិរវេលាមិនកំណត់ ឬកិច្ចសន្យារយៈពេលវែង២ដង ក្នុងមួយឆ្នាំ គឺក្នុងខែមិថុនា និងខែធ្នូដោយនឹងត្រូវចាប់ផ្ដើមអនុវត្តចាប់ពីខែមិថុនាឆ្នាំ២០១៩តទៅ។
ចំណែកការបើករំលឹកប្រាក់បំណាច់អតីតភាពការងាររបស់កម្មករនិយោជិតដែលមានមុនឆ្នាំ២០១៩ក្រសួងកំពុងធ្វើការពិភាក្សាជាមួយវិស័យឯកជនដើម្បីកំណត់កាលវិភាគជាក់លាក់មួយក្នុងការតម្រូវឲ្យសហគ្រាសគ្រឹះស្ថាន អនុវត្តកាតព្វកិច្ចលើការបើករំលឹកប្រាក់បំណាច់អតីតភាពការងារនេះ។
យ៉ាងណាក៏ដោយ ក្នុងអំឡុងពេល នៃការទូទាត់បើករំលឹកប្រាក់បំណាច់អតីតភាពការងារនេះ ក្រសួងសូមធានាចំពោះអត្ថប្រយោជន៍ស្របច្បាប់នានា ដែលបងប្អូនកម្មករនិយោជិតមាន ហើយដែលសហគ្រាស គ្រឹះស្ថានក្ស័យធន ឬបិទទ្វារណាមួយមិនទាន់បានទូទាត់ជូនបងប្អូនកម្មករនិយោជិត។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានថ្លែងកាលពីព្រឹកថ្ងៃទី៣១ធ្នូឲ្យដឹងដែរថា កម្មករដែលធ្វើការតវ៉ា គឺទាមទារឲ្យថៅកែរោចក្របើកប្រាក់អតីតភាពការងារជាកញ្ចប់ដោយមិនចាំចាច់ធ្វើការបើករំលួសនោះទេ ព្រោះថាមានកម្មករខ្លះធ្វើការពី៥ទៅ១០ឆ្នាំមកហើយ គាត់ចង់សម្រាក ឬខ្លះទៀតមានជំងឺមិនអាចធ្វើការបន្តទៀតបានជាដើម។
លោកទទួលស្គាល់ថា ការតវ៉ារបស់កម្មករ គឺមិនស្របទៅតាមច្បាប់ដែរដោយសារថា ការបើកប្រាក់អតីតភាពការងារដល់កម្មករទាំងអស់បានលុះត្រាតែកម្មករនោះ ត្រូវបានថៅកែរោងចក្របញ្ឈប់តែបើឈប់ដោយខ្លួនឯងនោះនឹងមិនបានទទួលប្រាក់បំណាច់អតីតភាពការងារដែរ។
ទោះជាយ៉ាងណាក៏ដោយ លោក ប៉ាវ ស៊ីណា បានស្នើឲ្យក្រសួងការងារ និងបណ្ដុះបណ្ដាលវិជ្ជាជីវៈគួរតែបើកកិច្ចប្រជុំបន្ទាន់មួយដោយមានភាគីពាក់ព័ន្ធចូលរួមដើម្បីពិភាក្សារកដំណោះស្រាយជូនដល់កម្មករ៕
Source: Kampuchea Thmey Daily
0 Comments