អនុសំវច្ឆរៈមហាសន្និបាតមន្ត្រីសង្ឃទូទាំងខេត្តលើកទី២៧ឆ្នាំនេះ ផ្តោតសំខាន់ធ្វើការបង្ក្រាបសង្ឃក្លែងក្លាយដើរបិណ្ឌបាតតាមផ្សារ អធិករណ៍ក្នុងវត្ត

បន្ទាយមានជ័យ ៖ លោកយិន យឿន ប្រធានមន្ទីរធម្មការ និងសាសនា ខេត្តបន្ទាយមានជ័យ បានថ្លែងក្នុងពិធីអនុសំវច្ឆរៈមហាសន្និបាតមន្ត្រីសង្ឃទូទាំងខេត្តលើកទី២៧ថា ឆ្នាំនេះ សំវច្ឆរៈមហាសន្និបាតមន្ត្រីសង្ឃផ្ដោតសំខាន់ធ្វើការបង្ក្រាបសង្ឃក្លែងក្លាយដើរត្រាច់ចរបិណ្ឌបាតតាមផ្សារ អធិករណ៍ក្នុងវត្តនិងបញ្ហាគ្រឿងញៀននៅតាមវត្តអារាមទាំងអស់នៅក្នុងខេត្តបន្ទាយមានជ័យ។

ពិធីនេះ ធ្វើឡើងនៅក្នុងវត្តស្វាយថ្មី ស្ថិតក្នុងភូមិ កំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ នៅព្រឹកថ្ងៃទី៣០ និងថ្ងៃទី៣១ ខែមករា ឆ្នាំ២០១៩ ដោយមានការចូលរួមពីលោកជំទាវប៉ុកណាឌី អភិបាលរងខេត្តបន្ទាយមានជ័យ ព្រះឧត្តមសីលញ្ញាណ ធុលសុធា រាជាគណៈថ្នាក់កិត្តិយស និងជាព្រះមេគណខេត្តបន្ទាយមានជ័យ ព្រះវរមុនី វ៉ាចិន្តា ព្រះរាជគណៈថ្នាក់កិត្តិយស ព្រះអង្គណាប់ម៉ឺនព្រះវិន័យធម៌គណខេត្តនិងព្រះបាឡាត់គណខេត្តបន្ទាយមានជ័យ ព្រះសង្ឃនិងពុទ្ធបរិស័ទជាច្រើនរយនាក់។

លោកយិនយឿនបានមានប្រសាសន៍ថា អនុសំវច្ឆរៈមហាសន្និបាតមន្ត្រីសង្ឃទូទាំងបន្ទាយមានជ័យលើកទី២៧នេះគឺដើម្បីពិនិត្យនិងពិចារណាពិភាក្សាគ្នារិះរកយុទ្ធវិធីថ្មីៗដើម្បីធ្វើឲ្យព្រះពុទ្ធសាសនាកាន់តែរីកចម្រើនឡើងថែមទៀត ដូចជាការផ្សព្វផ្សាយគោលការណ៍គ្រឹះព្រះធម៌ ព្រះពុទ្ធសាសនា សីល សមាធិ ភាវនា អប់រំមហាជន ប្រជាជនឲ្យបានយល់ដឹងនិងជ្រួតជ្រាបអំពីអ្វីដែលល្អនិងអ្វីដែលអាក្រក់ វៀរចាកអំពើបាបនិងអំពើអបាយមុខផ្សេងៗជាដើម ស្គាល់គុណស្គាល់ទោសនិងធ្វើឲ្យពិភពលោកទាំងមូលមានសុខសន្តិភាព។

លោកយិនយឿនបានបន្តទៀតថា គ្មានសេចក្តីសុខណាប្រសើរជាងសេចក្តីស្ងប់ឡើយនិងម្យ៉ាងទៀតដើម្បីពង្រឹងរចនាសម្ព័ន្ធដឹកនាំសង្ឃការងារគ្រប់គ្រងវត្តអារាម ការងារពុទ្ធិកសិក្សា ការងារផ្សព្វផ្សាយព្រះធម៌វិន័យជាដើម។ ក្នុងនោះដែរលោកជំទាវប៉ុកណាឌីក៏បានមានប្រសាសន៍ដែរថា ការបើកអនុសំវច្ឆរៈមហាសន្និបាតមន្ត្រីសង្ឃទូទាំងខេត្តបន្ទាយមានជ័យនេះគឺដើម្បីបូកសរុបនិងពិនិត្យមើលលទ្ធផលនៃការអនុវត្តសង្ឃប្រកាសកន្លងទៅនិងពិភាក្សានិងពិគ្រោះយោបល់ការងារព្រះពុទ្ធសាសនានៅពេលបច្ចុប្បន្ននេះដើម្បីលើកកម្ពស់កិត្យានុភាពព្រះពុទ្ធសាសនា ដែលជាសេនាធិការរបស់រដ្ឋដើម្បីពង្រឹង តួនាទីភារកិច្ចរបស់ព្រះសង្ឃនិងវត្តអារាមទៀតផង។

លោកជំទាវប៉ុកណាឌីបានបញ្ជាក់ទៀតថា រយៈពេលកន្លងមកនៅតាមវត្តអារាមនានាតែងតែមានអធិករណ៍កើតឡើងជាញឹកញាប់ដើម្បីរំងាប់អធិករណ៍នេះ លោកជំទាវបានឲ្យមន្ទីរធម្មការចុះបើកវគ្គបណ្ដុះបណ្ដាលគ្រប់វត្តអារាមនានាក្នុងបណ្តាស្រុកទូទាំងខេត្តឲ្យចេះចុះបញ្ជីគណនេយ្យឲ្យបានច្បាស់លាស់ទើបទទួលបានលទ្ធផលល្អប្រសើរ។ ក្នុងនោះលោកជំទាវប៉ុកណាឌីបានឲ្យប្រធានមន្ទីរធម្មការ សហការជាមួយកម្លាំងសមត្ថកិច្ចក្នុងខេត្តចុះបង្ក្រាបសង្ឃក្លែងក្លាយ ដែលដើរត្រាច់ចរបិណ្ឌបាតតាមផ្សារនិងតាមផ្លូវសាធារណៈយកមកផ្តន្ទាទោសទៅតាមផ្លូវច្បាប់ ព្រោះវាធ្វើឲ្យខូចសាសនាខ្លាំងណាស់ពិសេសមុននឹងទទួលយកព្រះសង្ឃបួសនោះត្រូវធ្វើការពិនិត្យទឹកនោម។

លោកជំទាវក៏បានធ្វើការផ្ដាំផ្ញើ និងក្រើនរំលឹកដល់ព្រះសង្ឃលោក អាចារ្យ គណៈកម្មកាវត្តទាំងអស់មិនត្រូវឲ្យមានអធិករណ៍ក្នុងវត្តជាដាច់ខាត បច្ច័យដែលបានមកពីពុទ្ធបរិស័ទចូលក្នុងពិធីបុណ្យទានផ្សេងៗនោះ ត្រូវប្រើក្នុងចំណូលចំណាយឲ្យមានខ្ទង់ត្រឹមត្រូវ ហើយមិនត្រូវបែកបាក់សាមគ្គីគ្នានៅក្នុងវត្ត មិនត្រូវប្រកាន់បក្សពួកនេះបក្សពួកនោះជាដាច់ខាតដើម្បីប្រែក្លាយទីវត្តអារាមជាកន្លែងថ្នាលបណ្ដុះបណ្ដាលមនុស្សជំនាន់ក្រោយឲ្យក្លាយទៅជាធនធានមនុស្សដែលជាតិត្រូវការចាំបាច់៕