រដ្ឋាភិបាលកោះតៃវ៉ាន់បាននិយាយថា សហរដ្ឋអាមេរិកបានបញ្ជូននាវាចម្បាំងពីរគ្រឿងឆ្លងកាត់តាមច្រកសមុទ្រតៃវ៉ាន់កាលពីថ្ងៃព្រហស្បតិ៍ក្នុងប្រតិបត្តិការលើកដំបូងនៅឆ្នាំនេះ ខណៈដែលខ្លួនបង្កើនភាពញឹកញាប់នៃការឆ្លងកាត់តាមរយៈផ្លូវទឹកជាយុទ្ធសាស្ត្រនេះចំពេលមានភាពតានតឹងជាមួយប្រទេសចិន។
ការធ្វើដំណើរនេះបានបង្កឲ្យមានភាពតានតឹងកាន់តែខ្លាំងបន្ថែមទៀតជាមួយប្រទេសចិនដែលចាត់ទុកកោះតៃវ៉ាន់ថាជារបស់ខ្លួនហើយមិនបានច្រានចោលគំនិតប្រើកម្លាំងដើម្បីនាំកោះដែលគ្រប់គ្រងដោយខ្លួនឯងមួយនេះឲ្យមកស្ថិតក្រោមការគ្រប់គ្រងរបស់ខ្លួននោះទេ។
ក្រសួងការពារជាតិរបស់កោះតៃវ៉ាន់បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា នាវាទាំងពីរគ្រឿងនេះកំពុងធ្វើដំណើរទៅទិសដៅខាងកើតនិងថា ការធ្វើដំណើររបស់ពួកគេគឺអនុលោមតាមបទប្បញ្ញត្តិ។
ក្រសួងបាននិយាយថា កោះតៃវ៉ាន់បានឃ្លាំមើលយ៉ាងដិតដល់ចំពោះប្រតិបត្តិការនេះដើម្បីធានាសន្តិសុខនៃសមុទ្រនិងស្ថេរភាពក្នុងតំបន់។
ទង្វើនេះទំនងជាត្រូវបានគេមើលឃើញនៅកោះតៃវ៉ាន់ថាជាសញ្ញាមួយនៃការគាំទ្រពីរដ្ឋាភិបាលរបស់លោកប្រធានាធិបតីអាមេរិក Donald Trump ចំពេលមានជម្លោះរវាងទីក្រុងតៃប៉ិនិងប៉េកាំង។
ប្រទេសចិនបានបង្កើនសម្ពាធលើកោះតៃវ៉ាន់ចាប់តាំងពីលោកស្រីប្រធានាធិបតី Tsai Ing-wen មកពីគណបក្សគាំទ្រឯករាជ្យបានឡើងកាន់តំណែងក្នុងឆ្នាំ២០១៦។ ចិនបានបញ្ជូនយន្តហោះ និងនាវាយោធាទៅជុំវិញកោះនេះនៅក្នុងការធ្វើសមយុទ្ធកាលពីប៉ុន្មានឆ្នាំកន្លងមកនេះ។
ក្រសួងការពារជាតិតៃវ៉ាន់បាននិយាយក្នុងសេចក្តីថ្លែងការណ៍ដាច់ដោយឡែកមួយថា កាលពីថ្ងៃព្រហស្បតិ៍ ក្រុងប៉េកាំងបានបញ្ជូនយន្តហោះទម្លាក់គ្រាប់បែកនិងយន្តហោះជាច្រើនគ្រឿងតាមរយៈច្រក Bashi ដែលបែងចែកកោះតៃវ៉ាន់ពីប្រទេសហ្វីលីពីន។
ក្រសួងបាននិយាយថា ប្រតិបត្ដិការចិនស្រដៀងគ្នានេះត្រូវបានធ្វើឡើងកាលពីថ្ងៃអង្គារហើយប្រតិបត្តិការទាំងពីរនេះត្រូវបានគេតាមដានយ៉ាងយកចិត្តទុកដាក់៕ REUTERS
Source: Kampuchea Thmey Daily
0 Comments