ក្លិបបាល់ទាត់ព្រះខ័នរាជស្វាយរៀងសមាជិកពានរង្វាន់លីគកំពូលកម្ពុជា(Metfone Cambodian League) នៅព្រឹកថ្ងៃច័ន្ទ ទី២១ ខែមករា សប្ដាហ៍នេះ បានធ្វើដំណើរទៅកាន់ទឹកដីអង្គរ នៃខេត្តសៀមរាប ដើម្បីទៅបោះជំរំហ្វឹកហាត់នៅទីនោះរយៈពេល១សប្ដាហ៍ ត្រៀមស្វាគមន៍រដូវកាលថ្មីឆ្នាំ២០១៩ខាងមុខ។
យោងតាមប្រភពមកពីក្លិបដែលមានមូលដ្ឋាននៅខេត្តស្វាយរៀងបានបញ្ជាក់ថា ក្រៅពីហ្វឹកហាត់នៅលើទឹកដីខេត្តសៀមរាប ក្រុមនេះក៏មានណាត់ក្រុមម្ចាស់ស្រុកចំនួន៣ក្រុម ដើម្បីប្រកួតមិត្តភាពកម្តៅសាច់ដែរ ដោយក្នុងនោះបានប្រកួតចាញ់ក្រុមអង្គរថាយហ្គឺរ ២ទល់០ និងស្មើគ្នាជាមួយក្រុមពាក់កណ្ដាលអាជីពសៀមរាបអែហ្វស៊ី ០ទល់០ផងដែរ។ តាមគ្រោង បន្ទាប់ក្រុមនេះនឹងត្រូវប៉ះក្រុមសូលទីឡូអង្គរ វិញម្តង។
សូមបញ្ជាក់ថាក្រុមដែលជាសមាជិកពានរង្វាន់លីគកំពូលកម្ពុជា បានចាប់ផ្តើមប្រមូលផ្ដុំកីឡាករឡើងវិញក្រោយសម្រាកមួយរយៈ បន្ទាប់ពីបញ្ចប់បេសកកម្មក្នុងរដូវកាលចាស់ ហើយនេះជាដំណាក់កាលដែលក្រុមទាំងអស់ ត្រូវតាមដាននិងត្រួតពិនិត្យសមត្ថភាពកូនក្រុមរបស់ខ្លួនឡើងវិញទាំងសមាជិកចាស់ និងសមាជិកថ្មីៗទាំងខ្មែរ និងបរទេស ឬកីឡាករខ្លះ ទើបតែជ្រើសរើសចេញពីក្រុមថ្នាលយុវជន ព្រមទាំងកីឡាករមួយចំនួនដែលកំពុងស្ថិតក្នុងដំណាក់កាលធ្វើតេស្តសាកល្បងមុននឹងសម្រេចបញ្ចូលពួកគេទៅក្នុងក្រុមឈុតធំ ឬយ៉ាងណានោះ មុនរដូវកាលឆ្នាំ២០១៩ មកដល់។
ក្រុមព្រះខ័នរាជស្វាយរៀង ដែលដឹកនាំដោយ លោក Conor Nestor ទទួលចំណាត់ថ្នាក់មិនសូវបានល្អនោះទេ ប្រចាំរដូវកាលនេះទាំងក្នុងពានរង្វាន់លីគកំពូលកម្ពុជា និងពានរង្វាន់ សម្ដេចតេជោ ហ៊ុន សែន បើធៀបនឹងលទ្ធផលតាមឆ្នាំកន្លងមក។ ចំពោះលីគកំពូលកម្ពុជាវិញ ក្រោយប្រកួតបាន២២លើក ឈ្នះបាន១០លើក ហើយស្មើគ្នាបាន៣លើក និងបរាជ័យរហូតដល់៩លើក ឈរចំណាត់ថ្នាក់លេខ៦បណ្ដោះអាសន្ន ក្នុងចំណោមក្លិបជាសមាជិកទាំង១២។ ចំណែកពានរង្វាន់ សម្ដេចតេជោ ហ៊ុន សែន វិញ ក្រុមនេះ បានធ្លាក់ត្រឹមវគ្គ៨ក្រុម ចុងក្រោយ បន្ទាប់ពីចាញ់អង្គរថាយហ្គឺរ៕
Source: Kampuchea Thmey Daily
0 Comments