ឧត្តរមានជ័យ ៖ នៅវេលាម៉ោង០៣និង៣០នាទីល្ងាច ថ្ងៃទី៧ ខែមករា ឆ្នាំ២០១៩ មានប្រជាពលរដ្ឋ ឈ្មោះ ជុំ វណ្ណះ ភេទប្រុស អាយុ២៨ឆ្នាំ រស់នៅភូមិរំចេកខាងលិច ឃុំអន្លង់វែង ស្រុកអន្លង់វែង ខេត្តឧត្តរមានជ័យ បានដើរទៅរកកាប់អុសនៅខាងកើតភូមិរំចេកខាងលិច ចម្ងាយ១៥០០ម៉ែត្រ ក៏ប្រទះឃើញសាកសពជនរងគ្រោះ ឈ្មោះ បូ ជាតិ ភេទប្រុស អាយុ៣៧ឆ្នាំ រស់នៅភូមិរំចេក ឃុំអន្លង់វែង ស្រុកអន្លង់វែង ដេកស្លាប់នៅក្នុងព្រៃ។
តាមការបំភ្លឺរបស់ ឈ្មោះ រ៉េន ហឿន អាយុ៣៥ឆ្នាំ ត្រូវជាប្រពន្ធបានប្រាប់សមត្ថកិច្ចឲ្យដឹងថា ជនរងគ្រោះត្រូវជាប្តី បានផឹកស្រាស្រវឹងដើរបាត់ពីផ្ទះ កាលពីថ្ងៃទី០៤ ខែមករា ឆ្នាំ២០១៩ នៅពេលនោះប្រពន្ធតាមរកដែរ តែរកមិនឃើញសោះ មិនដឹងថា ដើរទៅទីណានោះទេ រហូតមកដល់ពេលនេះទើបដឹងថា ប្រជាពលរដ្ឋនៅក្នុងភូមិទៅរកកាប់អុសបានប្រទះឃើញដេកស្លាប់នៅក្នុងព្រៃ។
មន្ត្រីអាវុធហត្ថស្រុកបានឲ្យដឹងថា តាមការពិនិត្យ និងធ្វើកោសលវិច័យរបស់គ្រូពេទ្យ និងការពិនិត្យរបស់សមត្ថកិច្ចជំនាញ សាកសពជនរងគ្រោះស្លាប់ដោយខ្យល់គរ។ បច្ចុប្បន្ន សពជនរងគ្រោះ ត្រូវបានប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕
Source: Kampuchea Thmey Daily
0 Comments