ប្រធានាធិបតីអាមេរិកលោក Donald Trump កាលពីថ្ងៃចន្ទ បានស្វះស្វែងបញ្ចប់នូវភាពភ័យខ្លាចអំពីការដកខ្លួនរបស់អាមេរិកចេញពីប្រទេសស៊ីរី ដោយនិយាយថា ការប្រយុទ្ធប្រឆាំងនឹងក្រុមរដ្ឋឥស្លាមមិនទាន់ចប់ទេហើយការដកខ្លួននេះនឹងត្រូវបានធ្វើឡើងដោយប្រុងប្រយ័ត្ន។
លោកTrump បានបង្ហោះ Twitter ថា “យើងនឹងចាកចេញក្នុងល្បឿនដ៏ត្រឹមត្រូវមួយស្របពេលជាមួយនឹងការបន្តប្រយុទ្ធប្រឆាំងក្រុមISIS និងធ្វើអ្វីៗគ្រប់យ៉ាងដែលប្រុងប្រយ័ត្ននិងចាំបាច់”។
ប្រធានាធិបតីរូបនេះបានស្ថិតនៅក្រោមសម្ពាធទាំងក្នុងនិងក្រៅប្រទេសបន្ទាប់ពីសេចក្តីថ្លែងការណ៍មុនៗដែលបង្ហាញថា គាត់ចាត់ទុកថាក្រុម IS បានចាញ់ហើយនិងថា គាត់ចង់ឲ្យកងទ័ពអាមេរិកចាកចេញពីប្រទេសស៊ីរីក្នុងពេលឆាប់ៗនេះ។
សេចក្តីថ្លែងការណ៍ថ្មីរបស់លោក Trump នេះបានកើតឡើងបន្ទាប់ពីដំណើរទស្សនកិច្ចមួយដោយទីប្រឹក្សាសន្តិសុខជាតិរបស់លោកគឺលោក John Bolton ទៅកាន់ប្រទេសអ៊ីស្រាអែលដែលនៅទីនោះ លោកបានប្រាប់លោកនាយករដ្ឋមន្ត្រី Benjamin Netanyahu កាលពីថ្ងៃអាទិត្យថា ការដកទ័ពនឹងមិនកើតឡើងមុនពេលក្រុមISIS ត្រូវកម្ចាត់ហើយមិនអាចរស់ឡើងវិញបានទេ។
ស្របពេលជាមួយគ្នានោះដែរ នៅក្នុងការហៅទូរស័ព្ទមួយ លោក Trump និងប្រធានាធិបតីបារាំងលោក Emmanuel Macron បាននិយាយគ្នាអំពីការប្តេជ្ញាចិត្តរបស់សហរដ្ឋអាមេរិកនិងបារាំងចំពោះការបំផ្លាញក្រុមISIS ព្រមទាំងផែនការសម្រាប់ការដកកងទ័ពអាមេរិកចេញពីប្រទេសស៊ីរីដោយចេតនានិងសម្របសម្រួល។ ហើយមេដឹកនាំទាំងពីរបានបញ្ជាក់សាជាថ្មីថា ការប្រើប្រាស់អាវុធគីមីបន្ថែមទៀតនៅក្នុងប្រទេសស៊ីរីគឺមិនត្រូវអត់ឱនឲ្យទេ។
ចំណែករដ្ឋមន្ត្រីក្រសួងការរបទេសលោក Mike Pompeoបានថ្លែងថា លោកបាននិយាយជាមួយមន្ត្រីបារាំង។ លោកបានប្រាប់ក្រុមអ្នកយកព័ត៌មាននៅពេលលោកធ្វើដំណើរទៅកាន់តំបន់មជ្ឈឹមបូព៌ាថា “យើងនឹងធ្វើឲ្យប្រាកដថា យើងនឹងដោះស្រាយកង្វល់ដែលពួកគេមាន។ មនុស្សគ្រប់គ្នាយល់អំពីអ្វីដែលសហរដ្ឋអាមេរិកកំពុងធ្វើ”។
គួរបញ្ជាក់ថា បច្ចុប្បន្ននេះកងកម្លាំងអាមេរិកប្រហែល២,០០០នាក់កំពុងស្ថិតនៅក្នុងប្រទេសស៊ីរីសម្រាប់សង្គ្រាមស៊ីវិលដ៏ស្មុគស្មាញមួយ។ ទាហានអាមេរិកភាគច្រើននៅទីនោះបានហ្វឹកហ្វឺនដល់កងកម្លាំងក្នុងមូលដ្ឋានដែលកំពុងប្រយុទ្ធប្រឆាំងនឹងក្រុម IS៕AFP
Source: Kampuchea Thmey Daily
0 Comments