មុខសញ្ញាជួញដូរសារធាតុញៀនម្នាក់ ត្រូវសមត្ថកិច្ចឃាត់ខ្លួន និងម្នាក់ទៀតរត់គេចខ្លួន

ប៉ៃលិន ៖ កាលពីវេលាម៉ោង១៣និង០០នាទី ថ្ងៃអាទិត្យ ៧រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែមករា ឆ្នាំ២០១៩ សមត្ថកិច្ចជំនាញ នៃអធិការដ្ឋាននគរបាលក្រុងប៉ៃលិន បានធ្វើការឆែកឆេរលើជនសង្ស័យ ដែលជាមុខសញ្ញាជួញដូរគ្រឿងញៀនម្នាក់ ដោយរឹបអូសថ្នាំញៀនប្រភេទម៉ាទឹកកក០២កញ្ចប់តូច ដែលជាប់នឹងខ្លួនជនសង្ស័យ ព្រមទាំងបន្តឆែកឆេរផ្ទះជនសង្ស័យម្នាក់ ក៏ប្រទះឃើញម្សៅក្រាម ពណ៌ស សង្ស័យជាទឹកកកចំនួន៣កញ្ចប់ ប៉ុន្តែម្ចាស់ផ្ទះបានរត់គេចខ្លួនបាត់។

ហេតុការណ៍ខាងលើនេះ បានកើតឡើងនៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន និងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។

លោកវរសេនីយ៍ត្រី យ៉ៃម សារិទ្ធ អធិការនគរបាលក្រុងប៉ៃលិន បានឲ្យដឹងថា នៅថ្ងៃកើតហេតុខាងលើ លោកបានដឹកនាំកម្លាំងសមត្ថកិច្ចនគរបាល ផ្នែកប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិន ធ្វើការឆែកឆេរលើជនសង្ស័យ ឈ្មោះ វុន សំអូន ភេទប្រុស អាយុ២៩ឆ្នាំ សញ្ជាតិខ្មែរ មុខរបរមិនពិតប្រាកដ មានទីលំនៅស្ថិតនៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ក៏ប្រទះឃើញមានម្សៅក្រាមពណ៌ស ដែលសង្ស័យជាម៉ាទឹកកកចំនួន២កញ្ចប់តូច ព្រមទាំងធ្វើការឃាត់ខ្លួនភ្លាមៗ។

លោកអធិការរូបនេះបន្តថា ក្រោយពីធ្វើការឃាត់ខ្លួន និងសាកសួរ សមត្ថកិច្ចជំនាញ ក៏ក្តាប់បាននូវមុខសញ្ញាម្នាក់ ដែលនៅភូមិផ្សេងគ្នា ពេលនោះលោកក៏សុំគោលការណ៍ ពីលោកព្រះរាជអាជ្ញា និងឈានដល់ការចុះទៅឆែកឆេរ ទៅដល់លំនៅស្ថាន របស់មុខសញ្ញាម្នាក់ ឈ្មោះ សាន់ ស៊ាក ភេទស្រី មានទីលំនៅបច្ចុប្បន្នភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ប៉ុន្តែម្ចាស់ផ្ទះបានរត់គេចខ្លួនបាត់ ជាលទ្ធផល នៃការឆែកឆេរ គឺប្រទះឃើញមានម្សៅក្រាមពណ៌ស ដែលសង្ស័យជាម៉ាទឹកកកចំនួន៣កញ្ចប់ នៅខាងក្រោយ និងក្នុងរបងផ្ទះជនសង្ស័យបន្ថែមផងដែរ។

បច្ចុប្បន្ន កម្លាំងជំនាញផ្នែកប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិន កំពុងកសាងសំណុំរឿង និងបញ្ជូនជនសង្ស័យ ព្រមទាំងវត្ថុតាង ទៅកាន់អយ្យការអមសាលាដំបូងខេត្តប៉ៃលិន ដើម្បីចាត់ការតាមនីតិវិធី៕