សង្ស័យទុស្សេខ្សែភ្លើង ផ្ទះពលរដ្ឋ៤ខ្នង និងទ្រព្យសម្បត្តិមួយចំនួនធំ ទទួលរងការខូចខាតទាំងស្រុង

ប៉ៃលិន ៖ កាលពីវេលាម៉ោង៣និង០០នាទីរសៀល ថ្ងៃអាទិត្យ ៧រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែមករា ឆ្នាំ២០១៩ អគ្គិភ័យមួយ បានឆាបឆេះផ្ទះប្រជាពលរដ្ឋចំនួន៤ខ្នង នៅចំណុចផ្សារប៉ាងរលឹម ស្ថិតក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដែលសមត្ថកិច្ចជំនាញសង្ស័យថា អាចជាករណីទុស្សេខ្សែភ្លើងក្នុងផ្ទះជាងក្រឡឹង ដែលម្ចាស់ទុកចោល។

បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឮសំឡេងផ្ទុះផិចផុច(សំឡេងតិច) ក្នុងផ្ទះជាងក្រឡឹង ដែលម្ចាស់ចាក់សោទុកចោល រវល់ទៅលេងរមណីយដ្ឋានចម្ការស្វាយ នៅស្រុកសំឡូត ខេត្តបាត់ដំបង បន្តិចក្រោយមក ក៏អណ្តាតភ្លើងឆាបឆេះចេញពីក្នុងផ្ទះនោះឡើង ក៏មានការភ្ញាក់ផ្អើល នាំគ្នាវាយសោ ដែលចាក់ខាងក្រៅចេញ ដើម្បីចូលទៅពន្លត់ តែស្ថានការណ៍ឆេះខ្លាំងពេក ក៏នាំគ្នារត់ចេញមកក្រៅវិញ ដើម្បីរកវិធីអន្តរាគមន៍បន្ត។

ប្រភពព័ត៌មាន បានបន្តថា គ្រាន់តែចេញមកខាងក្រៅភ្លាម អណ្ដាតភ្លើងរឹតតែឆាបឆេះខ្លាំងឡើង រហូតតេហៅសមត្ថកិច្ចពន្លត់អគ្គិភ័យ ឲ្យមកជួយអន្តរាគមន៍ផងដែរ ដោយប្រើប្រាស់ទឹកជាច្រើនរថយន្ត ដើម្បីពន្លត់ រហូតដល់ម៉ោងប្រមាណ៥និង១៥នាទី ទើបភ្លើងរលត់ទាំងស្រុងផងដែរ។

បើតាមការឲ្យដឹងពី លោកវរសេនីយ៍ត្រី យ៉ែម សារិទ្ធ អធិការនគរបាលក្រុងប៉ៃលិន មានប្រសាសន៍ថា មូលហេតុ នៃការឆេះខាងលើនេះ គឺបណ្តាលមកពីទុស្សេខ្សែភ្លើង ដែលឆេះចេញពីផ្ទះ របស់ជាងក្រឡឹងគ្រឿងម៉ាស៊ីន ដោយម្ចាស់ផ្ទះមិននៅ និងចាក់សោផ្ទះចោល ហើយចំពោះការឆាបឆេះផ្ទះនេះដែរ គឺមានផ្ទះពលរដ្ឋរងគ្រោះចំនួន៤ខ្នង ដោយឆេះទាំងស្រុងចំនួន៣ខ្នង និងស្រាលចំនួន១ខ្នងផ្ទះ និងមិនបណ្តាលឲ្យមានមនុស្សរងរបួសធ្ងន់ ដល់អាយុជីវិតនោះទេ។

លោកអធិការបន្តថា ជនរងគ្រោះ ដែលកើតមានអគ្គិភ័យ រួមមាន ទី១-ឈ្មោះ ហេង សាន ប្រពន្ធឈ្មោះ តឿ ស្រីពេជ្រ(ផ្ទះជាងក្រឡឹងគ្រឿងម៉ាស៊ីន)(ឆេះទាំងស្រុង),ទី២-ឈ្មោះ ដា ឡែន ដែលមានប្រពន្ធ ឈ្មោះ មុំ ផ្ទះជាងជួសជុលម៉ាស៊ីន(ឆេះទាំងស្រុង),ទី៣-ឈ្មោះ គា គឹមលាង ភេទស្រី(ផ្ទះលក់ចំណីសត្វ)(ឆេះទាំងស្រុង) និងទី៤-ឈ្មោះ វណ្ណឌី ភេទប្រុស(ផ្ទះលក់ថ្នាំ និងសម្ភារៈកសិកម្ម)(ឆេះមួយផ្នែកខាងក្រោយ)។

លោកអធិការ បានបន្តទៀតថា ចំពោះករណីនេះ សមត្ថកិច្ចជំនាញ បានចុះអន្តរាគមន៍ផ្ទាល់ ដោយប្រើប្រាស់រថយន្តពន្លត់អគ្គិភ័យ នៃស្នងការដ្ឋាននគរបាលខេត្តប៉ៃលិនចំនួន២គ្រឿង និងរថយន្តពន្លត់អគ្គិភ័យ នៃអធិការដ្ឋាននគរបាលស្រុករតនៈមណ្ឌលចំនួន១គ្រឿង ក្នុងនោះយើងប្រើប្រាស់អស់ទឹកចំនួន០៧ឡាន ហើយបានពន្លត់រួចជាស្ថាពរ នៅវេលាម៉ោង១៧និង១៥នាទីថ្ងៃខែឆ្នាំដដែល ។

សូមបញ្ជាក់ថា ក្រោយពេលកើតហេតុ គេសង្កេតឃើញ លោក ហែម ឬទ្ធី អភិបាលរងខេត្តប៉ៃលិន អមដំណើរដោយអភិបាលក្រុងប៉ៃលិន ចុះដល់កន្លែងកើតហេតុ ដើម្បីចូលរួមរំលែកទុក្ខដល់ជនរងគ្រោះទាំងអស់ ដែលបានបាត់បង់ផ្ទះសម្បែង និងទ្រព្យសម្បត្តិ ដោយនឹកស្មានមិនដល់ផងដែរ។ ចំណែកការខូចខាតទ្រព្យសម្បត្តិនៅមិនទាន់ដឹងចំនួននៅទេ៕