ក្លិបបាល់ទាត់សូលទីឡូអង្គរ (Soltilo Angkor FC) ដែលសមាជិកពានរង្វាន់លីគកំពូលកម្ពុជា Metfone Cambodian League នៅរដូវកាលឆ្នាំ២០១៩ បាននាំយកកីឡាករខ្មែរ៤នាក់បន្ថែមទៀតចូលរួមក្នុងក្រុមដើម្បីត្រៀមរដូវកាលថ្មីឆ្នាំខាងមុខទាំងក្នុងពានរង្វាន់សម្តេចតេជោ ហ៊ុន សែន និងពានរង្វាន់លីគកំពូលកម្ពុជា។
កីឡាករទាំង៤នាក់នោះត្រូវបានក្លិបប្រកាសនៅលើហ្វេសប៊ុកផ្លូវការរបស់ខ្លួនថា មានខ្សែការពារ ប៊ុន វិច្ឆិកា, ខ្សែប្រយុទ្ធ ពឺយ រស្មី,ខ្សែការពារ ស៊ុក វឌ្ឍនា, ខ្សែបម្រើ សឿង បញ្ញា។ ចំពោះកីឡាករ ប៊ុន វិច្ឆិកា ត្រូវបានក្លិបចុះកិច្ចសន្យាអាជីពរយះពេល ៣ឆ្នាំទៀត ខណៈរូបគេមានកំណើតនៅក្នុងខេត្តសៀមរាប។ ត្រឹមវ័យក្មេងអាយុ ១៨ឆ្នាំ ប៊ុន វិច្ឆិកាពាក់អាវស្លាកលេខ ១៨ ជាមួយក្លិបសូលទីឡូអង្គរ។
ចំណែកកីឡាករ ពឺយ រស្មី ក៏ត្រូវបានក្លិបចុះកិច្ចសន្យាអាជីពរយៈពេល ៣ឆ្នាំទៀតដែរ។ ក្នុងនាមជាខ្សែប្រយុទ្ធ រស់នៅក្នុងខេត្តសៀមរាប កីឡាកររូបនេះមានវ័យត្រឹមអាយុ ១៩ឆ្នាំ ហើយនឹងពាក់អាវលេខ១៧នៅក្នុងក្លិប។ ចំណែកខ្សែការពារ ស៊ុក វឌ្ឍនា វិញទើបតែផ្ទេរមកពីក្លិបយុវជនក្រសួងការពារជាតិ នឹងពាក់អាវលេខ ១៥។ ចំពោះខ្សែបម្រើ សឿង បញ្ញា ធ្លាប់មានបទពិសោធន៍ច្រើននៅក្នុងក្លិបអាជិពលីគកំពូលកម្ពុជានិងចុងក្រោយផ្ទេរមកពីក្លិបវេស្ទើនភ្នំពេញ ហើយរូបគេនឹងពាក់អាវលេខ ២៤។
សូមបញ្ជាក់ថា ក្រុមសូលទីឡូអង្គរ ទើបតែមានការផ្លាស់ប្តូរគ្រូបង្វឹកដោយដឹកនាំពីសំណាក់លោក Darren Pomroy ក្រោយការចាកចេញរបស់Yuki Matsudaដែលជាគ្រូបង្វឹកចាស់។ កាលពីរដូវកាលមុនក្រុមដែលមានមូលដ្ឋាននៅខេត្តសៀមរាប មួយនេះបានឈរនៅចំណាត់ថ្នាក់លេខ១០ ក្នុងចំណោមសមាជិកទាំង១២ក្នុងពានរង្វាន់លីគកំពូលកម្ពុជា រដូវកាលឆ្នាំ២០១៨ក្រោយរកបានជ័យជម្នះចំនួន៥ លើក ហើយធ្លាប់ស្មើ៥ លើកនិងចាញ់១២ លើកមាន២០ពិន្ទុ ដែលអាចបន្តក្នុងលីគកំពូលរដូវកាលបន្ទាប់ទៀត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមសូលទីឡូអង្គរ បានធ្លាក់ត្រឹមវគ្គ១៦ក្រុមចុងក្រោយ បន្ទាប់ពីចាញ់គូប្រជែងក្នុងខេត្តតែមួយគឺអង្គរថាយហ្គឺរ ដោយលទ្ធផលទាំង២ជើង៣ទល់២៕
Source: Kampuchea Thmey Daily
0 Comments