ភ្នំពេញ ៖ បុរសវ័យចំណាស់ម្នាក់ រងរបួសបាក់ស្នងជើងស្តាំធ្ងន់ធ្ងរ ខណៈដែលកំពុងជិះម៉ូតូលើផ្លូវបេតុងកំពុងកកស្ទះ គ្រាន់តែដាក់ទម្លាក់ជើងជ្រែងទប់ម៉ូតូក៏ ប៉ះចំកង់រ៉ឺម៉កដឹកដែកដែលបើកបរស្របទិសគ្នា បណ្តាលឲ្យកិនតែម្តង កាលពីវេលាម៉ោង៨និង១៥នាទីព្រឹកថ្ងៃទី២៩ ខែមករា ឆ្នាំ២០១៩នៅតាមផ្លូវបេតុងក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ។
ជនរងគ្រោះឈ្មោះ ចាន់ ប៊ុនធឿន ភេទប្រុស អាយុ៦២ឆ្នាំ មានទីលំនៅភូមិគោកឃ្លាង សង្កាត់គោកឃ្លាង ខណ្ឌសែនសុខ ដោយជិះម៉ូតូមួយគ្រឿងម៉ាកហុងដា សេ១២៥ ស៊េរី២០១៦ ពណ៌ខ្មៅ ពាក់ស្លាកលេខ ភ្នំពេញ 1FL-4884។
តាមប្រភពនៅកន្លែងកើតហេតុបានឲ្យដឹងថា មុនកើតហេតុ ជនរងគ្រោះជិះម៉ូតូចេញពីផ្ទះក្នុងគោលបំណងឆ្ពោះទៅកន្លែងធ្វើការងារ បើកបរធ្វើដំណើរកាត់តាមផ្លូវបេតុងខាងលើ ពីកើតទៅលិច ខណៈដែលស្ថានភាពកំណាត់ផ្លូវកំពុងកកស្ទះចរាចរណ៍ ជនរងគ្រោះ បានទម្លាក់ជើងស្តាំចេញពីឈ្នាន់ដើម្បីទប់ជ្រែងម៉ូតូកុំឲ្យដួល គាប់ជួនពេលនោះ ប៉ះចំកង់រ៉ឺម៉កដឹកដែក ដែលកំពុងបើកបរស្របទិសគ្នា នៅខាងស្តាំម៉ូតូជនរងគ្រោះស្រាប់ បណ្តាលឲ្យកិនបាក់ស្នងជើងស្តាំតែម្ដង។
ក្រោយកើតហេតុ ភាគីសាច់ញាតិក្រុមគ្រួសារ ខាងជនរងគ្រោះ មកដល់កន្លែងកើតហេតុ ទើបដឹងថា ទាំងជនរងគ្រោះ ទាំងអ្នកបើកបររ៉ឺម៉កដឹកដែក ជាអ្នកស្គាល់គ្នា ទើបសុំប៉ូលិស ទៅរៀងខ្លួន ជនរងគ្រោះត្រូវបានក្រុមគ្រួសារ ដឹកបញ្ជូនតាមម៉ូតូកង់បីយកទៅមន្ទីរពេទ្យមិនរំខានដល់សមត្ថកិច្ចឡើយ៕
Source: Kampuchea Thmey Daily
0 Comments