កណ្តាល ៖ ដើម្បីមូលដ្ឋានមានសុវត្ថិភាព នគរបាលស្រុកស្អាង បានបំពេញតួនាទីដូចភ្លៀងរលឹមជូនប្រជាពលរដ្ឋរស់នៅដោយក្តីសុខ ពិសេសឲ្យយុវជនជៀសផុតពីគ្រឿងញៀន កម្លាំងជំនាញផ្នែកប្រឆាំងគ្រឿងញៀន នៃអធិការដ្ឋានស្រុក សហការជាមួយប៉ុស្តិ៍រដ្ឋបាលសិត្បូ ធ្វើការបង្ក្រាបបទល្មើសគ្រឿងញៀន ឃាត់ខ្លួនជនសង្ស័យ២នាក់ ដកហូតបានថ្នាំញៀន១២កញ្ចប់។
ការបង្ក្រាបនេះ ធ្វើឡើងនៅថ្ងៃទី២២ ខែមករា ឆ្នាំ២០១៩ វេលាម៉ោង១៦និង០៥នាទី ចំណុចបន្ទប់ជួលរបស់ ឈ្មោះ លឹម ស៊ុនឡេង ស្ថិតក្នុងភូមិកំពង់ព្រីង ឃុំសិត្បូ ស្រុកស្អាង ខេត្តកណ្តាល។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនសង្ស័យចំនួន០២នាក់ (ឃាត់ខ្លួន) ៖
១ / ឈ្មោះ លឹម ស៊ុនឡេង ភេទប្រុស អាយុ២៣ឆ្នាំ ជនជាតិ ខ្មែរ មុខរបរ មិនពិតប្រាកដ។
២ / ឈ្មោះ រុន បូរ៉ា ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ។ អ្នកទាំងពីរមានទីលំនៅបច្ចុប្បន្នភូមិកំពង់ព្រីង ឃុំសិត្បូ ស្រុកស្អាង ខេត្តកណ្តាល។ រីឯវត្ថុតាងចាប់យករួមមាន ១ / ម្សៅក្រាមពណ៌សថ្លា សង្ស័យថាជាសារធាតុញៀន(ម៉ាទឹកកក) ចំនួន១២កញ្ចប់ ក្នុងនោះ ធំ០២កញ្ចប់ និងតូច១០កញ្ចប់។ ២ / ជញ្ជីងថ្លឹងគ្រឿងញៀន ចំនួន០១គ្រឿង។ ៣ /សម្ភារៈវេចខ្ចប់ប្រើប្រាស់គ្រឿងញៀនមួយចំនួន។
លោកអធិការបញ្ជាក់ថា នៅថ្ងៃទីខែឆ្នាំ វេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ។ ភ្លាមៗនោះកម្លាំងប៉ុស្តិ៍នគរបាលរដ្ឋបាលសិត្បូ បានចុះដល់ចំណុចកើតហេតុ ធ្វើការឃាត់ខ្លួន ឈ្មោះ លឹម ស៊ុនឡេង និងឈ្មោះ រុន បូរ៉ា។
ដោយមានការចូលរួមពី លោកមេភូមិកំពង់ព្រីង កម្លាំងប៉ុស្តិ៍នគរបាលរដ្ឋបាលសិត្បូ ធ្វើការត្រួតពិនិត្យឆែកឆេរបន្ទប់ជួល ឈ្មោះ លឹម ស៊ុនឡេង បានរកឃើញម្សៅក្រាម ពណ៌សថ្លា សង្ស័យជាសារធាតុញៀន(ម៉ាទឹកកក)ចំនួន១២កញ្ចប់ ក្នុងនោះ ធំ០២កញ្ចប់ , តូច១០កញ្ចប់ , ជញ្ជីងថ្លឹងគ្រឿងញៀន ចំនួន០១គ្រឿង និងសម្ភារៈវេចខ្ចប់ប្រើប្រាស់មួយចំនួន រួចឃាត់ខ្លួនជនសង្ស័យទាំងពីរនាក់ រួមនឹងវត្ថុតាង បញ្ជូនមកប៉ុស្តិ៍នគរបាលរដ្ឋបាលសិត្បូ ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ លឹម ស៊ុនឡេង បានសារភាពថា ខ្លួនបានទិញគ្រឿងញៀន(ម៉ាទឹកកក)ចំនួន ០១កញ្ចប់ធំ ពីបុរសម្នាក់មិនស្គាល់ឈ្មោះ នៅចំណុចវាលខ្សាច់ ចាក់អង្រែលើ រាជធានីភ្នំពេញ តម្លៃ២០០ដុល្លារអាមេរិក ដើម្បីយកមកវេចខ្ចប់លក់បន្ត ក្នុងមួយកញ្ចប់តូច តម្លៃ ២ម៉ឺនរៀល។
ចំណែក ឈ្មោះ រុន បូរ៉ា បានសារភាពថា ខ្លួនបានជួយលក់គ្រឿងញៀន(ម៉ាទឹកកក) ឲ្យឈ្មោះ លឹម ស៊ុនឡេង រយៈពេលជិត១ខែហើយ។
បច្ចុប្បន្ន ជនសង្ស័យ ទាំងពីរនាក់ បានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្តអនុវត្តតាមនីតិវិធី៕
Source: Kampuchea Thmey Daily
0 Comments