អូស្ត្រាលី​ស្វែងរក​ព័ត៌មាន​ស្តីពី​ការបាត់​ខ្លួន​បុរស​សញ្ជាតិ​ពីរ​នៅក្នុង​ប្រទេស​ចិន

ក្រុមមន្ត្រី​បាន​និយាយ​នៅ​ថ្ងៃ​ពុធ​ថា ប្រទេស​អូស្ត្រាលី​កំពុង​ស៊ើបអង្កេត​របាយការណ៍​មួយ​ដែលថា អ្នកនិពន្ធ​ប្រឆាំង​ម្នាក់​និង​ជា​ជន​ជាតិចិន​មាន​សញ្ជាតិ​ពីរ​កំពុង​បាត់​ខ្លួន​ហើយ​ប្រហែលជា​ត្រូវបាន​ឃុំឃាំង​នៅក្នុង​ប្រទេស​កំណើត​រប​ស់​គាត់​។​

លោក Yang Hengjun អ្នកនិពន្ធ​រឿង​ប្រលោមលោក​ដែលជា​អតីត​អ្នកការទូត​ចិន​និង​ជា​សកម្មជន​លទ្ធិប្រជាធិបតេយ្យ​បាន​បាត់​ខ្លួន​ភ្លាមៗ​បន្ទាប់ពី​គាត់​បាន​វិល​ត្រលប់​ទៅ​ទីក្រុង​ក្វាង​ចូ​វ​កាលពី​សប្តាហ៍​មុន​។ នេះ​បើតាម​ការ​ឲ្យ​ដឹង​ពី​មិត្តភក្តិ​របស់គាត់​។​
​
នៅពេល​សួរ​អំពី​ករណី​របស់លោក Yang ក្រសួងការបរទេស​និង​ពាណិជ្ជកម្ម​អូស្ត្រាលី​បាន​និយាយថា ខ្លួន​កំពុង​ស្វែងរក​ព័ត៌មាន​អំពី​ពលរដ្ឋ​អូស្ត្រាលី​ម្នាក់​ដែល​ត្រូវបាន​គេ​រាយការណ៍​ថា​បាត់​ខ្លួន​នៅក្នុង​ប្រទេស​ចិន​។​
​
អ្នកនាំពាក្យ​ម្នាក់​បាន​និយាយថា “​ដោយសារ​កាតព្វកិច្ច​ភាពជា​ឯកជន​របស់​យើង យើង​នឹងមិន​ផ្តល់យោបល់​បន្ថែមទៀត​នោះទេ​”​។​
​អាជ្ញាធរ​អូស្ត្រាលី​ត្រូវបាន​គេ​ជឿថា កំពុង​ទាក់ទង​ជាមួយ​មិត្តភក្តិ​និង​គ្រួសារ​របស់លោក Yang​។​
​
កាសែត Sydney Morning Herald បាន​រាយការណ៍​ថា លោក Yang បាន​វិល​ត្រលប់មក​ប្រទេស​ចិន​វិញ​ជាមួយ​ភរិយា​និង​កូនប្រុស​របស់គាត់​កាលពី​ថ្ងៃទី​១៨​ខែមករា​ប៉ុន្តែ​មិនបាន​ធ្វើដំណើរ​តាម​ផែនការ​ទៅ​ទីក្រុង​សៀង​ហៃ​ទេ​។​
​
ការបាត់​ខ្លួន​របស់គាត់​បាន​បង្ក​ឲ្យ​មានការ​ភ័យខ្លាច​ថា គាត់​អាចជា​ជនរងគ្រោះ​ចុងក្រោយបង្អស់​នៃ​ការដាក់ទណ្ឌកម្ម​កាន់តែ​ខ្លាំង​ឡើងៗ​ចំពោះ​អ្នកប្រឆាំង​ដោយ​អាជ្ញាធរ​ចិន​។​
​
ថ្មីៗ​នេះ ប្រទេស​អូស្ត្រាលី​បាន​សម្តែង​ការព្រួយបារម្ភ​អំពី​ការឃុំ​ឃាំង​ជនជាតិ​កាណាដា​ពីរ​នាក់​ជាការ​សងសឹក​ចំពោះ​ការចាប់ខ្លួន​នាយក​ប្រតិបត្តិ​ជាន់ខ្ពស់​របស់​ក្រុមហ៊ុន Huawei នៅក្នុង​ប្រទេស​កាណាដា​។​
​
គួរ​បញ្ជាក់ថា លោក Yang បានធ្វើការ​នៅ​ក្រសួងការបរទេស​ប៉ុន្ដែ​ក្រោយមក​គាត់​បាន​ចាក​ចេញពី​ប្រទេស​ចិន​ហើយ​បាន​សរសេរ​រឿង​ប្រលោមលោក​បែប​ចារកម្ម​និង​ប្លុក​ជា​ភាសា​ចិន​ដ៏​ពេញនិយម​មួយ​។​
​
លោក Yang បាន​បាត់​ខ្លួន​ម្តង​ក្នុង​ឆ្នាំ​២០១១​ដោយ​រៀបរាប់​អំពី​ការបាត់​ខ្លួន​របស់គាត់​ថា​ជា “​ការយល់ច្រឡំ​” នៅពេលដែល​គាត់​បានបង្ហាញ​ខ្លួន​ឡើងវិញ​នៅ​ប៉ុន្មាន​ថ្ងៃ​ក្រោយមក​៕ AFP

​

Source: Kampuchea Thmey Daily