ព្រះសីហនុ ៖ មនុស្សប្រុស/ស្រីចំនួន២នាក់ បានស្លាប់យ៉ាងអាណោចអាធ័ម ក្នុងថ្លុកឈាម នៅក្នុងហេតុការណ៍គ្រោះថ្នាក់ចរាចរណ៍រវាងរថយន្ត និងម៉ូតូ បុកនៅលើផ្លូវជាតិលេខ៤ ដោយមូលហេតុភាគីម៉ូតូ បើកបុករថយន្តដែលចតស្ងៀមពីក្រោយ ទិសដៅពីព្រះសីហនុ ទៅភ្នំពេញ។
ករណីបង្កឲ្យមនុស្សស្លាប់នេះ បានកើតមានឡើងនៅម៉ោង០៦និង១៥នាទី ថ្ងៃទី១៧ ខែមករា ឆ្នាំ២០១៩ លើដងផ្លូវជាតិលេខ៤ ចន្លោះគីឡូ២១១-២១២ ភូមិចំណោទរាម ឃុំបិតត្រាំង ស្រុកព្រៃនប់ខេត្តព្រះសីហនុ។
សមត្ថកិច្ចបានឲ្យដឹងថា ករណីនេះ បង្កឡើងរវាងរថយន្តកុងតឺន័រ ក្បាលពណ៌ ស ត្រួយចេក ពាក់ស្លាកលេខ ០៣០៥ ចង្កូតស្តាំ ម៉ាក Fuso បើកបរដោយឈ្មោះ សួន ភាព របស់ក្រុមហ៊ុន OLAIR និងម៉ូតូ ម៉ាកសេ១២៥ ពណ៌ខ្មោះ ពាក់ស្លាកលេខ ភ្នំពេញ១CZ៧៤៩៦ បើកបរដោយ ឈ្មោះ រុង ភេទប្រុស អាយុ១៦ឆ្នាំ និងមានអ្នករួមដំណើរពីក្រោយ ឈ្មោះ ជេន ជិង ភេទស្រី អាយុ៣១ឆ្នាំ ជនជាតិខ្មែរ ស្រុកកំណើត ស្រុកស្រែអំបិល ខេត្តកោះកុង។
ក្រោយកើតហេតុ អ្នកបើកបររថយន្តបានរត់គេចខ្លួនបាត់ស្រមោល ដោយបន្សល់ទុកឯកសារខ្លះពាក់ព័ន្ធនឹងអត្តសញ្ញាណអ្នកបើកបរ។
សមត្ថកិច្ចបានឲ្យដឹងទៀតថា ជនរងគ្រោះទាំង២នាក់(ស្លាប់)នេះ បច្ចុប្បន្នស្នាក់នៅបណ្ដោះអាសន្ន ផ្ទះជួលក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ៕
Source: Kampuchea Thmey Daily
0 Comments