នាយករដ្ឋមន្ត្រីបារាំងលោក Edouard Philippe កាលពីថ្ងៃចន្ទ បានប្រកាសអំពីផែនការហាមប្រាមការចូលរួមនៅក្នុងបាតុកម្ម ដែលគ្មានការអនុញ្ញាត ខណៈពេលដែលរដ្ឋាភិបាល បានខិតខំប្រឹងប្រែងដើម្បីបញ្ចប់បាតុកម្មហិង្សា “អាវកាក់ពណ៌លឿង” រយៈពេលច្រើនសប្តាហ៍។
អស់រយៈពេលប្រាំពីរសប្តាហ៍មកហើយនៅក្នុងការបះបោរដែលមានការប៉ះទង្គិចគ្នាប្រចាំសប្តាហ៍នៅទីក្រុងប៉ារីសនិងទីក្រុងបារាំងដទៃទៀត, លោកPhilippe បាននិយាយថា រដ្ឋាភិបាលនឹងណែនាំច្បាប់ថ្មីមួយដែលផ្តន្ទាទោសអ្នកទាំងឡាយណាដែលមិនគោរពតាមតម្រូវការ អ្នកទាំងឡាយណាដែលចូលរួមបាតុកម្មដោយគ្មានការអនុញ្ញាតនិងអ្នកទាំងឡាយណាដែលមកធ្វើបាតុកម្មដោយមានពាក់ម៉ាស់មុខ។
លោកPhilippe បានបន្តថា នាពេលអនាគត ការទទួលខុសត្រូវនឹងដាក់ទៅលើអ្នកបង្កបញ្ហានិងអ្នកមិនបង់ពន្ធដើម្បីឲ្យសងថ្លៃខូចខាតដែលបង្កទៅលើអាជីវកម្មនិងអចលនទ្រព្យក្នុងអំឡុងបាតុកម្មដែលបានចាប់ផ្តើមដោយសន្តិភាពនៅពាក់កណ្តាលខែវិច្ឆិកាជុំវិញបញ្ហាពន្ធដារប៉ុន្តែវាបានក្លាយជារឿងជ្រុលនិយម។
បាតុករអាវកាក់ពណ៌លឿងមួយចំនួនបានទាមទារឲ្យលោកប្រធានាធិបតី Emmanuel Macron លាលែងពីតំណែងដែលនេះជាការទាមទារមួយត្រូវបានបដិសេធដោយរដ្ឋាភិបាលថាជារឿងមិនមានប្រជាធិបតេយ្យ។
កាលពីថ្ងៃសៅរ៍ អ្នកតវ៉ាមួយក្រុមបានប្រើរថយន្តសំណង់ដើម្បីកម្ទេចទ្វារអគារមួយដែលមានការិយាល័យអ្នកនាំពាក្យរដ្ឋាភិបាលលោក Benjamin Griveaux។
នៅក្នុងឈុតឆាកផ្សេងទៀតដែលបង្កឲ្យមានការភ្ញាក់ផ្អើលគឺអតីតអ្នកប្រដាល់អាជីពម្នាក់ត្រូវបានគេថតជាប់ក្នុងកាមេរ៉ា ខណៈពេលកំពុងវាយមន្ត្រីប៉ូលិស។
លោក Philippe បានប្រកាសផែនការដាក់ពង្រាយសមាជិកកងកម្លាំងសន្តិសុខចំនួន៨០,០០០នាក់នៅទូទាំងប្រទេសសម្រាប់បាតុកម្មលើកក្រោយ៕AFP
Source: Kampuchea Thmey Daily
0 Comments