ភ្នំពេញ ៖ បេឡាជាតិ របបសន្តិសុខសង្គម( ប.ស.ស)បាន ប្រគល់ប័ណ្ណសមាជិក ប.ស.ស ចំនួន៩៣៥ប័ណ្ណដល់ថ្នាក់ដឹកនាំមន្ត្រីរាជការ និងមន្ត្រីជាប់កិច្ចសន្យា ក្រសួងកិច្ចការនារី ដើម្បីទទួលបានសេវាថែទាំសុខភាព នៅមូលដ្ឋានសុខាភិបាលដែលជាដៃគូរបស់ប.ស.សដោយឥតគិតថ្លៃ។
ការប្រគល់ប័ណ្ណនេះបានធ្វើឡើងកាលពីព្រឹកថ្ងៃទី០៨ ខែមករា ឆ្នាំ២០១៩នេះ នៅទីស្ដីការក្រសួងក្រោមអធិបតីភាព លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និង លោក អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជានាយកបេឡាជាតិ របបសន្តិសុខសង្គម (ប.ស.ស)។
ក្នុងឱកាសនោះដែរ លោកស្រី អ៊ឹង កន្ថាផាវី បានថ្លែងថា ប័ណ្ណ ប.ស.ស នេះ គឺជាសមិទ្ធផលដ៏ល្អមួយ ដែលរាជរដ្ឋាភិបាលកម្ពុជាបង្កើតឡើង ដើម្បីបម្រើដល់ផលប្រយោជន៍ មន្ត្រីរាជការ និងកម្មករ-កម្មការិនី។
លោកស្រីរដ្ឋមន្ត្រីបានបន្តថា ប័ណ្ណ ប.ស.ស នេះនឹងជួយធ្វើឲ្យថ្នាក់ដឹកនាំមន្ត្រីរាជការ និងមន្ត្រីជាប់កិច្ចសន្យាក្រសួងកាត់បន្ថយការចំណាយបានមួយចំណែកទៅលើការថ្លៃព្យាបាលជំងឺដោយសាររាជរដ្ឋាភិបាលជាអ្នកចេញជំនួស។
លោក អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជានាយកបេឡាជាតិ របបសន្តិសុខសង្គមបានឲ្យដឹងថា គិតចាប់តាំងពីពេលដំណើរការដំបូង ក្នុងឆ្នាំ២០០៨ រហូតមកដល់បច្ចុប្បន្ននេះ ប.ស.ស បានចុះបញ្ជីមន្ត្រីសាធារណៈ អតីតមន្ត្រីរាជការ និងអតីតយុទ្ធជន ជាង៣១ម៉ឺននាក់ និងមានមន្ត្រីសាធារណៈ អតីតមន្ត្រីរាជការ និងអតីតយុទ្ធជន ទៅទទួលសេវាថែទាំសុខភាព បានជាង២៥ម៉ឺនដង/នាក់។
លោក អ៊ុក សមវិទ្យា បានបញ្ជាក់ថា «រហូតមកដល់បច្ចុប្បន្នពេលនេះ ប.ស.ស បានចុះបញ្ជីមន្ត្រីសាធារណៈ អតីតមន្ត្រីរាជការ និងអតីតយុទ្ធជន សរុបចំនួន៣១៤,០៧៦នាក់ និងមានមន្ត្រីសាធារណៈអតីតមន្ត្រីរាជការ និងអតីតយុទ្ធជន ទៅទទួលសេវាថែទាំសុខភាព បានចំនួន២៥៨,៥១១ដង/នាក់»។
លោកបានបន្ថែមទៀតថា ប.ស.ស បានផ្តល់តាវកាលិក (អត្ថបទប្រយោជន៍) ផ្នែកហានិភ័យការងារ ដល់ជនរងគ្រោះជាកម្មករនិយោជិតជាង២១ម៉ឺន៦ពាន់នាក់ ក្នុងចំណោមកម្មករនិយោជិត ជាសមាជិកជាង១លាន ៦សែន១ម៉ឺននាក់ នៃសហគ្រាស ជាង១ម៉ឺន២ពាន់៦រយសហគ្រាស។ សម្រាប់ផ្នែកថែទាំសុខភាព បានផ្តល់សេវាដល់កម្មករនិយោជិត ជាង១លាន៨សែន៥ម៉ឺនដង/នាក់។
លោក អ៊ុក សមវិទ្យា បានឲ្យដឹងថា ប័ណ្ណ ប.ស.ស អាចប្រើប្រាស់បាន នៅគ្រប់មន្ទីរពេទ្យសាធារណៈ (ពេទ្យរដ្ឋ) និងបណ្ដាមន្ទីរពេទ្យឯកជនមួយចំនួន ដែលមានដាក់ស្លាកសញ្ញា ប.ស.ស។
ដោយឡែក ក្នុងករណីសង្គ្រោះបន្ទាន់ អ្នកមានប័ណ្ណ ប.ស.ស អាចចូលសម្រាកព្យាបាលបានគ្រប់មន្ទីរពេទ្យ ហើយយកវិក្កយបត្រចំណាយ មកជូនមន្ត្រី ប.ស.ស ដើម្បីទូទាត់ប្រាក់ជូនវិញ៕
Source: Kampuchea Thmey Daily
0 Comments