អ្នកនាំពាក្យរដ្ឋាភិបាលបាននិយាយថា កាលពីថ្ងៃចន្ទ មេដឹកនាំរដ្ឋាភិបាលមីយ៉ាន់ម៉ាលោកស្រី អ៊ួង សានស៊ូជី បានពិភាក្សាអំពីការវាយប្រហាររបស់ក្រុមឧទ្ទាមទៅលើប៉ូលិសមីយ៉ាន់ម៉ានៅក្នុងកិច្ចប្រជុំដ៏កម្រមួយជាមួយមេបញ្ជាការយោធាហើយរដ្ឋបាលរបស់លោកស្រីបានអំពាវនាវឲ្យកងកម្លាំងប្រដាប់អាវុធ “កម្ទេចពួកឧទ្ទាម”។
យោងតាមអង្គការសហប្រជាជាតិបានឲ្យដឹងថា ការប្រយុទ្ធគ្នារវាងកងកម្លាំងរដ្ឋាភិបាលនិងកងទ័ពឧទ្ទាម Arakanក្នុងរដ្ឋភាគខាងលិចរ៉ាក់ឃីនបានបណ្តាលឲ្យមនុស្សរាប់ពាន់នាក់ផ្លាស់ទីលំនៅចាប់តាំងពីដើមខែធ្នូមក។
កងទ័ពArakanចង់បានស្វ័យភាពកាន់តែច្រើនសម្រាប់រដ្ឋរ៉ាក់ឃីន។
រដ្ឋរ៉ាក់ឃីនជាកន្លែងនៃការបង្ក្រាបដឹកនាំដោយយោធាក្នុងឆ្នាំ២០១៧ក្រោយការវាយប្រហារដោយក្រុមបះបោរមូស្លីមរ៉ូហ៊ីងយ៉ាដែលបានជំរុញឲ្យជនជាតិរ៉ូហ៊ីងយ៉ារាប់ពាន់នាក់ភៀសខ្លួនទៅភាគខាងលិចចូលប្រទេសបង់ក្លាដែស។
អ្នកនាំពាក្យរដ្ឋាភិបាលមីយ៉ាន់ម៉ាលោក ZawHtayបាននិយាយថា លោកស្រីស៊ូជីនិងលោកប្រធានាធិបតីWin Myintព្រមទាំងសមាជិកគណៈរដ្ឋមន្ត្រីដទៃទៀតបានជួបមេដឹកនាំយោធារាប់បញ្ចូលទាំងមេបញ្ជាការកងទ័ពលោកMin AungHlaing,អនុប្រធានយោធានិងប្រមុខចារកម្មយោធាផងដែរដើម្បីពិភាក្សាអំពីកិច្ចការបរទេសនិងសន្តិសុខជាតិ។
លោក ZawHtayបានប្រាប់សន្និសីទសារព័ត៌មានមួយនៅរដ្ឋធានី Naypyitawថា “ការិយាល័យរបស់លោកប្រធានាធិបតីបានណែនាំដល់យោធាឲ្យចាប់ផ្តើមប្រតិបត្តិការដើម្បីកម្ទេចក្រុមភេរវករ”។
ប្រព័ន្ធផ្សព្វផ្សាយរដ្ឋបានរាយការណ៍ថា ក្រុមបះបោរបានសម្លាប់ប៉ូលិសចំនួន១៣នាក់និងរងរបួស៩នាក់ក្នុងការវាយប្រហារលើប៉ុស្តិ៍ប៉ូលិសចំនួន៤កាលពីថ្ងៃសុក្រនៅពេលដែលមីយ៉ាន់ម៉ាបានប្រារព្ធទិវាឯករាជ្យ។
អ្នកនាំពាក្យកងទ័ពArakanនៅខាងក្រៅប្រទេសមីយ៉ាន់ម៉ាបានប្រាប់រ៉យទ័រកាលពីសប្តាហ៍មុនថា ក្រុមនេះបានវាយប្រហារកងកម្លាំងសន្តិសុខដើម្បីឆ្លើយតបទៅនឹងការវាយលុកដោយយោធាទ្រង់ទ្រាយធំនៅក្នុងរដ្ឋរ៉ាក់ឃីនភាគខាងជើង៕REUTERS
Source: Kampuchea Thmey Daily
0 Comments