ភ្នំពេញ ៖ សង្ស័យជាមុខសញ្ញាដដែលៗ ព្រោះកន្លែងកើតហេតុ និងសកម្មភាពពេលវេលាជាដើមដែលជនល្មើសបានធ្វើសកម្មភាព វាហាក់ដូចជាដដែលៗ តែសមត្ថកិច្ចហាក់មិនសូវចាប់អារម្មណ៍យកចិត្តទុកដាក់នៅចំណុចនោះសោះ ជាហេតុនាំឲ្យក្រុមជនល្មើសនៅតែមានឱកាសក្នុងការប្រព្រឹត្តបទល្មើសបានសម្រេចជាប្រចាំ។
ជាក់ស្ដែងនៅពេលនេះ នារីម្នាក់ ទើបចេញមកពីធ្វើការវិញ ជិះម៉ូតូមកដល់ចំណុចកើតហេតុ ត្រូវក្រុមចោរធ្វើសកម្មភាពឆក់កាបូបបានសម្រេច ហើយសមត្ថកិច្ចតាមឃាត់ខ្លួនអ្នកផ្សេងបីនាក់ មកសួរនាំ កាលពីវេលាម៉ោង៩និង៣០នាទីយប់ ថ្ងៃទី១៦ ខែមករា ឆ្នាំ២០១៩ តាមបណ្ដោយផ្លូវសហព័ន្ធរុស្ស៊ី ទល់មុខប្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ។
ចំពោះចំណុចទីតាំងកើតហេតុនេះ កាលពីសប្ដាហ៍មុន ក៏ត្រូវបានចោរឆក់ទូរស័ព្ទពីបុរសម្នាក់បានសម្រេចផងដែរ ដោយជនសង្ស័យធ្វើសកម្មភាពនៅចន្លោះម៉ោងប្រហែលគ្នា ហើយជិះត្រឡប់ក្រោយគេចខ្លួនបាត់ដោយសុវត្ថិភាព។
ជនរងគ្រោះ ឈ្មោះ អៀង លីដាណេ ភេទស្រី អាយុ២១ឆ្នាំ មុខរបររដ្ឋបាលក្រុមហ៊ុនសិប្បកម្មត្បូងពេជ្រ ស្នាក់នៅបុរីពិភពថ្មីកំបូល ស្ថិតនៅសង្កាត់ កន្ទោកខណ្ឌពោធិ៍សែនជ័យ រាជធានីភ្នំពេញជិះម៉ូតូម៉ាកហុងដាឌ្រីមសេ១២៥ ស៊េរី២០១៧ ពណ៌ខ្មៅ ពាក់ស្លាកលេខភ្នំពេញ 1CE-9250។ សម្ភារៈ បាត់បង់រួមមាន ទូរស័ព្ទចំនួន២គ្រឿង លុយជាង២០ដុល្លារ អត្តសញ្ញាណប័ណ្ណ និងកាត ATMមួយចំនួន។
ជនសង្ស័យទី១-ឈ្មោះ ផាវ សុផាត ភេទប្រុស អាយុ២១ឆ្នាំ មុខរបរកម្មកររោងចក្រ រស់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ។ ទី២-ឈ្មោះ វ៉ែន ធីម ភេទប្រុស អាយុ១៨ឆ្នាំ មុខរបរ ជាងផ្សារដែក រស់នៅភូមិចាក់ជ្រូកសង្កាត់សំរោងក្រោមខណ្ឌពោធិ៍សែនជ័យ។ ទី៣-ឈ្មោះ កុយ សឿន ភេទប្រុស អាយុ២៥ឆ្នាំ មុខរបរជាងផ្សារដែក ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ស្រុកកំណើតនៅស្រុករំដួល ខេត្តស្វាយរៀង។
សមត្ថកិច្ចបានឲ្យដឹងថា តាមពិតអ្នកទាំងបីនាក់ខាងលើនេះ គ្រាន់តែជាជនសង្ស័យប៉ុណ្ណោះដោយសារក្រោយពេលកើតហេតុភ្លាមៗ ពួកគេឃើញជនរងគ្រោះជាស្រីស្អាត ក៏បានឈប់ម៉ូតូសួរសុខទុក្ខ ដោយសួរជនរងគ្រោះថា ចោរឆក់កាបូបមែន ក្រោយពេលដឹងថានាងស្អាតម្នាក់នេះត្រូវចោរឆក់កាបូបយុវជនទាំងបីនាក់នេះធ្វើជាអ្នកក្លាហានជួយស្រីស្អាត ដោយជិះម៉ូតូដេញចោរទាំងមិនដឹងថា ចោរជិះគេចទៅតាមណាផង ហើយត្រូវបានសមត្ថកិច្ច និងជនរងគ្រោះដាក់ការសង្ស័យថា ជាក្រុមបក្ខពួកចោរទៅវិញ ហើយសមត្ថកិច្ចដេញចាប់មកសួរនាំ ទើបដឹងថាពួកនេះមិនដឹងអីសោះ។
តាមប្រភពព័ត៌មានពីជនរងគ្រោះបាននិយាយថា មុនពេលកើតហេតុ គាត់បានត្រឡប់មកពីធ្វើការក្នុងក្រុមហ៊ុនវិញ ដោយជិះម៉ូតូម្នាក់ឯង និងស្ពាយកាបូប ក្នុងនោះ ដោយមានទូរស័ព្ទចំនួន២គ្រឿង ម៉ាកអាយហ្វូនស៊ិចផ្លឺស មួយគ្រឿង និងម៉ាកអូប៉ូ ចំណែកលុយមានតិចតួចទេ ប្រមាណជាង២០ដុល្លារតែប៉ុណ្ណោះ។ លុះបើកមកដល់ចំណុចកើតហេតុ ឃើញជនសង្ស័យ ជិះម៉ូតូមួយគ្រឿង ម៉ាក ស៊ុយសូគីនិច ដោយមិនបានចាំពណ៌ និងស្លាកលេខឡើយ ដោយជិះគ្នា២នាក់ ក្នុងទិសដៅស្របជាមួយគ្នា ពីកើតទៅលិច នៅពេលជិះមកដល់ទន្ទឹមគ្នា បានធ្វើសកម្មភាពឆក់យកកាបូប របស់គាត់ ដោយគាត់ស្រែកថា ចោរឆក់កាបូបៗ ពេលនោះជនសង្ស័យបានជិះម៉ូតូត្រឡប់ក្រោយវិញ។
ប្រភពបន្ដថា ពេលឆក់បានភ្លាមៗ ស្រាប់តែមានយុវជន៣នាក់ជិះម៉ូតូ២គ្រឿង បានមកសួរគាត់ថាចោរឆក់កាបូបមែន ហើយក្រុមយុវជននោះបានជិះដេញតាមចោរភ្លាមៗផងដែរ។ ពេលដែលជនរងគ្រោះដេញជនសង្ស័យឆក់កាបូបនោះ ក៏មានកម្លាំងអន្តរាគមន៍ខណ្ឌពោធិ៍សែនជ័យ និងកម្លាំងនគរបាលប៉ុស្តិ៍ បានជួយសហការដេញឃាត់ជនសង្ស័យដែលមកសួរនាំនោះភ្លាមៗផងដែរ ព្រោះកាយវិការគួរឲ្យសង្ស័យ អាចជាអ្នកចាំបិទគូទ ហើយឈានដល់ការឃាត់បាន៣នាក់នេះភ្លាមៗ ដើម្បីនាំយកទៅសាកសួរ បន្ទាប់ពីសួរនាំរួច ដោយមិនមានហេតុផលគ្រប់គ្រាន់សម្រាប់ដាក់បន្ទុកទើបបានឲ្យត្រឡប់ទៅផ្ទះវិញភ្លាមៗផងដែរ។
ក្រោយពេលកើតហេតុ ជនរងគ្រោះបានមកដាក់ពាក្យបណ្ដឹងដើម្បីឲ្យសមត្ថកិច្ចនគរបាលប៉ុស្តិ៍ ជួយស៊ើបអង្កេតស្រាវជ្រាវរកមុខសញ្ញាចោរឆក់នោះមកផ្ដន្ទាទោសតាមច្បាប់៕
Source: Kampuchea Thmey Daily
0 Comments