នី សុ​ភី ផ្តួល​អ្នក​ប្រដាល់​ថៃ​ណង អ៊ូ ឲ្យ​សន្លប់​ ក្នុង​ទឹក​ទី​២

នី សុ​ភី ឬ​ឡុង សុ​ភី អ្នក​ប្រដាល់​ក្លិប​សាល​វ័​ន្ត​កីឡា បាន​ផ្តួល​យកឈ្នះ​អ្នក​ប្រដាល់​ថៃ​ជើងចាស់​ណង​អ៊ូ​(Nong Ou) អោយ​សន្លប់​ក្នុង​ទឹក​ទី​២ នៅក្នុង​ការជួប​ប្រកួត​គ្នា លើស​ង្វៀន​Boostrong Fighter On Fire របស់​SEATV កាលពី​ព្រឹក​ថ្ងៃអាទិត្យ ​ទី​០៦ ខែ​មករា ឆ្នាំ​២០១៩។​

ណង អ៊ូ នេះ ជា​អ្នក​ប្រដាល់​ថៃ​ជើងចាស់ ធ្លាប់​មក​ប្រកួត​នៅ​ស្រុក​ខ្មែរ​ច្រើនលើក​ហើយ​កន្លងមក ដែល​កាលណោះ​គេ​ជួប​ប្រកួត​តែ​ក្នុង​ប្រភេទ​ទម្ងន់​៦០​គីឡូក្រាម​និង​ជួប​ជាមួយ​អ្នក​ប្រដាល់​ខ្មែរ​ក្នុង​កម្រិត​B ដូចជា​សេក គឹម​ផៃ និង​ផន ផល្លា​ប៉ុណ្ណោះ ហេតុនេះ​ពេល​មក​ប៉ះ​ជាមួយ​ជើង​ខ្លាំង​នី សុ​ភី ដែល​គេ​ថិ​ត​ក្នុង​កម្រិត​A របស់​កម្ពុជា​នោះ ធ្វើឲ្យ​ណង អ៊ូ តស៊ូ​មិនបាន​២​ទឹក​ផង ក៏​សន្លប់​ដោយ​កែង​របស់​សុ​ភី​ទៅហើយ។
​
នី សុ​ភី ក្នុងការ​ប្រកួត​ទឹក​ទី​២​នេះ គេ​គ្រាន់តែ​វាយ​ដើម្បី​យក​ពិន្ទុ​ប៉ុណ្ណោះ ប៉ុន្តែ​ណង អ៊ូ គេ​នាំ​អាតប្រើ​ហឹ​ង្សា​មុន ដោយ​វាយ​កែង​ដាក់​សុ​ភី នាំឲ្យ​សុ​ភី​ ប្រើ​កែង​វាយបក​វិញ ធ្វើ​ឲ្យ​ណង អ៊ូ ត្រូវ​មួយ​កែង​ដួល​សន្លប់​តែម្តង។ ពួកគេ​ជួបគ្នា​ក្នុង​ទម្ងន់​៦៩​គីឡូក្រាម។

ចំពោះ ការប្រកួត​រវាង​អ្នក​ប្រដាល់​រួម​ជាតិ​វិញ ខាំ សូរិយា អ្នក​ប្រដាល់​ក្លិប​រ៉ា​ហាប់​ស្វាយប៉ាក ក៏ត្រូវ​ឌឹ​ម សារិទ្ធ អ្នក​ប្រដាល់​សមាគម​កីឡាប្រដាល់​ក្រសួងការពារជាតិ វាយ​ឲ្យ​សន្លប់​ក្នុង​ទឹក​ទី​៣​ដែរ ក្នុង​ការជួប​ប្រកួត​គ្នា​ទម្ងន់​៥៧ គ​.​ក្រ។​
​
ឌឹ​ម សារិទ្ធ ជា​អ្នក​ប្រដាល់​ដែល​ចាត់ទុកថា ជា​ជើង​ខ្លាំង​ស្រករ​ក្រោយ​ម្នាក់​នោះ បាន​ប្រើ​កណ្តាប់ដៃ​ដាល់​ទៅលើ​ខាំ សូរិយា ត្រូវជា​ច្រើន​ដៃ និង​ដួល​លើ​រេញ ត្រូវ​អាជ្ញាកណ្ដាល​រាប់​៨​ម្តង ហើយ​នៅ​ពេល​បន្ត​ការប្រកួត​ទៀត ក៏ត្រូវ​សារិទ្ធ វាយឲ្យ​សន្លប់​តែម្តង។​
​
សេក ទីណា​ល់ ក្លិប​អង្គរ​មានជ័យ​ខេត្តសៀមរាប បាន​យកឈ្នះ ហ៊ែ​ល វិចិត្រ អ្នក​ប្រដាល់​ក្លិប​ឃ្លាំងមឿង​កីឡា​ខេត្តពោធិសាត់ ក្នុង​ទឹក​ទី​៤ ក្នុងការ​ជួបគ្នា​ក្នុង​ប្រភេទ​ទម្ងន់​៥១​គីឡូក្រាម។
​
ចំណែក ប្រាក់ ភារ​ម្យ ក្លិប​យុវ​វាល​ស្បូវ បាន​វាយ​ឈ្នះ​ឡុង ទីណា ក្លិប​អមតៈ​គុន​ខ្មែរ​ខេត្តសៀមរាប ក្នុង​ទឹក​ទី​២ ហើយ​ផន សុខ​វិបុល ក្លិប​តា​ព្រហ្ម​មានជ័យ ប្រកួត​ឈ្នះ​ឈុត ប្រាក់​កាក់ ក្លិប​តា​ឯក​ដំបង​ដែក​មាន​រិ​ទ្ធ​ខេត្តព្រៃវែង ដោយ​ពិន្ទុ។

•​រឿ​ម វ​ណ្ណះ ចាញ់ ប៉ើ​ត សេន​ឡេ​ក​ទឹក​១ ខណៈ សា​រឿន ច័ន្ទ ឈ្នះ ណាន់​ដោយ​ពិន្ទុ​អ្នក​ប្រដាល់​ជើង​ខ្លាំង​កម្ពុជា​រឿ​ម វ​ណ្ណះ ក្លិប​រាជសីហ៍​ខេត្តបន្ទាយមានជ័យ បាន​ប្រកួត​ចាញ់​អ្នក​ប្រដាល់​ថៃ ប៉ើ​ត សេន​ឡេ​ក​(Pert Senlek) ក្នុង​ទឹក​ទី​១ នៅក្នុង​ការជួប​ប្រកួត​គ្នា កាលពី​រសៀល​ថ្ងៃអាទិត្យ​ទី​០៦​ ខែ​មករា ​ឆ្នាំ​២០១៩ លើស​ង្វៀន​Wurkz របស់​SEATV។
​
រឿ​ម វ​ណ្ណះ តាមពិត​គេ​ជា​អ្នក​លោត​ទៅ​វាយ​កែង​បំបែក​ថ្ងាស​របស់​ថៃ​ទេ តែ​ចៃដន្យ​គេ​ត្រូវ​រង​នឹង​កែង​របស់​ប៉ើ​ត សេន​ឡេ​ក ដែល​ចាំ​ត្រងនោះ ធ្វើឲ្យ​រឿ​ម វ​ណ្ណះ សន្លប់​ធំ​ដោយសារ​ត្រូវ​កែង​របស់​ប៉ើ​ត សេន​ឡេ​ក ចំ​គល់​ថ្គាម បណ្តាល​ឲ្យ​វ​ណ្ណះ ​សន្លប់​ធំ​តែម្តង។ រឿ​ម វ​ណ្ណះ និង អ្នក​ប្រដាល់​ថៃ​ប៉ើ​ត សេន​ឡេ​ក ប្រកួត​គ្នា​ក្នុង​ទម្ងន់​៦៣,៥០០​គីឡូក្រាម​។
​
ចំពោះ សារឿន ច័ន្ទ អ្នក​ប្រដាល់​ក្លិប​តា​ព្រហ្ម​មានជ័យ​វិញ គេ​បាន​វាយ​ឈ្នះ​អ្នក​ប្រដាល់​ថៃ​ឈ្មោះ​ណាន់ (Nan) ដោយ​ពិន្ទុ ក្រោយពី​ប្រកួត​គ្នា​៥​ទឹក​ពេញ​នោះ។
​ ​
ណាន់ អ្នក​ប្រដាល់​ថៃ​រូបនេះ មាន​កណ្តាប់ដៃ​ខ្លាំង​គួរសម​ដែរ ដែល​ធ្វើអោយ​សារឿន ច័ន្ទ ចង់​គាំង​ម្តងៗ​ដែរ ក្នុងការ​ប្រកួត​ក្នុង​ទឹក​ចុងក្រោយ​នោះ តែដោយសារ​សារឿន ច័ន្ទ គេ​រឹងមាំ ​និង​ស៊ូ​ចំពោះ​ការ​ប្រកួត​នោះ បាន​ទប់ទល់​និង​វាយបក​វិញ ហើយ​បានឈ្នះ​ពិន្ទុ ណាន់ វិញ ក្រោយ​បញ្ចប់​ការប្រកួត។​
​
ដោយឡែក ការប្រកួត​រវាង​អ្នក​ប្រដាល់​រួម​ជាតិ​វិញ ឆ ឆៃ អ្នក​ប្រដាល់​ក្លិប​ពន្លឺ​សាមគ្គី​ខេត្តបាត់ដំបង បាន​វាយ​ឈ្នះ​អ្នក​ប្រដាល់​ម៉ន ភារ​ម្យ ក្លិប​ការិយាល័យ​ទី​៥ កង ទ័ពជើងគោក​ដោយ​ពិន្ទុ។ ឯ លីន សា​ហ៊ីម អ្នក​ប្រដាល់​ក្លិប​បូរី​រាជសីហ៍​មាន​រិ​ទ្ធ ប្រកួត​ស្មើ​ពិន្ទុ​ជាមួយ​សៀន វិបុល អ្នក​ប្រដាល់​ក្លិប​រាជសីហ៍​ខេត្តរតនគិរី ក្នុង​ក្នុង​ការជួប​ប្រកួត​គ្នា​ទម្ងន់​៦៧​គីឡូក្រាម៕​



Source: Kampuchea Thmey Daily