ភ្នំពេញ ៖ រដ្ឋមន្ត្រីក្រសួងសុខាភិបាល បានអំពាវនាវឲ្យប្រជាពលរដ្ឋប្រុងប្រយ័ត្នខ្ពស់ចំពោះការពុលចំណីអាហារនៅក្នុងពិធីបុណ្យចូលឆ្នាំចិន វៀតណាមដែលនឹងប្រព្រឹត្តិទៅចាប់ពីថ្ងៃទី៤ ខែកុម្ភៈ ឆ្នាំ២០១៩ខាងមុខនេះ។
ការអំពាវនាវនេះ ដោយសារនៅក្នុងពិធីបុណ្យចូលឆ្នាំចិន វៀតណាមម្តងៗតែងតែមានការពុលចំណីអាហារ និងបន្លែផ្លែឈើផ្សេងៗព្រោះថាពិធីបុណ្យនេះ មានមនុស្សប្រមូលផ្តុំគ្នាកកកុញច្រើនដែលមានអាហារស្អាត និងមិនស្អាតនៅឡាយឡំគ្នា។
តាមរយៈសេចក្ដីជូនដំណឹងមួយដែលចេញផ្សាយកាលពីពេលថ្មីៗនេះលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានណែនាំឲ្យប្រជាពលរដ្ឋត្រូវប្រកាន់ខ្ជាប់នូវវិធានការអនាម័យឲ្យបានខ្ជាប់ខ្ជួនរួមមានផឹកស្អាតរស់នៅស្អាតនិងបរិភោគស្អាតដើម្បីការពារសុខភាពពីជំងឺដង្កាត់ផ្សេងៗដូចជាជំងឺឈឺពោះ ជំងឺរាករូសឬក្អួតចង្អោរជាដើមដែលបណ្តាលមកពីការបរិភោគចំណីអាហារគ្មានអនាម័យ។
ជាមួយគ្នានេះដែរ លោក សាស្ត្រាចារ្យ ម៉ម ប៊ុនហេងបានជំរុញឲ្យប្រជាពលរដ្ឋត្រូវពិសាទឹកស្អាតឬទឹកដាំពុះនិងបរិភោគចំណីអាហារដែលមានអនាម័យ ត្រូវលាងដៃនឹងសាប៊ូអំឡុងមុនពេលរៀបចំអាហារ មុនបរិភោគនិងក្រោយបន្ទោបង់ លាងសំអាតបន្លែផ្លែឈើ សំអាតសម្ភារៈប្រើប្រាស់សម្រាប់ចម្អិនអាហារឲ្យបានស្អាតនិងត្រូវចម្អិនអាហារឲ្យបានឆ្អិនល្អពិសេសសាច់ សត្វស្លាបនិង អាហារសមុទ្រ។
ទន្ទឹមនឹងនេះលោកសាស្ត្រាចារ្យក៏បានណែនាំឲ្យប្រជាពលរដ្ឋពិសេសប្រជាពលរដ្ឋនៅតាមតំបន់ជនបទត្រូវមានការប្រុងប្រយ័ត្នចំពោះការទទួលទានស្រា សឬស្រាថ្នាំនិងត្រូវមើលប្រភពផលិតឲ្យបានច្បាស់លាស់និងមានការទទួលស្គាល់ពីមន្ត្រីជំនាញត្រឹមត្រូវជាមុនសិនមុនទិញមកបរិភោគដើម្បីជៀសវាងកុំឲ្យមានការពុលស្រាដែលធ្វើឲ្យប៉ះពាល់ដល់សុខភាពឬអាយុជីវិតដោយសារក្នុងស្រាសឬស្រាថ្នាំមានសារធាតុមេតាណុលខ្ពស់ ។
ជាងនេះទៅទៀត លោក សាស្ត្រាចារ្យបានណែនាំឲ្យប្រជាពលរដ្ឋមិនត្រូវប៉ះពាល់ដល់សត្វបក្សីឈឺឬងាប់ឬយកទៅធ្វើម្ហូបអាហារឡើយព្រោះអាចឆ្លងជំងឺផ្តាសាយបក្សីដោយសារនៅក្នុងរដូវចូលឆ្នាំចិនមានការធ្វើចរាចរសត្វបក្សីច្រើនដែលដឹកមកពីតំបន់ជនបទឬនាំចូលមកពីប្រទេសជិតខាងដែលមិនមានប្រភពច្បាស់លាស់។
លោករដ្ឋមន្ត្រីបានអំពាវនាវដល់ស្ថាប័ន និងអាជ្ញាធរពាក់ព័ន្ធទាំងអស់ត្រូវចុះត្រួតពិនិត្យនិងផ្សព្វផ្សាយអប់រំ ដល់ប្រជាពលរដ្ឋ ក្នុងមូលដ្ឋានជាប្រចាំ ជាពិសេសអ្នកផលិត និងអ្នកចែកចាយបន្តនូវបន្លែផ្លែឈើទាំងអស់មិនត្រូវប្រើសារធាតុគីមីពុលដើម្បីការពារដល់សុខភាពប្រជាពលរដ្ឋ។
ចំណែកលោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាពបានគាំទ្រក្រសួងសុខាភិបាលដែលបានណែនាំដល់ប្រជាពលរដ្ឋឲ្យប្រុងប្រយ័ត្នចំពោះសុខភាពនៅក្នុងពិធីបុណ្យចូលឆ្នាំចិននេះ។
តែយ៉ាងណាក៏ដោយ លោកស្នើឲ្យក្រសួងគួរតែផ្សព្វផ្សាយពីប្រភេទចំណីអាហារឬផ្លែឈើណាដែលប៉ះពាល់ដល់សុខភាពប្រជាពលរដ្ឋដើម្បីឲ្យពួកគេបានដឹងនិងមានការប្រុងប្រយ័ត្ន។
ទន្ទឹមនឹងនេះលោកក៏បានស្នើឲ្យស្ថាប័នពាក់ព័ន្ធនានាត្រូវបង្កើនការចុះត្រួតពិនិត្យចំណីអាហារផ្លែឈើដែលនាំចូលតាំងពីដើមទីរហូតដល់ចុងទីដើម្បីការពារដល់សុខភាពប្រជាពលរដ្ឋនៅក្នុងឱកាសបុណ្យចូលឆ្នាំចិននេះ។
គួរបញ្ជាក់ថាពិធីបុណ្យចូលឆ្នាំចិន-វៀតណាមនៅឆ្នាំនេះនឹងប្រព្រឹត្តិរយៈពេល៣ថ្ងៃគឺចាប់ពីថ្ងៃទី៤ទី៥និងទី៦ខែកុម្ភៈឆ្នាំ២០១៩ខាងមុខនេះ៕
Source: Kampuchea Thmey Daily
0 Comments