បាត់ដំបង ៖ ករណីហិង្សាដោយមានស្ថានទម្ងន់ បានកើតឡើងផ្ទួនៗគ្នា ព្រមទាំងបានបង្កឲ្យមានមនុស្សរងរបួសផងដែរ ដែលបង្កឡើងដោយក្រុមក្មេងទំនើង មិនស្គាល់សាវតារ បានធ្វើសកម្មភាពកាប់គ្នានៅកណ្តាលក្រុងតែម្តង ដោយមិនមានការរំខានដល់លោកអធិការ នគរបាលក្រុងបាត់ដំបង
សោះឡើយ។
យោងតាមប្រភពមួយចំនួនបាននិយាយថា បើទោះបីជាមានសេចក្ដីរាយការណ៍យ៉ាងបន្ទាន់ដើម្បីសុំអន្តរាគមន៍ពីលោកអធិការក្រុងក៏ដោយ ក៏គេមិនបានឃើញកម្លាំងទៅដល់ភ្លាមៗដែរ ហើយមានរឿងខ្លះ គឺគ្មានប៉ូលិសម្នាក់ទៅកន្លែងកើតហេតុទាល់តែសោះ។
ហេតុការណ៍ នៃករណីហិង្សាដោយប្រើដាវសាំម៉ូរ៉ៃនេះ បានកើតឡើងកាលពីថ្ងៃទី៥ ខែមករា ឆ្នាំ២០១៩ វេលាម៉ោង៩និង៥៥នាទីយប់ នៅចំណុចផ្លូវលេខ១ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដែលបង្កឡើងដោយជនសង្ស័យចំនួន៤នាក់ មិនស្គាល់សាវតារ បានជិះម៉ូតូចំនួន០២គ្រឿង ធ្វើសកម្មភាពកាប់ទៅលើជនរងគ្រោះចំនួន០២នាក់ ទាំងមិនដឹងខ្លួន ក្រោយធ្វើសកម្មភាពក្រុមជនសង្ស័យបានគេចខ្លួនបាត់អស់។
ជនរងគ្រោះទាំង២នាក់ មាន ១.ឈ្មោះ វិបុល កក្កដា ភេទប្រុស អាយុ២៣ឆ្នាំ មានទីលំនៅភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង ( រងរបួសរយះក្រញរដៃខាងឆ្វេង ដាច់សរសៃម្រាមចង្អុលមួយ ) និង ២.ឈ្មោះ ជា ម៉ៅ ភេទប្រុស អាយុ១៧ឆ្នាំ មានទីលំនៅភូមិស្វាយធំ ឃុំអន្លង់វិល ស្រុកសង្កែ ខេត្តបាត់ដំបង (ដាច់រយះលើកែងដៃខាងឆ្វេង ) ដែលបច្ចុប្បន្នកំពុងសម្រាកព្យាបាលនៅក្នុងមន្ទីរពេទ្យនៅឡើយ។
ដោយឡែក នៅមុននេះមួយថ្ងៃ គឺប្រភពមួយបាននិយាយថា នៅក្នុងភោជនីយដ្ឋាន ប៊ី ធី ប៊ី ខនថេន័រ ក្នុងភូមិរំចេក៤ សង្កាត់រតនៈ ក្រុងបាត់ដំបង ក៏មានករណីនេះបានកើតឡើងដែរ គឺនៅពេលយប់ខណៈដែលក្នុងភោជនីយដ្ឋាននេះ មានរៀបចំកម្មវិធីខួបកំណើត។
ប្រភពដដែលបានបន្តថា នៅក្នុងយប់នោះ គឺមានយុវជនមួយក្រុម បានជិះម៉ូតូមក ដោយម្នាក់មានកាន់ដាវផងដែរ បានសម្រុកចូលទៅកាន់មនុស្សក្នុងកម្មវិធីនោះ ឯម្នាក់ទៀតក៏បានកាប់ទៅលើយុវជនម្នាក់ ដែលកំពុងអង្គុយនិយាយទូរស័ព្ទនៅខាងមុខភោជនីយដ្ឋាននេះ បណ្តាលឲ្យរងរបួសមនុស្សមួយចំនួន។
ភ្លាមៗនោះដែរ ក៏មានអ្នកខ្លះអះអាងថា គេបានផ្តល់ព័ត៌មានទៅលោកអធិការក្រុងដែរ ប៉ុន្តែគ្មានឃើញស្រមោលសមត្ថកិច្ចមកម្នាក់សោះ ដែលគេសង្ស័យថា បច្ចុប្បន្ននេះប៉ូលិសក្រុងមានតែឈ្មោះ ដោយគេបានយកសុទ្ធតែប្រជាការពារមកប្រើជំនួសវិញ។
បច្ចុប្បន្ន ក្រុមអន្តរាគមន៍ បង្ការ បង្ក្រាប នៃស្នងការដ្ឋាននគរបាលខេត្ត កំពុងតែធ្វើការស្រាវជ្រាវដើម្បីតាមចាប់ខ្លួនជនសង្ស័យយកមកផ្ដន្ទាទោសតាមផ្លូវច្បាប់ ដោយឡែក សមត្ថកិច្ចក្រុងគេមិនដែលឃើញបំបែកសំណុំរឿងណាបានមួយសោះឡើយ៕
Source: Kampuchea Thmey Daily
0 Comments