តាកែវ ៖ ជនសង្ស័យម្នាក់ ត្រូវបានប្រជាពលរដ្ឋព្រួតគ្នាចាប់ប្រគល់ឲ្យសមត្ថកិច្ចភ្លាមៗ ក្រោយពីបានធ្វើសកម្មភាពគាស់កញ្ចក់រថយន្តបំណងលួចយកសម្ភារៈ តែសំណាងល្អត្រូវម្ចាស់ឃើញទាន់ស្រែកឆោឡោឡើងផ្អើលអ្នកជិតខាង។
ហេតុការណ៍នេះបានកើតឡើង នៅថ្ងៃទី០៧ ខែមករា ឆ្នាំ២០១៩ វេលាម៉ោង០៤និង០០នាទីទៀបភ្លឺនៅចំណុចផ្ទះ ឈ្មោះ កែវ នី ភេទស្រី អាយុ៥៨ឆ្នាំ ស្ថិតនៅភូមិតាសូ ឃុំតាភេម ស្រុកត្រាំកក់ ខេត្តតាកែវ។
ប៉ូលិសស្រុកត្រាំកក់បានប្រាប់ថា ករណីនេះបង្កឡើងដោយជនសង្ស័យ ឈ្មោះ ទួន ម៉ៅ ភេទប្រុស អាយុ៣២ឆ្នាំ រស់នៅភូមិត្រពាំងស្វាយ ឃុំតាភេម ស្រុកត្រាំកក់ ដែលជនសង្ស័យបានគាស់កញ្ចក់រថយន្តបំណងរកលួចសម្ភារៈក្នុងរថយន្តរបស់ ឈ្មោះ ទឹម ចន្ថា ភេទប្រុស អាយុ៣៥ឆ្នាំ រស់នៅភូមិតាសូ ឃុំតាភេម ស្រុកត្រាំកក់ ទាំងមិនបានដឹងថា ម្ចាស់កំពុងដេកក្នុងរថយន្ត។
ស្របពេលកំពុងធ្វើសកម្មភាពនោះម្ចាស់រថយន្តក៏ភ្ញាក់ដឹងខ្លួនទាន់ ហើយបានស្រែកថាចោរៗ និងបានប្រតាយប្រតប់គ្នាជាមួយជនសង្ស័យ ធ្វើឲ្យជនសង្ស័យបាញ់ជំពាម និងបានដកកាំបិតចាក់ ទៅលើជនរងគ្រោះបណ្ដាលឲ្យត្រូវដៃទាំងសងខាង រងរបួសធ្ងន់ បញ្ជូនទៅមន្ទីរពេទ្យខេត្តតាកែវ។
ចំណែក ជនសង្ស័យ ក៏ត្រូវប្រជាពលរដ្ឋចាប់បានប្រគល់ជូនសមត្ថកិច្ចយកទៅកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី៕
Source: Kampuchea Thmey Daily
0 Comments