រតនគិរី ៖ យុវជនម្នាក់ ត្រូវបានជនមិនស្គាល់មុខ ប៉ុនប៉ងមនុស្សឃាត ដោយយកអាវុធកែច្នៃបាញ់ត្រូវមួយគ្រាប់ចំភ្លៅខាងស្តាំរបួសជាទម្ងន់។
ករណីប៉ុនប៉ងមនុស្សឃាតធ្វើឡើងកាលពីវេលាម៉ោង៩និង៩នាទីយប់ថ្ងៃច័ន្ទ ៩រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣១ ខែធ្នូ ឆ្នាំ២០១៨ នៅចំណុចខាងត្បូងបឹងកន្សែង ស្ថិតក្នុងភូមិទេសអន្លុង សង្កាត់បឹងកន្សែង ក្រុងបានលុង។
មន្ត្រីនគរបាលមូលដ្ឋានបានឲ្យដឹងថា ជនរងគ្រោះឈ្មោះ នឿន វីវ៉ា ភេទប្រុស អាយុ១៨ឆ្នាំ ជនជាតិគ្រឹង រស់នៅភូមិតាអងប៉ុក ឃុំតាអង ស្រុកកូនមុំ ខេត្តរតនគិរី ត្រូវបានជនមិនស្គាល់អត្តសញ្ញាណជិះម៉ូតូមួយគ្រឿងមិនស្គាល់ម៉ាក ធ្វើសកម្មភាពបាញ់មួយគ្រាប់ត្រូវចំភ្លៅខាងស្តាំ ក្នុងខណៈជនរងគ្រោះ ឈប់ម៉ូតូនៅក្បែរសួនច្បារខាងត្បូងបឹងកន្សែង។ ក្រោយពីធ្វើសកម្មភាពរួចមក ជនសង្ស័យបានជិះម៉ូតូរត់គេចខ្លួនបាត់ស្រមោល។
បន្ទាប់មកសមត្ថកិច្ចមូលដ្ឋាន ចុះមកដល់កន្លែងកើតហេតុ បានដឹកបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកខេត្ត។ ក្រោយការវះកាត់ឃើញមានគ្រាប់កង់មួយគ្រាប់បៀមជាប់នឹងភ្លៅជនរងគ្រោះ។
បច្ចុប្បន្នកម្លាំងការិយាល័យជំនាញខេត្តសហការជាមួយកម្លាំងអធិការក្រុង បានលុងធ្វើការចុះស្រាវជ្រាវតាមរកមុខសញ្ញាជនដៃដល់ចាប់យកមកផ្តន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments