ម៉ន សា​ម៉េ​ត និង គួ​ន ប៊ុន​ហ៊ីម ដឹក​ដៃ​គ្នា​ទៅ​ពាក់កណ្ដាល​ផ្ដាច់ព្រ័ត្រ​

​ប្រដាល់ ៖ ម៉ន សា​ម៉េ​ត ​ក្លិប​កងចក្រ​រាជសីហ៍ និង គួ​ន ប៊ុ​ម​ហ៊ីម អ្នក​ប្រដាល់​ក្លិប​ពន្លឺ​សាមគ្គី​ខេត្ត​បាត់​ដំបង បាន​ដឹក​ដៃ​គ្នា​ទៅ​វគ្គ​ពាក់កណ្ដាល​ផ្ដាច់ព្រ័ត្រ បន្ទាប់ពី​ពួកគេ​ទាំងពីរ បាន​វាយ​ឈ្នះ​លើ​គូប្រកួត​ក្នុង​ជម្រុះ​ចុងក្រោយ វគ្គ​១​ភាគ​៤​ផ្ដាច់ព្រ័ត្រ នៃ​ព្រឹត្តិការណ៍​TV5 Boxing Knock-Out Series by K-Cement កាលពី​យប់​ថ្ងៃទី​២៦​មករា​នោះ។​
​
នៅក្នុង​ការប្រកួត​ជម្រុះ​ចុងក្រោយ វគ្គ​១​ភាគ​៤​ផ្ដាច់ព្រ័ត្រ​(៨​នាក់​ចុងក្រោយ​) អ្នក​ប្រដាល់​ពូកែ​ឌឺ​យុគ យក្ស​ផ្លែ ក្លិប​បូរី​រាជសីហ៍​មាន​រិ​ទ្ធ ទទួល​បរាជ័យ​ក្រោម​កណ្ដាប់ដៃ​ម៉ន សា​ម៉េ​ត​ក្លិប​កងចក្រ​រាជសីហ៍ ។​ យក្ស​ផ្លែ គេ​ហាក់​ញញើត​ចំពោះ​ម៉ន សា​ម៉េ​ត​តែម្តង ដោយ​ក្នុង​ទឹក​១​និង​ទឹក​២ គេ​មិនសូវ​ចូល​វាយ​ប្តូរ​ទេ ទាល់តែ​ដល់​ទឹក​៣​ទើប​ឃើញ​យក្ស​ផ្លែ​ចូល​វាយ​ប្ដូរ​កណ្ដាប់ដៃ​ជាមួយ​ ម៉ន សា​ម៉េ​ត ប៉ុន្តែ​អ្វីៗ​គឺ​វាយ​ហួសពេល​បាត់ទៅហើយ ដោយ​យក្ស​ផ្លែ​ចាញ់ ​សា​ម៉េ​ត ​ពីរ​ទឹក​ដំបូង​ដាច់​បាត់ទៅហើយ​។​
​
​អ្នក​ប្រដាល់​ទាំង​២​រូបនេះ សុទ្ធតែ​ពូកែ​ឌឺ​ដាក់​គូប្រកួត​ដូចគ្នា​តែ​ សា​ម៉េ​ត​ ឌឺ​ ហើយ​ វាយ​ល្អ​ចំពោះ​យក្ស​ផ្លែ ​ឌឺ​ តែ​វាយ​អន់​។ ​យក្ស​ផ្លែ​ ដែលមាន​ជំនឿ​ចិត្ត​ថា​នឹង​ប្រជែង​បាន​កៅអី​សម្រាប់​វគ្គ​ពាក់កណ្ដាល​ផ្ដាច់ព្រ័ត្រ​នោះ​ ត្រូវ​សា​ម៉េ​ត ​ប្រើ​កណ្ដាប់ដៃ​វាយ​រាប់​៨​ នៅ​ទឹក​ទី​២។​
​ ​
ដោយ​ការប្រកួត​មានតែ​៣​ទឹក​នោះ ទោះបី​យក្ស​ផ្លែ​រក​ឱកាស​ដើម្បី​វាយ​សង្គ្រុប​លើ ​សា​ម៉េ​ត​ វិញ​ ក៏ ​ទៅ​មិន​រួច​ដែរ មិនតែប៉ុណ្ណោះ​ គេ​បែរជា​ត្រូវ​ សា​ម៉េ​ត​ ច្រាស់​សង​មកវិញ​យ៉ាង​ចាស់ដៃ។ ​បញ្ចប់​ការ​ប្រកួត​ សា​ម៉េ​ត​ ឈ្នះ​យក្ស​ផ្លែ​ ដោយ​ពិន្ទុ​ដាច់ ៥​ទល់​០ គឺ​ចៅក្រម​ទាំង​៥​សុទ្ធតែ​ផ្ដល់​ពិន្ទុ​ឲ្យ​ សា​ម៉េ​ត​ឈ្នះ​ទាំងអស់គ្នា។​
​ ​
ប្រកួត​ក្នុង​ព្រឹត្តិការណ៍​នេះដែរ គួ​ន ប៊ុន​ហ៊ីម ​ក្លិប​ពន្លឺ​សាមគ្គី​ខេត្ត​បាត់ដំបង ​បាន​យកឈ្នះ​អ្នក​ប្រដាល់​យ៉​ន ពិសី ​មកពី​ក្លិប​សាល​វ័​ន្ត​កីឡា​ដោយ​ពិន្ទុ​ដាច់​ដែរ។​
​
​ការប្រកួត​ដែលមាន​តែ​៣​ទឹក​នោះ ​ប៊ុន​ហ៊ីម ​មានប្រៀប​លើ​ ពិសី​ ទាំង​៣​ទឹកតែ​ម្ដង។ ចៅក្រម​ទាំង​៥​សុទ្ធតែ​ផ្ដល់​ពិន្ទុ​ឲ្យ ​ប៊ុន​ហ៊ីម ​ឈ្នះ​ទាំងអស់គ្នា។​
​
​ជាមួយនឹង​ជ័យជំនះ​នេះ គួ​ន ប៊ុន​ហ៊ីម និង ម៉ន សា​ម៉េ​ត ដឹក​ដៃ​គ្នា​ ឡើង​ទៅ​ប្រកួត​បន្ត​វគ្គ​ពាក់​កណ្ដាល​ផ្ដាច់ព្រ័ត្រ ឯ យុគ យក្ស​ផ្លែ និង យ៉​ន ពិសី ហាលអាវ​ត្រឹមនេះ។​
​ ​
ការប្រកួត​ជា​មិត្តភាព​ជាមួយ​អ្នក​ប្រដាល់​ថៃ​វិញ​នោះ ​មាស សុជាតិ ​ក្លិប​ឃ្លាំងមឿង​កីឡា​ប្រកួត​ចាញ់​អ្នក​ប្រដាល់​ជើង​ខ្លាំង ​ថៃ​ភេ​ច ណាំ​អេក (Phich Nam Ek)​ដោយ​ពិន្ទុ​ដាច់​តែម្ដង។​
​ ​
ការប្រកួត​រវាង​អ្នក​ប្រដាល់​រួម​ជាតិ​ ក្រៅ​ព្រឹត្តិការណ៍​ពានរង្វាន់​វិញ​នោះ ​សុខ វី​រ៉ា​ ក្លិប​សំរោង​កោង​ ខេត្ត​បាត់ដំបង​ ប្រកួត​ចាញ់ ​ហ៊ឹម គឹម​រៀង ​ក្លិប​តា​ព្រហ្ម​មានជ័យ​ដោយ​ពិន្ទុ។​ ម៉ៃ សុភ័ក្ត្រ​ ក្លិប​ស្វាយ​រលំ​ឬ​ទ្ធិ​ជ័យ​ប្រកួត​ចាញ់​អ្នក​ប្រដាល់​ អេ​ន ស៊ា​ង​ឡុង​ ក្លិប​តា​ព្រហ្ម​មានជ័យ​ដោយ​ពិន្ទុ៕

 

​

Source: Kampuchea Thmey Daily