ភ្នំពេញ ៖ បច្ចុប្បន្នការប្រើប្រាស់ប័ណ្ណឥណទានពន្ធនិងប័ណ្ណឥណទានប្រភេទវីសាមានការកើនឡើងគួរឲ្យកត់សំគាល់នៅប្រទេសកម្ពុជា ព្រោះថាការប្រើប្រាស់ប័ណ្ណទាំងនេះងាយស្រួលដល់អតិថិជនក្នុងការទូទាត់សាច់ប្រាក់ និងទិញឬកក់ទំនិញឬសណ្ឋាគារតាមរយៈអនឡាញនៅទូទាំងពិភពលោកផងដែរ។
លោក រ័ត្ន សុវណ្ណនរៈ អគ្គនាយកត្រួតពិនិត្យធនាគារជាតិនៃកម្ពុជាបានឲ្យដឹងថា ការធ្វើប្រតិបត្តិការផ្តល់សេវាទូទាត់ជាប័ណ្ណឥណពន្ធ និងឥណទាន ដែលជាសេវាធនាគារកំពុងមានភាពរីកចម្រើន និងប្រកួតប្រជែងខ្លាំងក្នុងព្រះរាជាណាចក្រកម្ពុជា ហើយក៏ បានចូលរួមចំណែកគាំទ្រគោលនយោបាយរបស់រាជរដ្ឋាភិបាល ក្នុងការអភិវឌ្ឍវិស័យធនាគារ និង ហិរញ្ញវត្ថុនៅកម្ពុជា ជាពិសេសការជំរុញបរិយាប័ន្នហិរញ្ញវត្ថុតាមរយៈការពង្រីក សេវាទូទាត់សង ប្រាក់សំដៅជួយពង្រឹងកំណើនសេដ្ឋកិច្ចរបស់ប្រទេសទាំងមូល។
ថ្លែងនៅក្នុងពិធីបើកសម្ពោធដាក់ឲ្យប្រើប្រាស់ ជាផ្លូវការប័ណ្ណឥណពន្ធវីសា និងប័ណ្ណឥណទានវីសារបស់ធនាគារស្ថាបនាសហការជាមួយក្រុមហ៊ុនវីសាកាលពីល្ងាចថ្ងៃទី១៥ខែមករានៅសណ្ឋាគារ សូហ្វីតែលភ្នំ ពេញ លោកបានបន្តថា ការទូទាត់តាមរយៈប្រតិបត្តិការទាំងនេះបានបញ្ជាក់ពីការធ្វើពិពិធកម្មសេវាហិរញវត្ថុរបស់គ្រឹះស្ថានហិរញវត្ថុក្នុងគោលដៅផ្តល់នូវភាពងាយស្រួលក្នុងការប្រើប្រាស់សេវហិរញវត្ថុកាន់តែសំបូរបែបនិងស្វែងរកប្រភបចំណូលបន្ថែមដល់ធនាគារក្រៅពីប្រភពចំណូលចម្បងដែលបានមកពីការផ្តល់ឥណទាន។
ជាងនេះទៀតលោកបានបន្ថែមថា ការផ្តល់សេវាទូទាត់ជាប័ណ្ណឥណពន្ធ និងឥណទាននេះកំពុងផ្តល់អំណោយផលជាច្រើនដល់សាធារណជនក្នុងការប្រើប្រាស់សេវាធនាគារប្រកបដោយសុវត្ថិភាព ប្រសិទ្ធភាពនិងមានការចំណាយលើថ្លៃទូទាត់ទាប។
លោកបានបញ្ជាក់ថា ការប្រើសេវាទូទាត់តាមប័ណ្ណឥណពន្ធបានកើនឡើង១៧,៧០ភាគរយដល់២០៤ ៧០៦៨ប័ណ្ណ ខណៈប័ណ្ណឥណទានបានកើនឡើង៤៤,៨៤ភាគរយដល់៩៩៤៩៥ប័ណ្ណធៀបនឹងខែកញ្ញាឆ្នាំ២០១៧កន្លងទៅ។
ការសហការគ្នាបង្កើតនិងផ្តល់ជូននូវផលិតផល ហិរញ្ញវត្ថុងាយស្រួលថ្មីដល់ អតិថិជនរបស់ធនាគារ ស្ថាបនារួមមានប័ណ្ណឥណពន្ធវិសា និងប័ណ្ណឥណទានវីសានេះរួមមានប្រភេទប័ណ្ណ Classic Gold និង Platinum ដែលត្រូវបានដាក់ឲ្យប្រើប្រាស់នៅសាខាទាំង ១៦៩ សាខាទូទាំងប្រទេសកម្ពុជាផ្តល់ជូននូវជម្រើសផ្សេងៗគ្នាតម្រូវតាមបែបបទជីវិត និងតម្រូវការ របស់អតិថិជន។
លោក លឹម អូន អនុប្រធាននាយកប្រតិបត្តិធនាគារ ស្ថាបនា បានមាន ប្រសាសន៍ថា “ប័ណ្ណវីសាមិនមែនជា ផលិតផលថ្មីនៅកម្ពុជាទេ។ នៅធនាគារ ស្ថាបនា ប័ណ្ណវីសាគឺជាផ្នែកមួយ នៃការអភិវឌ្ឍផលិតផល យុទ្ធសាស្ត្រស្នូលរបស់ធនាគារ។ ប្រព័ន្ធធនាគារឌីជីថលរបស់យើងនឹង ផ្តល់ជូននូវចំណាត់ថ្នាក់ល្អបំផុត សម្រាប់អតិថិជន របស់យើងក្នុងការគ្រប់គ្រងហិរញ្ញវត្ថុ គ្រប់ទីកន្លែង និងគ្រប់ ពេលវេលានៅលើឧបករណ៍ ផ្សេងៗ។ តាមរយៈការរួមសហការជាមួយក្រុមហ៊ុនវីសា ដែលជាដំណោះស្រាយលើការទូទាត់ជាសកល ឈានមុខគេ យើងខិតខំប្រឹងប្រែងធ្វើយ៉ាងណា ដើម្បីឲ្យអតិថិជនរបស់យើងអាចធ្វើការទូទាត់ការចំណាយ ផ្សេងៗដោយមិនចាំបាច់ដាក់ប្រាក់តាមខ្លួន។”
ចំណែកអ្នកស្រី ជុំ ម៉ូនីកា នាយិកាគ្រប់គ្រងក្រុមហ៊ុនវីសា ប្រចាំប្រទេសកម្ពុជា បានមានប្រសាសន៍ថា “នៅវីសា តួនាទីរ បស់យើង គឺត្រូវធ្វើការយ៉ាងជិតស្និទ្ធជាមួយដៃគូសំខាន់ៗរបស់យើង ក្នុងនោះរួមមានធនាគារ ស្ថាបនា ដើម្បី រៀបចំនិងផ្តល់នូវដំណោះ ស្រាយប្រកបដោយភាពច្នៃប្រឌិតដែលជួយបង្កើនការទូទាត់តាមរយៈអេឡិចត្រូនិក នៅក្នុងប្រទេស។ ជាមួយនឹងភាពជាដៃគូនេះ យើងអាចផ្តល់ជូនប្រជាជនកម្ពុជាកាន់តែច្រើននូវជម្រើសក្នុង ការប្រើប័ណ្ណឥណទាន (Credit Card) ឬប័ណ្ណ ឥណពន្ធ (Debit Card) របស់ពួកគេ គ្រប់ទីកន្លែងដែល Visa ទទួលយក។”
គួរបញ្ជាក់ថាធនាគារ ស្ថាបនា គឺជាធនាគារពាណិជ្ជឈានមុខគេមួយក្នុងប្រទេសកម្ពុជាដែលមាន ទ្រព្យសម្បត្តិសកម្ម សរុបជាង ១ ពាន់លានដុល្លារអាមេរិកនិងមានបណ្តាញសាខាធំជាង គេលំដាប់ទីពីរនៅក្នុងប្រទេស ដែលមាន ១៦៩ សាខា និងបុគ្គលិកជាង ៤០០០ នាក់ និងម៉ាស៊ីនអេធីអឹមចំនួន១៤៧ នៅទូទាំងប្រទេស៕
Source: Kampuchea Thmey Daily
0 Comments