វង្ស ណយ អ្នកប្រដាល់កម្ពុជា នៃក្លិបកុលបុត្រគុនខ្មែរ និង សេង ស្រឿន អ្នកប្រដាល់ក្លិបមហិទ្ធរិទ្ធមេសរថ្ងកមានជ័យ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នារសៀលថ្ងៃសៅរ៍ ទី០៣ ខែកុម្ភៈ ឆ្នាំ២០១៩នេះ។
សម្រាប់ការផ្គូផ្គងនេះ គូប្រកួតរបស់ វង្សណយ គឺជាអ្នកប្រដាល់ថៃឈ្មោះ តាក់ សិលា ប្រាន២៦ (TuksilaPhran26) ប្រកួតគ្នាក្នុងទម្ងន់៧១គីឡូក្រាម។ អ្នកប្រដាល់ថៃ ដែលជាគូសងសឹករបស់ វង្ស ណយនោះ ជាអ្នកប្រដាល់ល្បីឈ្មោះមួយរូបប្រចាំនៅក្នុងប្រទេសថៃ។
តាក់ សិលា នេះ គេមានកំណត់ត្រាប្រកួតចំនួន៨៦លើក ឈ្នះ៦៩លើក ចាញ់១៥និងស្មើ០២លើក។ តាមកំណត់នេះ គឺសមត្ថភាពគេខ្លាំង ព្រោះគេអាចយកឈ្នះ វង្ស ណយ ដោយពិន្ទុ កាលពីជួបគ្នាលើកមុន(៣០ធ្នូ២០១៨) ដែលបញ្ជាក់បានថា បទពិសោធន៍របស់គេ មិនអន់នោះឡើយ។ តាក់ សិលា ឈ្នះ វង្ស ណយនេះ ដោយសារគេវាយចំគោលដៅល្អជាង និងច្រើនជាង ការវាយចេញរបស់វង្ស ណយ។ អ្នកប្រដាល់ថៃតាក សិលានេះ រាល់ការវាយចេញរបស់គេ គឺ លឿន រហ័ស ដែលធ្វើឲ្យវង្ស ណយ ពិបាកក្នុងការការពារ និងវាយបកវិញនោះ។
យ៉ាងណា អ្នកប្រដាល់ថៃរូបនេះ មិនប្រាកដថាយកឈ្នះ វង្ស ណយ បានទៀតនោះទេ ក្នុងជំនួបសងសឹកនេះ ព្រោះថា វង្ស ណយ គេបានត្រៀមខ្លួនរួចអស់ហើយ ទាំងកម្លាំងកាយសម្បទា ទាំងកម្លាំងចិត្ត។
ម្យ៉ាងទៀត បើតាមកំណត់ត្រាប្រកួតរបស់ តាក់ សិលា គឺមិនសមនឹងបានឈ្នះ វង្ស ណយ នោះទេ ខណៈដែល វង្ស ណយ គេមានកំណត់ត្រាប្រកួតចំនួន១៩៣លើក ឈ្នះ១២៧លើក ចាញ់៦០លើក និងស្មើ៥លើក ឯណោះ។ ទោះជាយ៉ាងណា វង្ស ណយ មិនអាចធ្វេសប្រហែស ឬមើលងាយ តាក់ សិលា បានឡើយ។
អ្នកប្រដាល់មានប្រជាប្រិយភាព វង្ស ណយ គេប្រកួតជាមួយថៃចុងក្រោយនេះ វាយឈ្នះអ្នកប្រដាល់ថៃYodpetch ក្នុងទឹកទី៣ កាលពីថ្ងៃទី២០ ខែមករា ឆ្នាំ២០១៩កន្លងទៅនេះ។ ចាំមើល រវាងវង្ស ណយ និង តាក់ សិលា ប្រាន២៦ តើនរណាជាអ្នកឈ្នះនៅក្នុងការជួបប្រកួតគ្នាលើកទី២ នេះ ? ។
ចំពោះ សេង ស្រឿន អ្នកប្រដាល់កម្ពុជាក្លិបមហិទ្ធរិទ្ធមេសរថ្ងកមានជ័យ ត្រូវគេផ្តល់ឱកាសឲ្យជួបប្រកួតជាមួយអ្នកប្រដាល់ថៃជើងចាស់ កូលាប ដាំ ប្រាន២៦ (Kolab Dam Phran 26)។ ពួកគេពីរនាក់នេះ ជួបគ្នាក្នុងប្រភេទទម្ងន់ ៦៣,៥០០ គីឡូក្រាម។ សេង ស្រឿន និង កូលាប ដាំ នេះ ពុំធ្លាប់ជួបគ្នាទេពីមុនមក។
សេង ស្រឿន គេជាជើងឯករងខ្សែក្រវាត់គូបូតាទម្ងន់៦៥គ.ក្រ។ អ្នកប្រដាល់រូបនេះ គេល្អទាំងកណ្តាប់ដៃ ជង្គង់ និង កែង។ សេង ស្រឿន ធ្លាប់ជួបប្រកួតជាមួយថៃជិត៣០លើកហើយកន្លងមក ដោយឈ្នះ១៩លើក និងចាញ់០៨លើក ដែលការប្រកួតចុងក្រោយរបស់គេ គឺវាយឈ្នះអ្នកប្រដាល់ថៃយ៉ត ប៉ាគីផាន ក្នុងទឹកទី៤ កាលពីថ្ងៃទី១៥ ខែធ្នូ ឆ្នាំ២០១៨។
កូលាប ដាំ ប្រាន២៦ គេធ្លាប់មកស្រុកខ្មែរច្រើនលើកហើយកន្លងមក តែមិនដែលប៉ះប្រកួតជាមួយសេង ស្រឿន ទេ។ អ្នកប្រដាល់ថៃនេះ កាលពីបីឆ្នាំមុន គេធ្លាប់ផ្ដួលអ្នកប្រដាល់ជើងខ្លាំងរបស់កម្ពុជាបីរូប ដែលមកលើកទី១ គេបានវាយឈ្នះ ផាន់ គ្រាន់ ដោយពិន្ទុ(២៤មេសា២០១៦) លើកទី២ បានវាយឈ្នះ សេក គឹមរួន អ្នកប្រដាល់ក្លិបអង្គរមានជ័យដោយពិន្ទុ(២៤កក្កដា២០១៦ )និងលើកទី៣ថ្ងៃទី០៩ ខែតុលា ឆ្នាំ២០១៦ គេបានវាយឈ្នះ សូត្រ ប៊ុនធី ជើងខ្លាំងក្លិបបក្សីស្លាបដែកដោយពិន្ទុទៀត។
អ្នកប្រដាល់ថៃរូបនេះ មានកំណត់ត្រាប្រកួតចំនួន៩២លើក ឈ្នះ៧៦លើក ចាញ់១៤លើក និង ស្មើ០២លើក។ ទោះជាយ៉ាងណា អ្នកប្រដាល់ថៃរូបនេះ មិនប្រាកដថា អាចឈ្នះ សេង ស្រឿន នោះឡើយ ព្រោះថា សេង ស្រឿន នេះ គេរឹងមាំទាំងកាយសម្បទា ខ្លាំងទាំងស្នៀតប្រដាល់ ហើយវាយមិនប្រណីដៃថែមទៀត។ ចាំមើល សេង ស្រឿន អាចយកឈ្នះអ្នកប្រដាល់ថៃកូលាប ដាំ ប្រាន២៦ បានឬអត់?៕
Source: Kampuchea Thmey Daily
0 Comments